މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މިއަދު ތައާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމް (އެމް.ޖީ.އައި.އެސް) ގެ ސަބަބުން، އަމިއްލަ ޕްރޮޕަޓީ މެނޭޖްމަންޓް ސިސްޓަމެއް ނެތް ގެސްޓްހައުސްތަކާއި ވިޔަފާރިތަކަށް ފަތުރުވެރިންގެ މަޢުލޫމާތު ބެލެހެއްޓުމަށް ބޮޑު އެހީއަކަށް ވާނެ ކަމަށް ފިނޭންސް މިނިސްޓަރު ޙަސަން ޒަރީރު ވިދާޅުވެއްޖެއެވެ.
މި ސިސްޓަމް ތައާރަފުކުރުމަށް ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުން މިނިސްޓަރު ޒަރީރު ވިދާޅުވީ، އެމް.ޖީ.އައި.އެސް އަކީ ރާއްޖެއަށް ޒިޔާރަތްކުރާ ފަތުރުވެރިންގެ މަޢުލޫމާތު އެއްވިއުގައަކުން ގުޅާލައި، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެއް ކަމަށެވެ.
މިނިސްޓަރު ވިދާޅުވީ ފަތުރުވެރިކަމަކީ ރާއްޖޭގެ އިގްތިސާދުގެ މައި ސިނާއަތަށް ވުމާއެކު، މި ދާއިރާގެ މަޢުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރާ މަޢުލޫމާތަކަށް ވާތީ، މި ސިސްޓަމްގެ ސަބަބުން ކަމާބެހޭ މުއައްސަސާތަކުގެ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށެވެ.
ވަޒީރު އިތުރަށް ވިދާޅުވީ، މިއީ ޒަމާނީ ޓެކްނޮލޮޖީގެ އެހީގައި ދައުލަތް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ "މޯލްޑިވްސް 2.0" ގެ ޑިޖިޓަލް ތަސައްވުރުގެ ދަށުންނާއި، މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިން އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް ލިބުނު މުހިންމު ކުރިއެރުމެއް ކަމަށެވެ.
https://x.com/MIRAmaldives/status/2105562062533624262
މީގެއިތުރުން މީރާއަކީ އެފޯޓްލެސް ޓެކްސް ނިޒާމެއް ގާއިމުކުރުމަށާއި ޑިޖިޓަލައިޒޭޝަންގައި އެންމެ ކުރީގައި އޮންނަ މުއައްސަސާއަކަށް ވުމަށް މިނިސްޓަރު ވަނީ އިލްތިމާސްކުރައްވާފައެވެ. އަދި މި ނިޒާމު ގާއިމުކުރުމުގައި އެއްބާރުލުން ދެއްވި ކޮންޓްރޯލަ ޖެނެރަލް އޮފް އިމިގްރޭޝަން، ކޮމިޝަނަ އޮފް ޕޮލިސް (ރިޓަޔަޑް) އަޙުމަދު ފަސީޙަށާއި މީރާގެ މުވައްޒަފުންނަށް މިނިސްޓަރު ޝުކުރު އަދާކުރައްވައި ތައުރީފުކުރެއްވިއެވެ.
މި ނިޒާމާއެކު، ދައުލަތުގެ އިދާރާތަކުގެ މެދުގައި ފަތުރުވެރިންގެ މަޢުލޫމާތު އެއް ނިޒާމެއްގެ ތެރެއިން ހިއްސާކުރެވި އަދާހަމަކުރެވޭނެކަމަށް މީރާއިން ބުނެއެވެ. އަދި ފަތުރުވެރިން ރާއްޖެއައުމަށް ފަހު މަޑުކުރާ ތަންތަނުގެ މަޢުލޫމާތު ފުރުމާއި ހަމައަށް އެއް ނިޒާމަކުން އަދާހަމަކުރެވޭއިރު، ކުރިމަގުގައި މި ނިޒާމު "އިމުގަ" ނިޒާމާވެސް ގުޅި ލާމެހިގެންދާނެ ކަމަށް މީރާއިން ބުންޏެވެ.
ސިސްޓަމް ތަޢާރަފުކުރުމާއެކު، ގްރީން ޓެކުހަށް ރަޖިސްޓަރީކޮށްފައިވާ ހުރިހާ ފަރާތްތަކަށް ވެސް ފަތުރުވެރިންގެ މަޢުލޫމާތު ހުށަހެޅޭނެ ކަމަށާއި، މި ނިޒާމު މެދުވެރިކޮށް މަޢުލޫމާތު އަދާހަމަކުރުމުން ފަތުރުވެރިކަމާ ބެހޭ ވުޒާރާއާވެސް މަޢުލޫމާތު ހިއްސާކުރެވުނީ ކަމަށް ބެލެވޭނެކަމަށް އެ އިދާރާއިން ބުނެއެވެ. އަދި ފަތުރުވެރިކަމުގެ ޚިދުމަތްދޭ ތަންތަނުގެ ގެސްޓް މެނޭޖްމެންޓް ނިޒާމާ މި ސިސްޓަމް އިންޓަގްރޭޓް ކުރުމުން، މެނުއަލްކޮށް ކުރަންޖެހޭ މަސައްކަތްތައް ނިމުމަކަށް އަންނާނއކަމަށް ވެސް މީރާއިން ވަނީ ބުނެފައެވެ.
މި ސިސްޓަމަށް ޓެކްސް ދައްކާ ފަރާތްތައް އޮންބޯޑް ކުރުމުގައި މީރާއިން ވަނީ ދެ މަރުހަލާއަކަށް ބަހާލާފައެވެ. އެގޮތުން ރިސޯޓްތަކާއި، ހޮޓާތަކާއި، އަދި 50 އެނދަށްވުރެ މަތީގެ ގެސްޓްހައުސްތަކުން އަންނަ މަހުގެ 1 އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ފަށަންޖެހޭއިރު، ގްރީން ޓެކުހަށް ރަޖިސްޓަރީކޮށްފައިވާ އެހެނިހެން ފަރާތްތަކުން އަންނަ އަހަރުގެ ޖެނުއަރީ މަހުގެ 1 އިން ފެށިގެން މި ސިސްޓަމް މެދުވެރިކޮށް ރިޕޯޓް ކުރަން ޖެހޭނެ ކަމަށް މީރާއިން ހާމަކުރެއެވެ.