ގައުމީ ބޭންކް، ބީއެމްއެލްއިން އޭޓީއެމް މެދުވެރިކޮށް ކަސްޓަމަރަކަށް މަހެއްގެ މައްޗަށް ނަގުދު ފައިސާއިން ޑޮލަރު ނެގޭ އަދަދަކީ މިއަދުން ފެށިގެން 3,500 ޑޮލަރު ކަމުގައި ހަމަޖައްސައިފިއެވެ.
ބީއެމްއެލްއިން ބުނީ އެ ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް އެ ބެންކުން ގެންގުޅޭ ދުރު ރާސްތާގެ ސިޔާސަތުގެ ދަށުން ނިންމާފައިވާ ނިންމުމެއް ކަމަށެވެ.
ބެންކުން ބުނީ އެ ބަދަލު ގެނައި ނަމަވެސް ކާޑަކުން ދުވާލަކަށް ނެގޭ 1,600 ޑޮލަރުގެ ލިމިޓަށް އެއްވެސް ބަދަލެއް ނާންނާނެކަމަށެވެ.
ބީއެމްއެލްއިން ބުނި ގޮތުގައި، ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިން ޚިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ގާއިމުކުރުމަށްޓަކައި އެ ބެންކުން ވަނީ މުހިންމު ބޮޑެތި އިންވެސްޓްމަންޓުތަކެއް ކޮށްފައެވެ. އެގޮތުން ބީއެމްއެލް މޮބައިލް ބޭންކިންގް އާއި އިންޓަނެޓް ބޭންކިންގް މެދުވެރިކޮށް ކޮންމެ ވަގުތަކު، ކޮންމެ ތަނެއްގައި ހުރެގެން ވެސް ބިލުތަކަށް ފައިސާ ދެއްކުމާއި، ފައިސާ ޓްރާންސްފާ ކުރުމުގެ އިތުރުން އެކައުންޓުގެ އެންމެހައި މުއާމަލާތްތައް ފަސޭހަކަމާއެކު ބަލަހައްޓައި މެނޭޖްކުރެވޭކަން އެ ބެންކުން ފާހަގަކުރިއެވެ.
މީގެ އިތުރުން ރާއްޖެއާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި އެކައުންޓުތަކަށް ވަގުތުން ވަގުތަށް ފައިސާ ފޮނުވުމުގެ ޚިދުމަތް ވެސް ކަސްޓަމަރުންނަށް ފަސޭހަކަމާއެކު ލިބޭ ކަމަށް ބީއެމްއެލްއިން ބުންޏެވެ.
ބީއެމްއެލްއިން އެ ލިމިޓު ކަނޑައެޅިއިރު، އެ ބެންކުން އަންނަނީ، ލިބޭ މިންވަރަށްވުރެ އިތުރަށް ޑޮލަރު ވިއްކަން ޖެހުމުގެ ކަންބޮޑުވުން ފާޅުކުރަމުންނެވެ. އަދި، އެ ބޭންކު މެދުވެރިކޮށް ރުފިޔާ އެކައުންޓުތަކުން ކުރާ ބޭރުގެ މުއާމަލާތްތައް މި އަހަރު ވަރަށް ބޮޑަށް އިތުރުވެފައިވާ ކަމަށް ބީއެމްއެލުން ބުނެފައިވެއެވެ.
ބެންކުން ހާމަކޮށްފައިވާ ގޮތުގައި، މިދިޔަ އޮގަސްޓް މަހުގެ ނިޔަލަށް އެވަރެޖުކޮށް މަހެއްގެ މައްޗަށް 81.6 މިލިއަން ޑޮލަރު ބޭންކުން ވިއްކާފައިވާއިރު، އެ މަހުގެ ނިޔަލަށް މި އަހަރު 653 މިލިއަން ޑޮލަރު ވިއްކައިފައިވެއެވެ. އެއީ މިދިޔަ އަހަރުގެ އެ މުއްދަތާ އަޅާބަލާއިރު ގާތްގަނޑަކަށް 33 އިންސައްތައިގެ އިތުރުވުމެއް ކަމަށް އެ ބޭންކުން ބުންޏެވެ.
އެހެންވެ، އެ ބެންކުން ވަނީ ރުފިޔާ ކާޑުން ޑޮލަރުން ކުރެވޭ މުއާމަލާތްތަކަށް ލިމިޓުތައް ކަނޑައަޅައިފައެވެ.