އެމެރިކާއާއި އިޒްރޭލުން ގުޅިގެން އީރާނަށް ދެމުންދާ ވަރުގަދަ ހަމަލާތަކާއި، އޭގެ ރައްދުގައި އީރާނުން ދެމުންދާ ހަމަލާތައް ފަސްވަނަ ދުވަހަކަށް ދެމިގެންގޮސް، މުޅި މެދުއިރުމައްޗަށް ހަނގުރާމަ ފުޅާވުމުގެ ބިރު ބޮޑުވެއްޖެއެވެ.
މިދިޔަ ހޮނިހިރު ދުވަހު އެމެރިކާއާއި އިޒްރޭލުން ފެށި މި ހަނގުރާމައިގައި އީރާނުގެ ރޫހާނީ ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލާފައިވާއިރު، އީރާނުން ދަނީ މެދުކެނޑުމެއްނެތި އިޒްރޭލަށާއި ސަރަހައްދުގެ އެހެން ގައުމުތަކަށް މިސައިލާއި ޑްރޯން ހަމަލާތައް ފޮނުވަމުންނެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި، މި ހަނގުރާމައިގެ އަސަރު މިހާރު ވަނީ, ޓޫރިޒަމް ވަރަށް ފުޅާކޮށް ހިންގަމުން އައި އެ ސަރަހައްދުގެ ގިނަ ގައުމުތަކަކަށް ފޯރާފައެވެ.
އީރާނުގެ ހަމަލާތައް މައިގަނޑު ގޮތެއްގައި އަމާޒުކުރަމުންދަނީ އިޒްރޭލުގެ ވެރިރަށް ތެލްއަވީވްގެ ސަރަހައްދުތަކަށާއި، ގަލްފުގެ ބައެއް ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށެވެ. އިޒްރޭލުގެ ރަމަތް ގަން ސަރަހައްދަށް އީރާނުން ފޮނުވާލި ހަމަލާތަކެއްގައި ގިނަ އަދަދެއްގެ އުޅަނދުތަކަށް ވަނީ ބޮޑެތި ގެއްލުންތަކެއް ލިބިފައެވެ.
މީގެ އިތުރުން، އީރާނުގެ އިންގިލާބީ ގާޑުން (އައިއާރްޖީސީ) އިން ވަނީ ދުނިޔޭގެ ތެލުގެ ވިޔަފާރީގެ މުހިންމު މަގެއް ކަމަށްވާ ހުރްމުޒް ކަނޑުއޮޅީގެ ފުރިހަމަ ކޮންޓްރޯލް ނަގާފައިވާކަމަށް އިއުލާނުކޮށްފައެވެ. އަދި އިންޑިއާ ކަނޑުގައި އޮތް އެމެރިކާގެ މަނަވަރަކަށްވެސް މިސައިލް ހަމަލާއެއް ދީފައިވާކަމަށް އެ ފަރާތުން ބުނެފައިވެއެވެ.
އަނެއްކޮޅުން، އިޒްރޭލުން ދަނީ އީރާނުގެ އިތުރުން ލުބްނާނަށްވެސް ވަރުގަދަ ހަމަލާތަކެއް ދެމުންނެވެ. ލުބްނާނުގެ ވެރިރަށް ބެއިރޫތުގައި ހުރި ހޮޓަލަކަށާއި، އިރުމަތީ ލުބްނާނުގެ ބާލްބެކްގައި ހުރި މީހުން ދިރިއުޅޭ އިމާރާތަކަށް އިޒްރޭލުން ދިން ހަމަލާތަކުގައި ގިނަ ބަޔަކު މަރުވެފައިވާކަމަށް ރިޕޯޓުތައް ބުނެއެވެ.
އީރާނުގެ ދިފާއީ ވުޒާރާއިން ބުނެފައިވަނީ، އެމެރިކާއާއި އިޒްރޭލާ ދެކޮޅަށް ދިގުލައިދާނެ ހަނގުރާމައަކަށް އެ ގައުމު އޮތީ ތައްޔާރަށް ކަމަށާއި، އެ ގައުމުގެ އެންމެ ޒަމާނީ ހަތިޔާރުތައް އަދި ބޭނުން ނުކުރާ ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުގެ ނިއުކްލިއާ އަދި އަސްކަރީ ގާބިލުކަން ނައްތާލުމަށް "އޮޕަރޭޝަން އެޕިކް ފިއުރީ" ގެ ނަމުގައި ހާއްސަ އަސްކަރީ ހަރަކާތެއް ފައްޓަވާފައެވެ.
މި ހަނގުރާމައިގެ ސަބަބުން މުޅި ދުނިޔޭގެ އިގުތިސާދަށާއި ސަލާމަތަށް ވަނީ ބޮޑެތި ނުރައްކާތަކަކާ ކުރިމަތިވެފައެވެ. ހަނގުރާމައިގެ އަސަރުކޮށް، ދެކުނު ކޮރެއާގެ ހިއްސާގެ ބާޒާރު ވަރަށް ބޮޑަށް ވެއްޓިފައިވާއިރު، ދުނިޔޭގެ ބާޒާރުގައި ތެލުގެ އަގު ދަނީ އުފުލެމުންނެވެ. ރަޝިއާއާއި ޗައިނާއިން ވަނީ އެމެރިކާއާއި އިޒްރޭލުން އީރާނަށް ދެމުންދާ ހަމަލާތައް ކުށްވެރިކޮށް، ޑިޕްލޮމެޓިކް ހައްލެއް ހޯދުމަށް ގޮވާލާފައެވެ.
މީގެ އިތުރުން، ފަރަންސޭސިވިލާތުގެ ރައީސް އެމަނުއެލް މެކްރޯން ވަނީ އެ ގައުމުގެ އަސްކަރީ މަނަވަރު 'ޗާލްސް ޑި ގޯލް' މެޑިޓަރޭނިއަން ކަނޑަށް ފޮނުއްވުމަށް އަމުރުކުރައްވާފައެވެ. ގަތަރުން ވަނީ އެ ގައުމުގައި ހަރަކާތްތެރިވަމުންދިޔަ އީރާނުގެ އައިއާރްޖީސީގެ ސިއްރު ސެލްތަކެއް ހައްޔަރުކޮށްފައިވާކަން އިއުލާނުކޮށްފައެވެ. މިއާއެކު ގަލްފުގެ ގައުމުތަކުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަކޮށްފައެވެ.
ގަލްފުގެ ގައުމުތަކުންވެސް ދަނީ މި ހަނގުރާމަ އިތުރަށް ފުޅާވެއްޖެނަމަ މެދުއިރުމައްޗަށް އޭގެ ނޭދެވޭ އަސަރު ވަރަށް ބޮޑަށް ކުރާނެކަމުގެ އިންޒާރު ދެމުންނެވެ. ޚާއްސަކޮށް ހުރްމުޒް ކަނޑުއޮޅި ބަންދުވުމުގެ ސަބަބުން ބައިނަލްއަޤްވާމީ ވިޔަފާރިއަށާއި ތެލުގެ ސަޕްލައިއަށް ބޮޑެތި ހުރަސްތަކެއް ކުރިމަތިވާނެކަމަށް މާހިރުން ލަފާކުރެއެވެ.
މި ހަމަނުޖެހުންތަކުގެ ސަބަބުން މިހާތަނަށް އެތައް ސަތޭކަ ބަޔަކު މަރުވެ، އެތައް ހާސް ބަޔަކަށް ވަނީ އެކިވަރުގެ އަނިޔާތައް ލިބިފައެވެ.