ހޮރްމުޒް ކަނޑުއޮޅި މެދުވެރިކޮށް ބޭނުންނަމަ ތެޔޮ ޓޭންކަރުތަކަށް ހުރަސް ކުރޭވޭނެ ކަމަށާއި ތެލާއި ގޭހުގެ ސަޕްލައިއަށް އީރާނުން ހުރަސްއަޅާނަމަ ކަނޑުއޮޅިން ދަތުރުކުރާ އުޅަނދުތަަކަށް އެމެރިކާއިން ހިމާޔަތް ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕަ ވިދާޅުވެއްޖެއެވެ.
އެގޮތުން ހުރަސްކުރާ އުޅަނދުތަކަށް އިންޝުއަރެންސް ގެރެންޓީއެއް ދޭނެ ކަމަށް ވެސް ޓްރަމްޕް ވިދާޅުވިއެވެ.
އެމަނިކުފާނުގެ ޓްރޫތް ސޯޝަލް ޕްލެޓްފޯމްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ އެކަށީގެންވާ އަގެއްގައި ޕޮލިޓިކަލް ރިސްކު އެޝުއަރެންސް އަދި އިންޝުއަރެންސް ގެރެންޓީ ދިނުމަށް އެމެރިކާގެ އިންޓަނޭޝަނަލް ޑިވެލޮޕްމަންޓް ފައިނޭންސް ކޯޕަރޭޝަނަށް އަންގަވާފައިވާނެކަމަށެވެ.
"މިވަގުތުން ފެށިގެން އަޅުގަނޑު އެމެރިކާގެ ޑިވެލޮޕްމަންޓް ފައިނޭންސް ކޯޕަރޭޝަނަށް އަންގާފައި މިވަނީ ގަލްފުން ދަތުރުކުރާ ހުރިހާ ކަނޑުގެ ވިޔަފާރި އުޅަނދުތަކެއްގެ މާލީ ރައްކާތެރިކަން ކަށަވަރުކުރުމަށްޓަކައި ވަރަށް ހެޔޮ އަގެއްގައި ޕޮލިޓިކަލް ރިސްކް އިންޝުއަރެންސް އާއި ގެރެންޓީތައް ފޯރުކޮށްދިނުމަށް," ޓްރަމްޕް ލިޔުއްވާފައިވެއެވެ.
އެމަނިކުފާނު އިތުރަށް ވިދާޅުވީ އެ ކަވަރޭޖް ހުރިހާ ޝިޕިން ލައިންތަކަށް ވެސް ލިބޭނެ ކަމަށެވެ.
"ބޭނުންވެއްޖެ ނަމަ އެމެރިކާގެ ނޭވީން ސްޓްރެއިޓް އޮފް ހޮރްމުޒް ތެރެއިން ޓޭންކަރުތައް އެސްކޯޓް ކުރަން ފަށާނެ، ވީހާވެސް އަވަހަކަށް. ކޮންމެ ގޮތެއް ވިޔަސް އެމެރިކާއިން ދުނިޔެއަށް ހަކަތަ ހިލޭ ފޯރުކޮށްދިނުން ކަށަވަރު ކުރާނެ،" ޓްރަމްޕް ވިދާޅުވިއެވެ.
ޓްރަމްޕް އެގޮތަށް ވިދާޅުވެފައި ވަނީ ދުނިޔޭގެ ހަކަތަ ފޯރުކޮށްދިނުމަށް މުހިއްމު މަގެއް ކަމަށްވާ އެ ކަނޑުއޮޅިން ދަތުރުކުރާ އުޅަނދުތަކަށް އަމާޒުކޮށް ހަމަލާދޭނެ ކަމުގެ އިންޒާރު ދީފައި ވަނިކޮށެވެ.
އެ ކަނޑުއޮޅީގެ ފުރިހަމަ ކޮންޓްރޯލު ހޯދާފައިވާ ކަމަށްވެސް އީރާނުން މިއަދު ވަނީ ބުނެފައެވެ.
"މިވަގުތު ހޮރްމުޒް ކަނޑިއޮޅީގެ ފުރިހަމަ ކޮންޓްރޯލް އޮތީ އީރާންގެ ކަނޑުގެ ސިފައިންގެ ބާރުގެ ދަށުގައި،" ސިފައިންގެ ނޭވީ އޮފިޝަލެއް ކަމަށްވާ މުހައްމަދު އަކްބަރްޒާދީއާ ހަވާލާދީ ފާސް ނިއުސް އެޖެންސީން ބުނެފައިވެއެވެ.
ހޮރްމުޒް ކަނޑުއޮޅި އަކީ ގަލްފާއި އަރަބި ކަނޑާ ގުޅުވައިދޭ ކޯރިޑޯއެކެވެ. މިއީ ދުނިޔޭގެ ތެޔޮ ޝިޕްމަންޓްތަކަށް އެންމެ މުހިންމު އެއް މަގެވެ. އެ ކަނޑުއޮޅިން ތެލުގެ ގާތްގަނޑަކަށް ފަސްބައިކުޅަ އެއްބައި ތެޔޮ އުފުލައެވެ.