ގޫގުލްގެ އާޓިފިޝަލް އިންޓެލިޖެންސް (އޭއައި) މޮޑެލް، ޖެމިނައި 2.5 ފްލެޝް އަށް ބޮޑެތި ކުރިއެރުންތަކެއް ގެނެސް އަޕްގްރޭޑްކޮށްފިއެވެ.
މި ކުރިއެރުންތަކުގެ ސަބަބުން މި މޮޑެލްގެ ތަސްވީރު ދެނެގަތުމުގެ ގާބިލިއްޔަތު އިތުރުވެ، ޖަވާބުތައް ހުށަހަޅައިދޭ ގޮތް އިތުރަށް ފުރިހަމަވެފައިވާ ކަމަށް ގޫގުލް އިން ބުނެއެވެ.
ޖެމިނައި 2.5 ފްލެޝް އަށް ދަރިވަރުންގެ ހޯމްވޯކްތަކަށް އެހީތެރިވުމުގެ ގާބިލިއްޔަތު އިތުރުކުރެވިފައިވާއިރު، މި މޮޑެލް އިން ދަރިވަރުންނަށް ސުވާލުތަކުގެ ޖަވާބު ދިނުމުގައި، ސޮކްރެޓިކް މެތޯޑް ބޭނުންކޮށްގެން، ފިޔަވަޅަކަށް ފަހު ފިޔަވަޅެއްގެ ގޮތުގައި މައުލޫމާތު ދިނުމަށް އެހީތެރިވެދޭނެއެވެ. މީގެ އިތުރުން، މޮޑެލް އިން ދޭ ޖަވާބުތައް އިތުރަށް ފަހުމުވާނެ ގޮތަށް ވަކިވަކި ސުރުޚީތަކާއި، ލިސްޓުތަކާއި، ތާވަލުތައް ބޭނުންކުރާނެއެވެ.
ގޫގުލް އިން ބުނި ގޮތުގައި، ޖެމިނައި 2.5 ފްލެޝް އަށް ތަސްވީރުތައް ދެނެގަތުމުގެ ގާބިލިއްޔަތު ވަނީ ވަރަށް ބޮޑަށް ރަނގަޅުކުރެވިފައެވެ.
މިކަމުގެ ސަބަބުން، މޮޑެލް އަށް ތަސްވީރުތަކުގައި ހިމެނޭ ތަފާތު އެއްޗެހިތައް ދެނެގަނެ، އެ ތަސްވީރުތަކާ ބެހޭގޮތުން ކުރެވޭ ސުވާލުތަކަށް ތަފްސީލީ ޖަވާބު ދިނުމުގެ ގާބިލިއްޔަތު ލިބިފައިވެއެވެ.
އާ ފީޗާތަކުގެ ތެރޭގައި، ބޭނުންކުރާ ފަރާތްތަކަށް އެމީހުންގެ ނޯޓްތައް އަޕްލޯޑްކޮށް، އެ މައުލޫމާތުތައް ތަރުތީބުކުރުމަށް ނުވަތަ ކުރުކޮށްދިނުމަށް އެދެވިދާނެއެވެ. އަދި ޖެމިނައި 2.5 ފްލެޝް މޮޑެލް އިން ފްލެޝް ކާޑްސް ވެސް ތައްޔާރުކޮށްދޭނެއެވެ.
މި ހުރިހާ ފީޗާސްތަކެއް މިހާރު ދުނިޔޭގެ އެކި ކަންކޮޅުތަކުގައި ބޭނުންކުރާ ފަރާތްތަކަށް ދަނީ ލިބެމުންނެވެ. މިއީ މޯބައިލް އެޕްތަކާއި ވެބްސައިޓްތަކުން ވެސް ލިބޭނެ ހިދުމެތެކެވެ.
ޖެމިނައި 2.5 ފްލެޝް އަކީ ގޫގުލްގެ ހިލޭ ޓިއާގެ ޑިފޯލްޓް އޭއައި މޮޑެލް ކަމަށާއި، ގޫގުލް އޭއައި ޕްރޯ އަދި އަލްޓްރާ ސަބްސްކްރައިބަރުންނަށް ވެސް މި ހިދުމަތް ލިބޭނެ ކަމަށް ގޫގުލް އިން ބުނެއެވެ. ޕްރޯ ވާޝަންއާ ހިލާފަށް، މި މޮޑެލް ޑިޒައިންކުރެވިފައިވަނީ އަވަސް ޖަވާބުތަކެއް ދިނުމަށް އިސްކަންދީގެންނެވެ.
ޖެމިނައި 2.5 ފްލެޝް އަކީ ގޫގުލްގެ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީގެ އެންމެ ފަހުގެ އެއް ކުރިއެރުމެވެ. މި މޮޑެލް ޑިޒައިންކުރެވިފައިވަނީ ޔޫޒަރުންނަށް އަވަހަށް، އަދި ފަސޭހައިން މައުލޫމާތު ދިނުމަށް އިސްކަންދީގެންނެވެ. ޖެމިނައިގެ ކުރީގެ ވާޝަންތަކާއި އަޅާބަލާއިރު، 2.5 ފްލެޝް ގައި ތަސްވީރު ދެނެގަތުމުގެ ގާބިލިއްޔަތު ވަނީ ވަރަށް ބޮޑަށް ރަނގަޅުކުރެވިފައެވެ.