އިންޓަނެޓް މެދުވެރިކޮށް ކުޑަކުދިންނަށް ރައްކާތެރި މާހައުލެއް ގާއިމުކޮށްދިނުމަށް ޓެކްނޮލޮޖީ ކުންފުނިތަކަށް ކުރިމަތިވަމުންދާ ފިއްތުންތަކާ ގުޅިގެން، ވަޓްސްއެޕުން ފުރާވަރުގެ ކުދިންނަށް ޚާއްސަ އިޚްތިޔާރީ "ޕޭރެންޓަލް ކޮންޓްރޯލް" ވަސީލަތްތަކެއް ތައާރަފުކުރަން ފަށައިފިއެވެ.
މި އާ ވަސީލަތްތަކުގެ މެދުވެރިކޮށް، ދަރިން ގްރޫޕްތަކާ ގުޅޭއިރު ނުވަތަ ގްރޫޕްތަކުން ވަކިވާއިރު ބެލެނިވެރިންނަށް އެކަން އެނގޭނެ ގޮތް ހެދުމުގެ އިތުރުން، އެ ކުދިންގެ އެކައުންޓުގެ ޕްރައިވަސީ ސެޓިންގްސް ކަނޑައެޅުމުގެ އިޚްތިޔާރު ބެލެނިވެރިންނަށް ލިބިގެންދާނެއެވެ.
ނަމަވެސް، ވަޓްސްއެޕުން އާންމުކުރި ބްލޮގް ޕޯސްޓެއްގައި ބުނެފައިވަނީ މި ފީޗަރުތަކާއެކު ވެސް ދަރިން ފޮނުވާ އަދި ލިބޭ މެސެޖުތައް ބެލެނިވެރިންނަކަށް ނުބެލޭނެ ކަމަށެވެ. އަދި އެންޑް-ޓޫ-އެންޑް އެންކްރިޕްޝަން މެދުވެރިކޮށް، މެސެޖުތަކާއި ކޯލްތަކުގެ ސިއްރުހިފެހެއްޓުން ކުރިއެކޭވެސް އެއްގޮތަށް ދަމަހައްޓާނެ ކަމަށް އެ ކުންފުނިން ބުންޏެވެ.
މި ސެޓިންގްސްތަކަކީ މަޖުބޫރު ކަމެއްގެ ބަދަލުގައި އިޚްތިޔާރީ ކަމަކަށް ހެދުމުން، ސޯޝަލް މީޑިއާ އެނަލިސްޓް މެޓް ނަވާރާ ވަނީ އެއީ މި ނިޒާމުގައި އޮތް ބޮޑު އުނިކަމެއްގެ ގޮތުގައި ސިފަކޮށްފައެވެ.
އޭނާ ފާހަގަކުރި ގޮތުގައި، މެޓާއިން މިފަދަ ފިޔަވަޅެއް އެޅުމަކީ އެ ކުންފުންޏަށް ލިބުނު ފަސޭހައެކެވެ. ސަބަބަކީ އުމުރު ކަށަވަރުކުރުމުގެ ބުރަ ކުންފުނީގެ މައްޗަށް އޮތުމުގެ ބަދަލުގައި، އޭގެ މަސްއޫލިއްޔަތު ބެލެނިވެރިންނާއި ކުދިންގެ ކޮނޑުގައި އެޅުވޭތީއެވެ.
އޭނާ އިތުރަށް ސުވާލު އުފެއްދެވީ، ރެގިއުލޭޓަރުންނަށް ކުދިންގެ ރައްކާތެރިކަމުގެ ނިޒާމެއް އޮތްކަން ދެއްކުމަށް މެޓާއިން މަސައްކަތް ކުރިނަމަވެސް، އާއިލާތަކުން މި ފީޗަރު އެކަށީގެންވާ މިންވަރަކަށް ބޭނުންކުރާނެތޯއެވެ.
އިނގިރޭސިވިލާތުގައި ވަޓްސްއެޕް ބޭނުންކުރެވޭ އެންމެ ދަށް އުމުރަކީ 13 އަހަރު ކަމަށްވާއިރު، ބައެއް އެހެން ގައުމުތަކުގައި މި އުމުރު މިއަށްވުރެ މަތީގައެވެ.
ވަޓްސްއެޕުން ބުނި ގޮތުގައި، ބެލެނިވެރިންނަށް ކޮންމެ ވަގުތަކުވެސް މި ކޮންޓްރޯލްތަކަށް ބަދަލުުގެނެސް ނުވަތަ ނިއްވާލެވޭނެއެވެ.
މި ނިޒާމު ގާއިމުކުރުމަށް ބެލެނިވެރިޔާ ޚާއްސަ ޕިން ނަންބަރެއް ބޭނުންކުރަންޖެހޭނެއެވެ. އަދި ކުދިން މި ސެޓިންގްސްތައް ނިއްވާލަން ބޭނުންވެއްޖެނަމަ، އެ ޕިން ނަންބަރު ބޭނުންވާނެއެވެ.
އާ ޕްރައިވަސީ ވަސީލަތްތަކުގެ ތެރޭގައި ކުއްޖާގެ ޕްރޮފައިލް ފޮޓޯ ފެންނާނެ މީހުންނާއި، އެ ކުދިން ގްރޫޕްތަކަށް އިތުރުކުރެވޭނެ މީހުން ކަނޑައެޅުން ހިމެނެއެވެ.
އޭގެ އިތުރުން، ތަފާތު ޖަމިއްޔާތަކާއި މަޝްހޫރު ފަރާތްތަކުން މައުލޫމާތު ފޮނުވުމަށް ބޭނުންކުރާ "ޗެނަލްސް" ފީޗަރު ކުދިން ބޭނުންކުރާނެ ގޮތްވެސް ބެލެނިވެރިންނަށް ކަނޑައެޅޭނެއެވެ.
އަދި އެޕްގައި ހިމެނޭ "މެޓާ އޭއައި" އެސިސްޓެންޓް ބޭނުންކުރުމުގައި، އާންމު 13+ ސެޓިންގް ނުވަތަ މައުލޫމާތު އަންނަ މިންވަރު ހިފަހައްޓައިދޭ "ލިމިޓެޑް ކޮންޓެންޓް" އޮޕްޝަން ޚިޔާރުކުރުމުގެ ފުރުސަތު ވެސް ބެލެނިވެރިންނަށް ލިބޭނެއެވެ.
ވަޓްސްއެޕުން ބުނީ މި ކޮންޓްރޯލްތަކުގެ މައިގަނޑު މަގުސަދަކީ އެކަކު އަނެކަކަށް ފޮނުވާ ސިއްރު މެސެޖުތަކުގެ ރައްކާތެރިކަން ނުގެއްލޭގޮތަށް، ބެލެނިވެރިންނާއި ދަރިންގެ މެދުގައި ވާޓްސްއެޕް ބޭނުންކުރުމާ ބެހޭގޮތުން ހުޅުވާލެވިގެން މަޝްވަރާކުރުމަށް މަގުފަހިކުރުން ކަމަށެވެ.
މި ބަދަލުތައް ތަޢާރަފުކޮށްފައިވަނީ ކުޑަކުދިން ރައްކާތެރިކުރުމަށްޓަކައި ސޯޝަލް މީޑިއާ ކުންފުނިތަކުން އަމަލުކުރާ ގޮތް ބަދަލުކުރުމަށް ސަރުކާރުތަކުންނާއި ރެގިއުލޭޓަރުން ކުރިމަތިކުރަމުންދާ ފިއްތުންތައް ބޮޑުވަމުންދާ ދަނޑިވަޅެއްގައެވެ.
އެގޮތުން، އިނގިރޭސި ސަރުކާރުން ވަނީ 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރުމުގެ ޕްލޭނެއް ޖޫން މަހު އިއުލާނުކޮށްފައެވެ. އަދި މިއަށް އަމަލުކުރަން ފަށާނީ 2027 ވަނަ އަހަރުގެ މާރިޗު މަހު ކަމަށް ލަފާކުރެވެއެވެ.
މި ފިޔަވަޅުގެ ދަށުން ސޯޝަލް މީޑިއާ ބޭނުންކުރާ މީހުންގެ އުމުރު ކަށަވަރުކުރުމަށްޓަކައި "ވަރުގަދަ އުމުރު ކަށަވަރުކުރުމުގެ މިންގަނޑުތަކެއް" ބޭނުންކުރާނެ ކަމަށް ސަރުކާރުން ބުނެފައިވެއެވެ.
ނަމަވެސް، ވަޓްސްއެޕަކީ ސަރުކާރުން މެސެޖުކުރާ ޚިދުމަތެއްގެ ގޮތުގައި ބަލައިގަންނަ އެޕަކަށްވާތީ، ސޯޝަލް މީޑިއާ މަނާކުރުމުގެ މި ގަވާއިދުން ވަޓްސްއެޕް ވަނީ އިސްތިސްނާކޮށްފައެވެ.