މިރޭ ފަށާ އިދިކޮޅު މައި ޕާޓީ އެމްޑީޕީގެ ކޮންގްރެސްގައި އެ ޕާޓީގެ ރައީސާއި ނައިބު ރައީސްގެ މަގާމު އުވާލަން އުޅޭކަން އެނގިއްޖެއެވެ.
މިރެއިން ފެށިގެން ހޮނިހިރު ދުވަހުގެ ނިޔަލަށް ބާއްވާ މި ކޮންގްރެސްއަށް މި އިސްލާހު ހުށަހަޅާނެކަން 'ސަން' އަށް ވަނީ އެނގިފައެވެ.
އާ އަސާސީ ގަވާއިދުގައިވާ ގޮތުން އެމްޑީޕީގެ އެންމެ އިސް ފަރާތަކީ ޗެއާޕާސަންއެވެ. އަދި ދެން އެންމެ އިސްކޮށް ތިއްބަވާނީ ޗެއާޕާސަންގެ ނައިބުން ކަމަށްވާއިރު، ޕާޓީ ހިންގުމުގެ މުޅި މަސްއޫލިއްޔަތު އޮންނާނީ އެ ބޭފުޅުންގެ އަތްމަތީގައެވެ.
އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ތައްޔާރުވަމުންދާއިރު، އެ ދެ މަގާމުވެސް މިވަގުތު އޮތީ ހުސްކޮށެވެ. އެ މަގާމުތައް ހުސްވީ އިންތިހާބަކާ ނުލައި އެމްޑީޕީގެ ރައީސްކަމަށް އިންތިހާބުވެވަޑައިގެންނެވި ކުރީގެ ފޮރިން މިނިސްޓަރު އަބްދުﷲ ޝާހިދު، އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް އެ މަގާމުން އިސްތިއުފާ ދެއްވުމުންނެވެ. އަދި އެ ކެމްޕެއިންގައި އަމަލީގޮތުން ބައިވެރިވެވަޑައިގަތުމަށްޓަކައި، ނައިބު ރައީސްގެ މަގާމުގައި ހުންނެވި ހިސާން ހުސެއިން ވެސް ވަނީ އިސްތިއުފާ ދެއްވާފައެވެ.
ފާހަގަކޮށްލެވޭ ގޮތުގައި އިދިކޮޅު އެންމެ ބޮޑު ޕާޓީގެ ރައީސާއި ނައިބު ރައީސްގެ މަގާމު އުވާލުމަކީ، އެ ޕާޓީގެ ޗެއާޕާސަން ފައްޔާޒު އިސްމާއިލް ކުރިން ވެސް ފާޅުކުރައްވާފައިވާ ޚިޔާލެކެވެ.
އެމްޑީޕީން މީގެކުރިން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު ވިދާޅުވީ، އެ ޕާޓީގެ ކޮންގްރެސްއަށް ވަރަށް ބޮޑު ތަރުހީބެއް ލިބެމުން އަންނަ ކަމަށާއި މިހާތަނަށް 980 އަށް ވުރެ ގިނަ ބައިވެރިން ރަޖިސްޓްރީވެފައިވާ ކަމަށެވެ.
އެމްޑީޕީއަކީ މިވަގުތު ރާއްޖޭގައި އޮތް ދެވަނައަށް އެންމެ މެންބަރުން ގިނަ ޕާޓީއެވެ. އެގޮތުން މިހާތަނަށް އެ ޕާޓީގައި 55،399 މެންބަރުން ތިބިކަން އިލެކްޝަންސް ކޮމިޝަންގެ ދަފްތަރުން އެނގެއެވެ.