ނާސާގެ "ނީލް ގެރެލްސް ސްވިފްޓް އޮބްޒަވޭޓަރީ" ގެ އޯބިޓް މަތިކޮށް، އެ ޓެލެސްކޯޕް ސަލާމަތްކުރަން ކުރި މަސައްކަތް ނާކާމިޔާބުވުމާ ގުޅިގެން، އެ ޓެލެސްކޯޕް ދުނިޔެއަށް ވެއްޓެން ފަށައިފިއެވެ.
މީގެ 22 އަހަރު ކުރިން ޖައްވަށް ފޮނުވި މި ޓެލެސްކޯޕް މިހާރު ދަތުރުކުރަމުން ދަނީ ދުނިޔޭގެ ސަތަހައިން ފެށިގެން 325 ކިލޯމީޓަރު މަތީގައެވެ. ނާސާއިން ލަފާކުރާ ގޮތުގައި، އޮކްޓޯބަރު މަހުގެ ކުރީކޮޅު ނުވަތަ މެދުތެރޭގައި މި ޓެލެސްކޯޕް 300 ކިލޯމީޓަރަށް ވުރެ ތިރިއަށް ވެއްޓޭނެއެވެ. އަދި އެ ހިސާބަށް ދިއުމުން ޓެލެސްކޯޕް އޮޕަރޭޓްކުރުމަކީ ވަރަށް ބޮޑު ގޮންޖެހުމަކަށް ވާނެ ކަމަށާއި، އޭގެ ފަހުން އޯބިޓުން ނެއްޓި ދުނިޔޭގެ ވައިގެ ފަށަލައިގެ ތެރެއަށް ވަދެ އަނދައިގެން ދާނެ ކަމަށް ނާސާއިން ބުނެފައިވެއެވެ.
ބަރުދަނުގައި 1،452 ކިލޯގްރާމް ހުންނަ މި އޮބްޒަވޭޓަރީ ވެއްޓުމުގެ ސަބަބުން ލިބިދާނެ ގެއްލުމަކާ ގުޅޭގޮތުން ޖައްވީ އުޅަނދުތައް ޓްރެކްކުރާ ކުންފުންޏެއް ކަމަށްވާ ލިއޯލެބްސްއިން ސީއެންއެންއަށް ފޮނުވި އީމެއިލް ބަޔާނެއްގައި ބުނެފައިވަނީ، ޓެލެސްކޯޕްގެ ބޮޑުމިނަށް ބަލާއިރު އޭގެ ބައެއް ބައިތައް ނާނދައި ދުނިޔެއާ ހަމައަށް ފޯރުމަކީ އެކަށީގެންވާ ކަމެއް ކަމަށެވެ. ނަމަވެސް އޭގެ ސަބަބުން މުދަލަށް ނުވަތަ މީހަކަށް ގެއްލުމެއް ލިބުމުގެ ފުރުސަތު ވަރަށް ކުޑަ ކަމަށާއި، ބޮޑަށް ލަފާކުރެވެނީ މީހުން ދިރިނޫޅޭ ހިސާބަކަށް ނުވަތަ ކަނޑަށް ވެއްޓޭނެ ކަމަށް އެ ކުންފުނިން ފާހަގަކޮށްފައިވެއެވެ. މިކަމާ ގުޅޭގޮތުން ނާސާއިން ވަކި އެއްޗެއް ބުނެފައެއް ނުވެއެވެ.
ސްވިފްޓް ޓެލެސްކޯޕް ސަލާމަތްކުރުމަށްޓަކައި އެމެރިކާގެ އެރިޒޯނާގައި ހުންނަ ކެޓަލިސްޓް ސްޕޭސް ޓެކްނޮލޮޖީސް ކުންފުނިން ވަނީ އެންމެ ނުވަ މަސްދުވަހުގެ ތެރޭގައި "ލިންކް" ގެ ނަމުގައި ސެޓެލައިޓެއް އުފައްދައި ޖުލައި މަހުގެ ކުރީކޮޅު ޖައްވަށް ފޮނުވާފައެވެ. މި މިޝަންގެ އަމާޒަކީ ސްވިފްޓް ޓެލެސްކޯޕްގައި ހިފައި، އޭގެ އޯބިޓް މަތިކުރުމެވެ. ނަމަވެސް ލޯންޗުކުރިތާ މަދު ހަފުތާތަކެއްގެ ތެރޭގައި ލިންކް ސެޓެލައިޓް ކޮންޓްރޯލުން ނެއްޓި، އަމިއްލައަށް އެނބުރެން ފެށުމާ ގުޅިގެން މިޝަން ވަނީ ނާކާމިޔާބުވެފައެވެ.
ނާސާގެ އެސްޓްރޯފިޒިކްސް ޑިވިޝަންގެ ޑިރެކްޓަރު ޝޯން ޑޮމަގަލް-ގޯލްޑްމަން ނެރުނު ބަޔާނެއްގައި ބުނި ގޮތުގައި، މިއީ ފެށުނީއްސުރެ ވެސް ރިސްކު ބޮޑު މިޝަނެކެވެ. އަދި މިފަދަ ފިޔަވަޅެއް ނާޅައިފިނަމަ މިއަހަރުގެ ނިޔަލަށް ސްވިފްޓް ޓެލެސްކޯޕް ދުނިޔެއަށް ވެއްޓޭނެކަން އެނގިފައިވާކަމަށް ކަމަށް އޭނާ ބުނެފައިވެއެވެ. ނަމަވެސް މި މަސައްކަތަކީ ބޭކާރު ކަމެއް ނޫން ކަމަށާއި، މީގެ ސަބަބުން ކުރިމަގުގައި ޖައްވީ އުޅަނދުތަކަށް ހިދުމަތް ދިނުމުގެ ޓެކްނޮލޮޖީ ކުރިއެރުވުމަށް މުހިންމު ފިލާވަޅުތަކެއް ދަސްވެއްޖެ ކަމަށް ނާސާއާއި ކެޓަލިސްޓް ކުންފުނިން ވެސް ފާހަގަކޮށްފައިވެއެވެ.
ލިންކް ސެޓެލައިޓް ކޮންޓްރޯލުން ނެއްޓުމާ ގުޅިގެން ކެޓަލިސްޓް ކުންފުނީގެ އިންޖިނޭރުން ވަނީ ސެޓެލައިޓްގެ ތްރަސްޓަރުތައް ބޭނުންކޮށްގެން އޭގެ އެނބުރުން މަޑުކޮށް، އާ ސޮފްޓްވެއަރއެއް އަޅާފައެވެ. ނަމަވެސް މި މަސައްކަތުގެ ތެރޭގައި ސެޓެލައިޓްގެ ތެޔޮ ހުސްވުމާ ގުޅިގެން، ސްވިފްޓް ޓެލެސްކޯޕް ހިފެހެއްޓުމަށް ބޭނުންވާ ވަރަށް ތެޔޮ ނެތް ކަމަށް ނާސާއާއި ކެޓަލިސްޓުން ނިންމިއެވެ. އެހެންކަމުން އޮގަސްޓު މަހުގެ މެދުތެރޭގައި މި މިޝަން ވަނީ ޓެސްޓު ދަތުރަކަށް ބަދަލުކޮށްފައެވެ.
ސެޕްޓެމްބަރު މަހުގެ ފުރަތަމަ ހަފުތާގައި ލިންކް ސެޓެލައިޓް ވަނީ ސްވިފްޓް ޓެލެސްކޯޕާ 12 އާއި 15 ކިލޯމީޓަރާ ދެމެދުގެ ރާސްތާއަކަށް ކައިރިކޮށްފައެވެ. އަދި ޓެލެސްކޯޕްގައި ހިފުމަށް ފަރުމާކޮށްފައިވާ ތިން ރޮބޮޓިކް އަތް ނެރެ، އިލެކްޓްރިކް ތްރަސްޓަރުތައް ވެސް ޓެސްޓުކޮށްފައިވެއެވެ. ކެޓަލިސްޓުން ބުނި ގޮތުގައި، 85 ދުވަސް ވަންދެން ޖައްވުގައި އޮޕަރޭޓްކުރުމަށްފަހު ލިންކް ސެޓެލައިޓް ވަނީ ސެޕްޓެމްބަރު 25 ވަނަ ދުވަހު ދުނިޔޭގެ ވައިގެ ފަށަލައިގެ ތެރެއަށް ވަދެފައެވެ.
ކެޓަލިސްޓް ސްޕޭސްގެ ސީއީއޯ ގޮންހީ ލީ ބުނި ގޮތުގައި، ލިންކް އުފެއްދީ ފަސޭހަ ހައްލެއް ނެތް ބޮޑު މައްސަލައަކާ ކުރިމަތިލުމަށެވެ. އަދި ކަނޑައެޅި ހުރިހާ އަމާޒަކަށް ވާސިލުނުވެވުނު ނަމަވެސް، އެއް އަހަރަށް ވުރެ ކުރު މުއްދަތެއްގެ ތެރޭގައި ކޮމާޝަލް ސްޕޭސް ރޮބޮޓެއް އުފައްދައި ޖައްވަށް ފޮނުވުމަކީ ކުރިމަގަށް އެޅުނު ވަރަށް ބޮޑު ބިންގަލެއް ކަމަށް އޭނާ ފާހަގަކުރިއެވެ.
ނޮވެމްބަރު 2004 ގައި ލޯންޗުކުރި ސްވިފްޓް އޮބްޒަވޭޓަރީއަކީ ޖައްވުގައި ހިނގާ އެންމެ ބާރުގަދަ ގޮވުންތައް ކަމަށްވާ ގާމާ-ރޭ ބަރސްޓްސް ދިރާސާކުރުމަށް ފަރުމާކޮށްފައިވާ ޓެލެސްކޯޕެކެވެ. މީގެ އިތުރުން އެހެނިހެން ޖައްވީ ހާދިސާތަކާއި، އެސްޓްރޮއިޑް އަދި ކޮމެޓްތައް ދިރާސާކުރުމަށް ވެސް ސައިންސްވެރިން ވަނީ މި ޓެލެސްކޯޕް ބޭނުންކޮށްފައެވެ. މި ޓެލެސްކޯޕްގެ ބަދަލުގައި ބޭނުންކުރާނެ އެހެން އޮބްޒަވޭޓަރީއެއް އަދި ނާސާއިން ކަނޑައަޅާފައެއް ނުވެއެވެ.
ސްވިފްޓް ޓެލެސްކޯޕް ވެއްޓުން އަވަސްވެފައިވަނީ 2024 ވަނަ އަހަރު އިރުގެ ހަރަކާތްތައް އޭގެ އެންމެ މަތީ ދަރަޖައަށް ގޮސް، ދުނިޔޭގެ ވައިގެ ފަށަލަ ފުޅާވުމުގެ ސަބަބުން ޓެލެސްކޯޕަށް ކުރިމަތިވި ޑްރެގް އިތުރުވުމާ ގުޅިގެންނެވެ. ޓެލެސްކޯޕް ތިރިއަށް ދިއުން މަޑުޖެއްސުމަށްޓަކައި އޭގެ އިންސްޓްރޫމަންޓްތައް މަސްތަކެއް ވަންދެން ނިއްވާލާފައި ބެހެއްޓުމަށްފަހު، މިހާރު ސައިންސްވެރިން ދަނީ އެންމެ ފަހު ވަގުތާ ޖެހެންދެން ޑޭޓާ އެއްކުރުމަށްޓަކައި އިންސްޓްރޫމަންޓްތައް އަލުން ހުޅުވަމުންނެވެ. ނަމަވެސް މީގެ ސަބަބުން ޓެލެސްކޯޕް ވެއްޓޭ މިންވަރު ދަނީ އިތުރަށް އަވަސްވަމުންނެވެ.