ނިދަން އުނދަގޫވާ މީހުންނަށް ނިދުމަށް އެހީތެރިވެދޭ ޚާއްޞަ ޕެޗެއް އުފައްދައިފިއެވެ.
މަދު ވަގުތު ކޮޅެއްގައި ނޫނީ ނުނިދޭ މީހުންނަށް އުއްމީދީ އާ ހައްލެއްގެ ގޮތުގައި، އެއްވެސް ބޭހަކާ ނުލައި އަދި ސާޖަރީއެއް ހަދަން ނުޖެހި، ފަސޭހަކަމާއެކު އަވަހަށް ނިދާލެވޭ ގޮތަށް އުފެއްދި މި މަޑު ޕެޗަކީ އެމެރިކާގެ ޔުނިވާސިޓީ އޮފް ޓެކްސަސް އެޓް އޮސްޓިންގެ އިންޖިނިއަރުންގެ ޓީމަކުން ތަރައްޤީކޮށްފައިވާ އުފެއްދުމެކެވެ.
މި ޕެޗަކީ ނިދީގެ އެންމެ ފުން އަދި މުހިންމު މަރުޙަލާ ކަމަށްވާ "ރެމް ސްލީޕް" އަށް އަވަހަށް ދިއުމަށާއި އެ މަރުޙަލާގައި ގިނަވަގުތު ހޭދަކުރުމަށް އެހީތެރިވެދޭ އެއްޗެކެވެ.
ރެމް ސްލީޕްއަކީ އިންސާނާ ނިދުމުގެ ތެރޭގައި ހިނގާ އެންމެ ފުން އަދި ސިކުނޑީގެ މަސައްކަތްތަކާ އެންމެ ބޮޑަށް ގުޅިފައިވާ މުހިންމު މަރުޙަލާއެވެ. ރެމް ސްލީޕްގެ ވަގުތު މަދުވުން ނުވަތަ މި މަރުޙަލާއަށް ބުރޫއެރުމަކީ ޑިޕްރެޝަން، އެންޒައިޓީ، އަދި ސްޓްރެސް ފަދަ ނަފްސާނީ މައްސަލަތަކާ ގުޅުންހުރި ކަމެކެވެ.
ނިއުސްލީޕީގެ ނަމުން ނަންދެވިފައިވާ މި ޑިވައިސް ބޭނުންކޮށްގެން 28 މީހުން ހިމަނައިގެން ކުރިއަށްގެންދިޔަ ދިރާސާއަކުން ދެއްކި ގޮތުގައި، މި ޕެޗު ބޭނުންކުރި މީހުން އާދައިގެ މިންވަރަށްވުރެ 43 މިނެޓު އަވަހަށް ރެމް ސްލީޕަށް ވަދެ، އެ މަރުޙަލާގައި އިތުރު 16 މިނެޓު ހޭދަކޮށްފައިވެއެވެ.
މިއީ ގައިގެ ބޭރުން، ސިކުނޑީގެ ފުން ސަރަޙައްދުތަކަށް އަސަރުކުރުވުމާއެކު އެއްވަގުތެއްގައި ސިކުނޑީގެ ސިގްނަލްތައް ރެކޯޑުކުރެވޭ ގޮތަށް އުފެއްދި ފުރަތަމަ ނޮން-އިންވޭސިވް ޑިވައިސްއެވެ. މާނައަކީ މިއީ ހަށިގަނޑު ކަފާލައިގެން، ސާޖަރީއެއް ހަދައިގެން، ނުވަތަ ހަންގަނޑު ތޮރުފާލައިގެން (ކައްޓެއް/އިންޖެކްޝަނެއް ފަދަ އެއްޗެއް ވައްދައިގެން) ނޫން ގޮތަކަށް، ހަށިގަނޑުގެ ބޭރުން ބޭނުންކުރެވޭ މެޑިކަލް ނުވަތަ ޓެކްނޮލޮޖީ ޑިވައިސްއެކެވެ.
މި ޕެޗުގައި ހިމެނެނީ އަލްޓްރާސައުންޑް ސްޓިމިއުލޭޝަންގެ އިތުރުން ސިކުނޑީގެ މަސައްކަތްތައް ވަގުތުން ވަގުތަށް ދެނެގަންނަ އިލެކްޓްރޯޑްތަކެވެ.
މި ދިރާސާގެ އިސްމުސަންނިފު ކޭ ވިންގް "ކެވިން" ޓަންގް ވިދާޅުވި ގޮތުގައި، ނޭޗާ ކޮމިއުނިކޭޝަންސް ޖަރނަލްގައި ޝާއިޢުކުރެވުނު މި ހޯދުމަކީ މި ދާއިރާއިން ލިބުނު ވަރަށް ބޮޑު ކުރިއެރުމެކެވެ. މީގެކުރިން ސިކުނޑީގެ ފުން ހިސާބުތަކަށް ނޮން-އިންވޭސިވްކޮށް އަސަރުކުރުވުމާއެކު، ސިކުނޑީގެ ހަރަކާތްތައް ވަގުތުން ވަގުތަށް ބެލޭނެ ގޮތެއް ހޯދިފައެއް ނުވެއެވެ.
މި ދިރާސާ ސުޕަވައިޒްކުރެއްވި ބަޔޯމެޑިކަލް އިންޖިނިއަރިންގެ އެސިސްޓެންޓް ޕްރޮފެސަރު ހުއިލިއަންގް "އެވަން" ވަންގް ފާހަގަކުރެއްވި ގޮތުގައި، ހަމައެކަނި ހަންގަނޑުގައި ތަތްކޮށްލައިގެން ބޭނުންކުރެވޭ މިފަދަ ޑިވައިސްއެއްގެ ސަބަބުން، ނިދުމުގެ މައްސަލަތަކަށް ގޭގައި ތިބެގެން ފަރުވާކުރުމަށާއި ދިރާސާކުރުމަށް ސައިންސްވެރިންނަށާއި ޑޮކްޓަރުންނަށް އާ މަގުތަކެއް ހުޅުވިގެންދާނެއެވެ.
ނިދީގެ ވަގުތަށް އައި ބަދަލުގެ އިތުރުން، މި ޕެޗުގެ ސަބަބުން ދުޅަހެޔޮ ސިއްހަތެއްގައި ތިބި މީހުންގެ 'ހާޓް ރޭޓް ވެރިއަބިލިޓީ' އިތުރުވެފައިވާކަން ފާހަގަކުރެވުނެވެ. ސިކުނޑީގެ ސްކޭންތަކުން ދެއްކި ގޮތުގައި ނަފްސާނީ އިހުސާސްތަކާ ގުޅުންހުރި ސިކުނޑީގެ ސާކިޓްތަކަށް ބަދަލުތަކެއް އައިސްފައިވާތީ، މީގެ ސަބަބުން ނިދުމުގެ އިތުރުން ނަފްސާނީ ފިއްތުންތަކާ (ސްޓްރެސް) ކުރިމަތިލުމަށްވެސް އެހީތެރިވެދޭނެއެވެ.
މި ދިރާސާގެ ކޯ-ޕްރިންސިޕަލް އިންވެސްޓިގޭޓާ ގްރެގޮރީ ފޮންޒޯ ވިދާޅުވީ، ރެމް ސްލީޕަކީ ހަމައެކަނި ހުވަފެން ފެންނަ މަރުޙަލާ ނޫން ކަމަށާއި، މިއީ ސިކުނޑިން އިހުސާސްތައް ތަރުތީބުކޮށް ސްޓްރެސްއަށް ހޭނުމަށް އެހީތެރިވެދޭ ވަގުތެއް ކަމަށެވެ. އަދި ރެމް ސްލީޕް ގޯސްވުމަކީ ޑިޕްރެޝަން، އެންޒައިޓީ އަދި ޕީޓީއެސްޑީ ފަދަ ނަފްސާނީ މައްސަލަތަކާ ގުޅިފައިވާ ކަމެއް ކަމަށްވާތީ، މި ޕެޗަކީ އެފަދަ ކަންކަމަށް ލިބޭނެ މުހިންމު ފަރުވާއެކެވެ.
މި ދިރާސާގައި ބައިވެރިވި މީހުން ބުނެފައިވަނީ މި ޕެޗު ބޭނުންކުރަން ފަސޭހަ އަދި އަރާމު ކަމަށެވެ. އަދި މީގެއިން ނޭދެވޭ ނުރައްކާތެރި ސައިޑް އިފެކްޓެއް ފެނިފައިނުވާ ކަމަށް ރިސާޗަރުން ވަނީ ބުނެފައެވެ.
ރިސާޗް ޓީމުން މިހާރު ރާވަމުންދަނީ އިތުރު މީހުން ބައިވެރިކޮށްގެން ބޮޑެތި ޓްރަޔަލްތައް ކުރިއަށްގެންދިއުމަށެވެ. މީގެ މައިގަނޑު ބޭނުމަކީ ޑިޕްރެޝަން، ޕީޓީއެސްޑީ އަދި ދާއިމީކޮށް ނިދިނާންނަ ބަލި (އިންސޮމްނިއާ) ހުންނަ މީހުންނަށް މީގެއިން ކުރާ ފައިދާ އިތުރަށް ކަށަވަރުކުރުމެވެ.
މި ޑިވައިސް އާންމުންނާ ހަމައަށް މާކެޓަށް ނެރުމަށްޓަކައި ޔުނިވާސިޓީ އޮފް ޓެކްސަސްގެ ކޮމާޝަލައިޒޭޝަން އޮފީސް ކަމަށްވާ 'ޑިސްކަވަރީ ޓޫ އިމްޕެކްޓް' އާއެކު މަސައްކަތްކުރަމުންދާއިރު، މި އުފެއްދުމުގެ ޕޭޓަންޓަށްވެސް މިހާރު ވަނީ އެދިފައެވެ.