ދައުލަތަށް މި އަހަރު ހިލޭ އެހީގެ ގޮތުގައި ލިބުނު މިންވަރު، މިދިޔަ އަހަރުގެ މި މުއްދަތަށް ވުރެ ދެގުނައަށްވުރެ އިތުރުވެ 495.9 މިލިއަން ރުފިޔާއަށް އަރައިފިއެވެ.
ފިނޭންސް މިނިސްޓްރީން އާންމުކޮށްފައިވާ، މިދިޔަ މަހުގެ 24ގެ ނިޔަލަށް ދައުލަތަށް ލިބިފައިވާ އާމްދަނީގެ ތަފާސްހިސާބުން ދައްކާ ގޮތުގައި، މި އަހަރު ރާއްޖެއަށް ހިލޭ އެހީގެ ގޮތުގައި ލިބޭނެ ކަމަށް އަންދާޒާކޮށްފައިވަނީ 373.6 މިލިއަން ރުފިޔާއެވެ. ނަމަވެސް، އެ އަދަދަށްވުރެ އިތުރަށް ހިލޭ އެހީ ވަނީ ލިބިފައެވެ.
މިނިސްޓްރީގެ ރިޕޯޓުން ދައްކާ ގޮތުގައި، މިދިޔަ މަހުގެ 24ގެ ނިޔަލަށް ދައުލަތަށް ވަނީ ހިލޭ އެހީއަށް 495.9 މިލިއަން ރުފިޔާ ލިބިފައެވެ. އެއީ ބަޖެޓުގައި އަންދާޒާކުރި ވަރަށްވުރެ 122.3 މިލިއަން ރުފިޔާ އިތުރު އަދަދެކެވެ. މިދިޔަ އަހަރުގެ މި މުއްދަތުގައި ލިބިފައިވަނީ 237.3 މިލިއަން ރުފިޔާ ކަމުން، މި އަހަރުގެ އަދަދަކީ އެއާ އަޅައިބަލާއިރު 258 މިލިއަން ރުފިޔާ އިތުރު އަދަދެކެވެ.
ފިނޭންސް މިނިސްޓްރީން ވަނީ، މި އަހަރު ދައުލަތަށް އާމްދަނީ އާއި ހިލޭ އެހީގެ ގޮތުގައި 30.2 ބިލިއަން ރުފިޔާ ލިބިފައިވާއިރު، އެއީ މިދިޔަ އަހަރުގެ އެ މުއްދަތުގައި ލިބުނު 28.8 ބިލިއަން ރުފިޔާއާ އަޅާބަލާއިރު 5.1 އިންސައްތައިގެ ކުރިއެރުމެއްކަން ފާހަގަކޮށްފައެވެ. އޭގެ ތެރެއިން ޓެކުހުގެ ގޮތުގައި ލިބުނު އާމްދަނީ ވަނީ 21.366 ބިލިއަން ރުފިޔާއިން 23.388 ބިލިއަން ރުފިޔާއަށް އިތުރުވެފައެވެ.
ދައުލަތަށް ލިބޭ އާމްދަނީގެ ބޮޑު ބަޔެއް ޓެކްސްތައް ހިއްސާކުރާއިރު، ޓީޖީއެސްޓީގެ ގޮތުގައި މިހާތަނަށް 7.9 ބިލިއަން ރުފިޔާ ވަނީ ލިބިފައެވެ. އެއީ، މިދިޔަ އަހަރުގެ އެ މުއްދަތުގައި ލިބުނު 7.7 ބިލިއަން ރުފިޔާއާ އަޅައިބަލާއިރު 2.7 އިންސައްތައިގެ އިތުރުވުމެކެވެ.
މީގެ އިތުރުން ރިސޯޓް ކުލީގެ ގޮތުގައި ލިބުނު އާމްދަނީ 1.245 ބިލިއަން ރުފިޔާއިން 1.267 ބިލިއަން ރުފިޔާއަށް އުފުލި، 1.7 އިންސައްތައިގެ ކުރިއެރުމެއް ލިބިފައިވާ ކަމަށް ވެސް މިނިސްޓްރީން ބުންޏެވެ.
އެ ތަފާސްހިސާބުން ދައްކާ ގޮތުގައި، ދައުލަތުގެ ޖުމުލަ ޚަރަދު ހުރީ 33.6 ބިލިއަން ރުފިޔާގައެވެ. އެއީ މިދިޔަ އަހަރުގެ އެ މުއްދަތުގައި ޚަރަދުކުރި 28.3 ބިލިއަން ރުފިޔާއާ އަޅާބަލާއިރު 18.8 އިންސައްތަ އިތުރު އަދަދެކެވެ.
ސަރުކާރުގެ ރިކަރަންޓް ޚަރަދުތައް 24.321 ބިލިއަން ރުފިޔާއިން 28.897 ބިލިއަން ރުފިޔާއަށް އިތުރުވެފައިވާއިރު، އާސަންދައަށް ކުރި ޚަރަދު 23.3 އިންސައްތަ އިތުރުވެ 1.748 ބިލިއަން ރުފިޔާއަށް ވަނީ އަރާފައެވެ.
ހިލޭ އެހީގެ ގޮތުގައި ފައިސާ ހޯދުމަށް ދައުލަތުން ގިނަ ފަހަރު ބަޖެޓުގައި ޖަހަނީ ބިލިއަނުން މަތީގެ އަދަދުތަކެވެ. ނަމަވެސް އެ އަދަދަކަށް ހިލޭ އެހީ ނުލިބެއެވެ. އެގޮތުން 2023ގައި 2.5 ބިލިއަން ރުފިޔާގެ ހިލޭ އެހީ ލިބޭނެ ކަމަށް އަންދާޒާކުރި ނަމަވެސް، ލިބުނީ 515 މިލިއަން ރުފިޔާއެވެ. ޖެހިގެން އައި އަހަރު، 1.5 ބިލިއަން ރުފިޔާ ލިބޭނެ ކަމަށް ލަފާކުރި ނަމަވެސް ލިބުނީ 660 މިލިއަން ރުފިޔާއެވެ. އަދި މިދިޔަ އަހަރު ހިލޭ އެހީއަށް 2.6 ބިލިއަން ލިބޭނެ ކަމަށް ބަޖެޓުގައި ޖެހި ނަމަވެސް، ލިބުނީ 415 މިލިއަން ރުފިޔާއެވެ.
އެއަށްފަހު، މި އަހަރު ލިބޭނެ ކަމަށް އަންދާޒާކުރި ހިލޭ އެހީއަކީ، އާންމުކޮށް އެހެން އަހަރުތަކުގައި އަންދާޒާ ކުރާ އަދަދަށްވުރެ ވަރަށް ބޮޑަށް ދަށް އަދަދެކެެވެ.