އީރާނުގެ އިސް ވެރިން ޝަހީދުކޮށްލައިގެން އެ ގައުމުގެ ވެރިކަމުގެ ނިޒާމުގެ ކޮންޓްރޯލް ހޯދަން އެމެރިކާއާއި އިސްރާއީލު ރޭވި ރޭވުން ނާކާމިޔާބު ވުމުން މިހާރު އެ ދެ ގައުމުން މަސައްކަތް ކުރަނީ އީރާނުގެ ދައުލަތް ރޫޅާލުން ނުވަތަ ޑިސްމާންޓްލް ކޮށްލުމަށް ކަމަށް ތަޖުރިބާ ކާރުންނާއި މުހައްލިލުން ވިދާޅުވެއްޖެއެވެ.
އެމެރިކާގެ ކުރީގެ އަސްކަރީ އަދި ޖާސޫސީ މަސްއޫލުވެރިއެއް ކަމަށްވާ ހައިނޫ ކްލިންކް ވިދާޅުވިގޮތުގައި އެމެރިކާއާއި އިސްރާއީލުން އީރާނުގެ ދީނީ މުރުޝިދު އާޔަތުﷲ އަލީ ޚަމަނާއި އާއި އީރާނުގެ އިސް އަސްކަރީ މަސްއޫލުވެރިން ޝަހީދުކޮށްލުމަށްފަހު ވަގުތީގޮތުން އީރާނުގެ ލީޑަޝިޕް އާ ހަވާލުވެ ވަޑައިގެންނެވި ބޭފުޅުންނާ އިޓަލީ މެދުވެރިކޮށް އެމެރިކާއިން ގުޅި ކަމުގައެވެ.
މިގޮތުން ވެނެޒުއެލާގެ ރައީސް ވަގަށް ނެގުމަށްފަހު އެ ގައުމުގެ ވަގުތީ ލީޑަޝިޕް އެމެރިކާއަށް ކިޔަމަން ކުރުވި ގޮތަށް އީރާނުގެ ވަގުތީ ލީޑަޝިޕް އެމެރިކާއަށް ކިޔަމަން ކުރުވައި އެމެރިކާ އެދޭގޮތަށް އެމެރިކާއަށް ބައިއަތު ހިފައިތޯ ބެލުމަށް މަސައްކަތް ކުރިކަމަށާއި ނަމަވެސް އީރާނުގެ ވަގުތީ ލީޑަޝިޕްގެ ބޭފުޅުންވަނީ އެމެރިކާއަށް ބޯލެނބުމަށް ކަނޑައެޅިގެން ދެކޮޅު ހައްދަވާފައެވެ.
އެމެރިކާގެ ރައީސް ޓްރަމްޕް ވަނީ އީރާނުގެ ވަގުތީ ލީޑަޝިޕް އާ ވާހަކަ ދައްކައިގެން އެމެރިކާ އެދޭގޮތަށް އީރާނުގެ ނިއުކްލިޔާ މައްސަލައާއި ބަލިސްޓިލް މިސައިލްގެ މައްސަލަ ހައްލުކުރެވިދާނެ ކަމަށް ވިދާޅުވެ ވާހަކަ ދައްކަވާފައެވެ.
ނަމަވެސް އެއަށްފަހު ޓްރަމްޕް ވަނީ އީރާނުގެ ނިޒާމު ބަދަލުކޮށް ރައްޔިތުންނަށް މިހާރަށް ވުރެ ރަނގަޅު ނިޒާމެއް ހައްގުކަމަށް ވިދާޅު އަނެއްކާވެސް މުޅިން ތަފާތު ގޮތަކަށް ވާހަކަ ދައްކަވާފައެވެ.
ކްލިންކް ވިދާޅުވިގޮތުގައި އީރާނުގެ ދީނީ އައު މުރުޝިދުގެ މަގާމަށް ބޭފުޅަކު އިންތިޚާބު ކުރުމުގެ ޖަލްސާ ބާއްވަން އުޅުނު ތަނަށް އެމެރިކާއާއި އިސްރާއީލުން ބޮންއަޅައި އެތަން ފުނޑާލީ އެބޭފުޅުން މަރާލައި އީރާނުގެ ނިޒާމު އަނެއްކާވެސް ގަނޑުބަޑުކޮށްލުމުގެ ބޭނުމުގައިކަމުގައެވެ.
މިކަން ކާމިޔާބު ނުވީ ދީނީ އައު މުރުޝިދުގެ މަގާމަށް ބޭފުޅަކު އިންތިޚާބު ކުރުމުގެ ކަންތައް ކުރިޔަށް ގެންދިޔައީ ތަޖުރިބާކާރުންގެ ކައުންސިލްގެ މެންބަރުން އެއްތަނަކަށް ހާޒިރު ވުމުގެ ބަދަލުގައި އެބޭފުޅަކު ހުންނަވާ ތަނެއްގައި ހުންނަވައިގެން ވާޗުއަލްކޮށް ކަމަށްވާތީއެވެ.
އީރާނުގެ ދައުލަތް ރޫޅާލަން މަސައްކަތްކުރާ ޔަހޫދީ އަދި ނަސާރާ އިސްވެރިން
"އައުލީޑަރު ޝަހީދުކޮށްލުމަށް ކުރި މަސައްކަތް އެމެރިކާއަށް ވަނީ ނާކާމިޔާބު ވެފައި," އޭނާ ވިދާޅުވިއެވެ.
އީރާނުގެ އައު ދީނީ މުރުޝިދުގެ މަގާމަށް އިންތިޚާބުކޮށްފައިވާ ކަމަށް ބެލެވެނީ ސައްޔިދު މުޖްތަބާ ޚަމަނާއި އެވެ. ނަމަވެސް އީރާނުން ރަސްމީކޮށް އަދި އެކަން ކަށަވަރުކޮށެއް ނުދެއެވެ.
ކްލިންކް ވިދާޅުވިގޮތުގައި އެމެރިކާއާއި އިސްރާއީލުގެ މިހާރުގެ އަމާޒަކީވެސް އީރާނުގެ އައު ލީޑަރު ޝަހީދުކޮށް އައު އަސްކަރީ ކޮމާންޑަރުންނާއި ސިޔާސީ ފަރާތްތައްވެސް ޝަހީދުކޮށްލައި އީރާނުގެ ދައުލަތުގެ މުޅި ނިޒާމު ރޫޅާލައި ޑިސްމާންޓްލް ކޮށްލުމެވެ.
ނަމަވެސް އީރާނުގެ ތެރެއިން ފެންނަނީ މުޅިން އެހެން މަންޒަރެއްކަމަށް އޭނާ ސިފަކުރެއްވިއެވެ. އީރާނުގައި އެތެރޭގައި ތިއްބެވި އިދިކޮޅު ފަރާތްތައްވެސް މިހާރު ތިބީ ގައުމުގެ އެންމެ މަތީ މަސްލަހަތު އިސްކޮށް ގައުމު ބައިބައިކޮށްލުމުގެ ފުރުސަތު ބޭރުގެ ބާރުތަކަށް ނުދިނުމުގެ ރޫހުގައި ކަމަށް އީރާނުން ލިބޭ ޖާސޫސީ މައުލޫމާތުން އެނގޭކަމަށް އޭނާ ވިދާޅުވިއެވެ.
އެމެރިކާއާއި އިސްރާއީލުން އީރާނަށް ހުއްޓުމެއްނެތި ވައިގެ މަގުން ގަދަފަދަ ހަމަލާތައް ދެމުން ގެންދާއިރުވެސް އީރާނުން ގެންދަނީ އިސްރާއީލުގެ އެންމެ އެތެރެއަށާއި އަރަބި ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ވަރުގަދައަށް ރައްދު ހަމަލާތައް ދެމުންނެވެ.
އީރާނަށް ލިބޭ ގެއްލުންތައް ބޮޑުނަމަވެސް އީރާނުން އިސްރާއީލަށް ދޭ ގަދަފަދަ ހަމަލާތަކުން އިސްރާއީލަށް ލިބޭ ގެއްލުންތައްވެސް ކުޑައެއް ނޫނެވެ. އީރާނުގެ ހަމަލާތަކުން ލިބޭ ގެއްލުންތައް ފޮރުވަން އިސްރާއީލު ގިނަ މަސައްކަތްތަކެއް ކުރެއެވެ. ނަމަވެސް ލީކުވެފައިވާ ފޮޓޯތަކުން އިސްރާއީލަށް ލިބެމުންދަނީ އެ ގައުމުގެ މުޅި ހަޔާތުގައިވެސް ނުލިބޭފަދަ ބޮޑެތި ގެއްލުންތަކެއްކަން ވަނީ ހާމަވެފައެވެ.
އިސްރާއީލު ދޮޅު ހާހަށްވުރެ ގިނަ މީހުން ޒަޚަމްވެ ސަތޭކައަށް ވުރެގިނަ މީހުން މަރުވެފައިވާ ކަމަށާއި 300 އަށް ވުރެގިނަ އިމާރާތް އީރާނުގެ ހަމަލާތަކުގައި ހަލާކުކޮށްލާފައިވާކަމަށް ރިޕޯޓްތައް ބުނެއެވެ.
އިސްރާއީލަކީ އަބަދުވެސް އިސްރާއީލުގެ އެތެރެއަށް ގެއްލުން ނުވާގޮތަށް އަދި ހަމައެކަނި އިސްރާއީލުގެ ދުޝްމަނުންނަށް ގެއްލުން ލިބޭގޮތަށް ހަނގުރާމަ ކުރުމުގެ ސްޓްރެޓެޖީއެއް ގެންގުޅޭ ގައުމެވެ. ނަމަވެސް އީރާނާ ޖެހުމުން މިހާލަތު ވަނީ ބަދަލުވެފައެވެ.
އީރާނުގެ ރައްދު ހަމަލާތަކުގައި އިސްރާއީލުގެ ވެރިރަށް ޓެލްއަވީވް އާއި ހައިފާ އަދި ބިއުރުއްސަބުއު ފަދަ ސިޓީތަކުގެ ބައެއް އަވަށްތައް އިމާރާތްތަކާއެކު އެއްކޮށް ބިމާހަމަކޮށްލާފައިވާ މަންޒަރު މިހާރު ވަނީ ހާމަވެފައެވެ.
މިހާބޮޑެތި ގެއްލުންތައް ލިބޭ ހާލަތުގައި މާގިނަދުވަހު ހަނގުރާމަ ކުރުމަކީ އިސްރާއީލަށް ކެތްކުރެވޭނެ ކަމެއްނޫނެވެ. އެހެންވެ އެމެރިކާގެ އެހީގައި އިސްރާއީލު މިހާރު މަސައްކަތް ކުރާ ސްޓްރެޓެޖީ އަކީ އީރާނުގެ ދައުލަތް ރޫޅާލުން ނުވަތަ ޑިސްމާންޓްލް ކޮށްލުމަށް ކަމަށް ހައިނޫ ކްލިންކް އާއި މިމައުޟޫއުގައި އަލްޖަޒީރާގައި ވާހަކަ ދެއްކެވި ބައިނަލްއަގްވާމީ އެހެން މުހައްލިލަކުވެސް ވިދާޅުވިއެވެ.
ސަބަބަކީ އީރާން ގެ ނިޒާމު ނުރޫޅި ދެމިއޮވެއްޖެނަމަ މަގްސަދު ހާސިލްނުވެ ހަނގުރާމަ ހުއްޓާލަން އެމެރިކާގެ ކިބައިން އިސްރާއީލު އެދެން މާގިނަދުވަސް ނުނަގަނެތީކަމަށް އެބޭފުޅުން ދެކެވަޑައިގަންނަވައެވެ.
އެމެރިކާއާއި އިސްރާއީލުގެ އުދުވާނަށް ރައްދު ދިނުމުގެ ގޮތުން އީރާން ގެންދަނީ އިސްރާއީލަށް ގަދަފަދަ ހަމަލާތައް ދިނުމުގެ އިތުރުން އެމެރިކާގެ އަސްކަރީ ބޭސްތަކާއި މަރުކަޒުތައްހުރި މެދުއިރުމަތީގެ އިތުރު 10 ގައުމެއްގައިވާ އެމެރިކާގެ ތަންތަނަށް ހަމަލާތައްދީ އަމިއްލަ ނަފްސު ދިފާއު ކުރަމުންނެވެ.
އެއީ ގަލްފުގެ ހަ ގައުމާއި އިރާގު، ސޫރިޔާ އުރުދުން އަދި ސައިފްރަސް މި ގައުމުތަކެވެ. މި ގައުމުތަކުގައި ދާއިމީ އަދި ވަގުތީ އަސްކަރީ ބޭސްތަކާއި މަރުކަޒުތަކުގެ ގޮތުގައި އެމެރިކާގެ 15 މަރުކަޒެއް ވެއެވެ. މިހުރިހާ މަރުކަޒުތަކަކަށްވެސް އީރާން ވަނީ ރައްދު ހަމަލާތައް ދީފައެވެ.
ޔޫއޭއީ އާއި ގަތަރު އަދި ބަހްރައިން އިރާގު އަދި ކުވައިތު ފަދަ ގައުމުތަކުގައިވާ އެމެރިކާގެ ބޭސްތަކަށްވަނީ ހާހުން ގުނާލެވޭ ވަރަށް ހަމަލާތައް ދީފައެވެ. އެމެރިކާއާއި އިސްރާއީލުގެ ހަމަލާތަކުގައި އިރާނުގެ 9 ހޮސްޕިޓަލަކާއި އަސްކަރީ އެތަށް މަރުކަޒެއް ހަލާކުކޮށްލާފައިވާއިރު އިރާނުގެ 790 އަށް ވުރެގިނަމީހުން ވަނީ ޝަހީދުކޮށްލާފައެވެ.