މާލޭގައި މިހާރު އޮތް ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަޝްރޫއަކީ ރާއްޖޭގެ އުފެއްދުންތެރިކަން އިތުރުކުރުމަށްޓަކައި މިހާރު ސަރުކާރުން ކުރިއަށް ގެންދާ އެންމެ މުހިންމު މަޝްރޫއުގެ ގޮތުގައި ރައީސް ޑރ. މުޙައްމަދު މުޢިއްޒު މިއަދު ސިފަކުރައްވައިފިއެވެ.
ރައީސާއި ހައުސިން މިނިސްޓަރު ޑރ. ޢަބްދުﷲ މުއްޠަލިބާއި އިކޮނޮމިކް މިނިސްޓަރު މުޙައްމަދު ސަޢީދުގެ އިތުރުން އެމްޕީއެލާއި ކަމާބެހޭ ބައެއް އިދާރާތަކާއި ތިލަފުށީ ބަނދަރުގެ ބައިނަލްއަގުވާމީ ކީވޯލްގެ މަސައްކަތްކުރާ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)ގެ ފަރާތުން ބައެއް ބޭފުޅުން ވަނީ އެ މަޝްރޫއު ހިނގަމުންދާ ގޮތް ބައްލަވައިލައްވައިފައެވެ.
އެއަށްފަހު އެ ސަރަހައްދުގައި ތިބި ނޫސްވެރިންނާ ބައްދަލުކުރައްވައި ރައީސް ވިދާޅުވީ މާލޭގެ ވިޔަފާރި ބަނދަރު ތިލަފުށްޓަށް ބަދަލުކުރުމުގެ މަޝްރޫއަކީ މި ސަރުކާރުން އެންމެ އިސްކަމެއްދީގެން ކުރިއަށް ގެންދާ އެއް މަޝްރޫއު ކަމަށެވެ.
މާލޭގައި އޮންނަ ބަނދަރަކީ ރާއްޖޭގެ އިގުތިޞާދު ކުރިއަރައިގެންދާ މިންވަރަށް އެކަށީގެންވާ ޖާގައެއް އޮތް ތަނެއް ނޫން ކަމަށް ރައީސް ވިދާޅުވިއެވެ.
ރައީސް ވިޔަފާރި ބަނދަރުގެ މަޝްރޫއު ބައްލަވާލައްވަނީ --- ފޮޓޯ: ރައީސް އޮފީސްއެ މަނިކުފާނު ވިދާޅުވިގޮތުގައި، ތިލަފުށްޓަށް ވިޔަފާރި ބަނދަރު އެއްކޮށް ބަދަލުކޮށް ނިމޭއިރު މާލޭގައި މިހާރު އޮތް ބަނދަރަށް ވުރެ އެ ތަން ހަތަރު ގުނަ ބޮޑުވާނެއެވެ. އޭރުން ރާއްޖޭގެ އިގުތިޞާދަށް ބޮޑު ދޮރެއް ހުޅުވޭނެ ކަމަށް ވެސް އެ މަނިކުފާނު ވިދާޅުވިއެވެ.
"ހަގީގަތުގައި މިހާރު ރާއްޖޭގެ އިގުތިޞާދު ފުޅާކުރުމަށްޓަކައި އަޅުގަނޑުމެންގެ އުފެއްދުންތެރިކަން މައްޗަށް ގެންދިއުމުގައި އަޅުގަނޑުމެންގެ ވިޔަފާރިތައް ކުރިއަށް ގެންދިއުމުގައި ހުރިހާ ގޮތަކުން ބަލާއިރުގައި ވެސް އެންމެ މުހިންމު އެއް މަޝްރޫއު،" ރައީސް ވިދާޅުވިއެވެ.
ތިލަފުށީގައި ތަރައްގީކުރާ އައު ބަނދަރަކީ ގާތްގަނޑަކަށް 250 މިލިއަން ޑޮލަރުގެ މަޝްރޫއެކެވެ. މި މަޝްރޫއުގެ ފުރަތަމަ ފިޔަވަހީގެ މަސައްކަތް މި އަހަރުގެ ފެބްރުއަރީ މަހު ވަނީ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާ ހަވާލުކޮށްފައެވެ. މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މައުލޫމާތު ދީފައިވާ ގޮތުގައި، 20 ހެކްޓަރުގެ ބިމެއްގައި ތަރައްގީކުރާ މި ބަނދަރު ނިމުމުން، އަހަރަކު ތިން ލައްކަ ޓީއީޔޫ (ކޮންޓެއިނަރު) ހެންޑްލް ކުރުމުގެ ގާބިލުކަން ލިބޭނެއެވެ. މިއީ މިދިޔަ އަހަރު މާލޭގެ ބަނދަރުން ހެންޑްލްކުރި 135،000 ޓީއީޔޫއާ އަޅައި ބަލާއިރު ދެގުނައަށް ވުރެ ބޮޑު އަދަދެކެވެ. ސަރުކާރުން އަމާޒު ހިފާފައިވަނީ އަންނަ އަހަރުގެ ނޮވެންބަރު 11ގެ ނިޔަލަށް މާލޭގެ ވިޔަފާރި ބަނދަރު އެއްކޮށް ތިލަފުއްޓަށް ބަދަލުކުރުމަށެވެ.
މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަކީ، މިހާރު މާލޭގެ ބަނދަރަށް ދިމާވެފައިވާ ޖާގައިގެ ދަތިކަމާއި ތޮއްޖެހުމުގެ މައްސަލައަށް އޮތް ދާއިމީ ހައްލު ކަމަށް ކަމާބެހޭ ފަރާތްތަކުން ފާހަގަކުރެއެވެ. އެންމެ ފަސް ހެކްޓަރުގެ ބިމެއްގައި 1980 ގެ އަހަރުތަކުގައި ތަރައްގީކޮށްފައިވާ މާލޭގެ ބަނދަރު ތޮއްޖެހުމުގެ ސަބަބުން، މުދާ ކްލިއާ ކުރުމަށް ބައެއް ފަހަރު ދެ ހަފުތާއަށް ވުރެ ގިނަ ދުވަސް ނަގައެވެ. މިކަމުގެ ސަބަބުން ޑެމަރޭޖް ޗާޖުގެ ގޮތުގައި ވިޔަފާރިވެރިންނަށް ބޮޑެތި ގެއްލުންތަކާ ކުރިމަތިލާން ޖެހި، މުދަލުގެ އަގު އުފުލުމަށް މަގުފަހިވާ ކަމަށް ވިޔަފާރިވެރިންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.
މި ދަތިތަކަށް ވަގުތީ ހައްލެއް ހޯދައިދިނުމުގެ ގޮތުން، މުދާ ކްލިއާ ކުރުމުގެ ހިދުމަތް 24 ގަޑިއިރަށް ބަދަލުކޮށް، ޑެމަރޭޖް ފްރީ މުއްދަތު 80 ގަޑިއިރުން 124 ގަޑިއިރަށް މި ސަރުކާރުން ވަނީ އިތުރުކޮށްދީފައެވެ. މި އަހަރުގެ ކުރީކޮޅު ބަނދަރު ތޮއްޖެހުމުގެ ސަބަބުން ރާއްޖެއަށް މުދާ ހިފައިގެން އައި 4،200 އެއްހާ ކޮންޓެއިނަރު ސްރީލަންކާގެ ކޮލަމްބޯ ބަނދަރުގައި ތާށިވެފައި އޮތްކަންވެސް ފާހަގަކޮށްލެވެއެވެ. އާ ބަނދަރު ހުޅުވުމާއެކު، މުދާ ކްލިއާ ކުރުމަށް މިހާރު ނަގާ ހަތް ދުވަހުގެ މުއްދަތު 48 ގަޑިއިރަށް ކުޑަކުރެވޭނެ ކަމަށް ސަރުކާރުން ވަނީ އިއުލާންކޮށްފައެވެ.