ފަޅަށް އޮތް ގ. ހިޔާ ރޯދީގައި މިދިޔަ ހަފުތާގައި އަލިފާން ރޯވުމުގެ ކުޑައިރުކޮޅެއް ކުރިން, އެ ގެއަށް ވަތް ކަމަށް ތުހުމަތު ކުރެވޭ މީހަކު ހައްޔަރުކޮށްފިއެވެ.
ހިޔާ ރޯދިގޭގައި އަލިފާން ރޯވުމުގެ ކުޑައިރުކޮޅެއް ކުރިން، އެ ގެއަށް މީހަކު ވަންނަ މަންޒަރު ފެންނަ ސީސީޓީވީ ފުޓޭޖްވަނީ ސޯޝަލް މީޑިއާގައި އާންމުވެފައެވެ. އާންމުވެފައިވާ ވީޑިއޯއިން ފެންނަނީ ސައިކަލެއްގައި އައި މީހަކު ސައިކަލު ޕާކު ކުރުމަށްފަހު އެ ގެއަށް ވަންނަ މަންޒަރެވެ. އޭނާ ހުރީ ކަޅު އަވި އައިނެއް އަޅައިގެން، ހުދާއި ކަޅު ކުލައިގެ ގަމީހެއް ލައިގެންނެވެ.
އެ ވީޑިއޯއިން ފެންނަ ގޮތުގައި އެ ގޭގައި އަލިފާން ރޯވީ އެގެއިން އެ މީހާ ނުކުމެގެންދާތާ ކުޑަ އިރުކޮޅެއްގެ ތެރޭގައެވެ. އެ ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.
ހުޅުޖެހުމާއި މުދަލަށް ގެއްލުން ދިނުމުގެ ތުހުމަތުގައި ހައްޔަރު ކުރީ އުމުރުން 29 އަހަރުގެ ދިވެހި ފިރިހެނެކެވެ.
އެ މީހާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް މިއަދުވަނީ ފަސް ދުވަސް ޖަހައިފައެވެ. އޭނާގެ ބަންދުގެ ރިޕޯޓުގައި ވަނީ، އެ މީހާ އެ ގެއަށް ވަދެ ނުކުމެގެންދާ މަންޒަރު ފެންނަ ސީސީޓީވީ ފުޓޭޖާއި އޭގެ ޓައިމްލައިން ލިބިފައިވާ ކަމަށް ފުލުހުންނާ ހަވާލާދީ ބުނެފައެވެ.
ތަންތަނުގައި ނުވަތަ މުދަލުގައި ގަސްތުގައި އަލިފާން ރޯކުރުމަކީ ދިވެހިރާއްޖޭގެ ގާނޫނުލްއުގޫބާތުގެ ދަށުން ކުށެކެވެ. މިއީ މުދަލަށް ގެއްލުންދިނުމުގެ ސީރިއަސް ކުށެއްގެ ގޮތުގައި ބެލެވޭ ކަމެކެވެ.
ދިވެހިރާއްޖޭގެ ގާނޫނުލްއުގޫބާތުގެ 220 ވަނަ މާއްދާގައި ބަޔާންކުރަނީ މުދަލުގައި އަލިފާން ރޯކުރުމުގެ ކުށެއް ކަމަށެވެ. މީހަކު ގަސްތުގައި އެހެން މީހެއްގެ މުދަލެއްގައި، ނުވަތަ އުޅަނދެއްގައި، ނުވަތަ އިމާރާތެއްގައި އަލިފާން ރޯކޮށްފިނަމަ އެއީ ކުށެކެވެ.
މި ކުށުގެ އަދަބު ކަނޑައެޅޭނީ އެކަމުގެ ސަބަބުން ލިބުނު ގެއްލުމުގެ ކުޑަބޮޑުމިނަށާއި، މީހެއްގެ ފުރާނައަށް ނުރައްކާވި މިންވަރަށް ބަލާފައެވެ.
އަލިފާން ރޯކުރި ތަނަކީ މީހުން ދިރިއުޅޭ ތަނެއް ނަމަ، ނުވަތަ އެކަމުގެ ސަބަބުން މީހެއްގެ ފުރާނައަށް ނުރައްކާވެދާނެ ފަދަ ހާލަތެއް އޮތް ނަމަ، މިއީ ޖިނާޔަތުގެ ދެވަނަ ދަރަޖައިގެ ކުށެކެވެ. އެހެން ހާލަތްތަކުގައި، ލިބޭ ގެއްލުމުގެ ކުޑަބޮޑުމިނަށް ބަލައި ޖިނާޔަތުގެ ތިންވަނަ ދަރަޖަ ނުވަތަ ހަތަރު ވަނަ ދަރަޖައިގެ ކުށެއްގެ ގޮތުގައި ބެލެވިދާނެއެވެ.
އަލިފާން ރޯކުރި ތަނަކީ މީހުން ދިރިއުޅޭ ތަނެއް ނަމަ، ނުވަތަ އެކަމުގެ ސަބަބުން މީހެއްގެ ފުރާނައަށް ނުރައްކާވާ ފަދަ ހާލަތެއް މެދުވެރިވެއްޖެނަމަ، ކުށުގެ ދަރަޖަ މަތިވެ، އަދަބު ވެސް ބޮޑުވެއެވެ. މި ކުށް ސާބިތުވުމަށްޓަކައި، އެ މީހަކު އެކަން ކުރީ ގަސްތުގައިކަން ނުވަތަ އެހެން މީހެއްގެ މުދަލަށް ގެއްލުން ދިނުމުގެ ނިޔަތް އޮތްކަން ސާބިތުވާންޖެހެއެވެ.