މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް ބާއްވާ "އިންޓަނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026" ގައި ބައިވެރިވުމަށް ރަޖިސްޓަރީވުމުގެ ފުރުސަތު ހުޅުވާލައިފިއެވެ.
މި މަހުގެ 28 ގައި ބޭއްވުމަށް ހަމަޖެހިފައިވާ މި ކޮންފަރެންސްގެ މިއަހަރުގެ ޝިއާރަކީ "ރެޒިލިއަންޓް ފައުންޑޭޝަންސް: ޑިސައިފަރިންގް ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް" އެވެ.
މޯލްޑިވްސް ޒަކާތު ހައުސްއިން ބުނި ގޮތުގައި، މި ކޮންފަރެންސްގައި ކީނޯޓް އެޑްރެސްތަކާއި އެކި ދާއިރާތަކުގެ ތަޖުރިބާކާރުން ބައިވެރިވާ ޕެނަލް ޑިސްކަޝަންތައް ކުރިއަށްދާނެއެވެ.
މި ކޮންފަރެންސަކީ މާލީ އަދި އިޖުތިމާއީ ނާޒުކު ހާލަތްތަކާ ގުޅިގެން ކުރިމަތިވާ ގޮންޖެހުންތަކާއި، ވިލުންވެރި މުޖުތަމައުތަކެއް ބިނާކުރުމުގައި ޒަކާތުގެ ދައުރާ ގުޅޭގޮތުން މަޝްވަރާކުރުމަށް ބާއްވާ ކޮންފަރެންސެކެވެ. މިގޮތުން، ގޭބިސީތަކުގެ ނާޒުކު ހާލަތަށް އަންނަމުންދާ ބަދަލުތަކާއި، މާލީ ދަތިކަމުގެ ސަބަބުން ކުރާ އިގްތިސާދީ އަސަރުތަކާއި، އެކި ދާއިރާތަކުގެ މެދުގައި މައުލޫމާތު ހިއްސާކުރުމުގެ އިތުރުން، ނާޒުކު ހާލަތްތަކުގައިވާ އާއިލާތައް އަމިއްލަ ފައިމައްޗަށް ތެދުވެފައިވާ މާލީ މިނިވަންކަން ލިބިފައިވާ ބަޔަކަށް ހެދުމަށް ބޭރު ގައުމުތަކުގައި ބޭނުންކުރާ މޮޑެލްތަކާ ގުޅޭގޮތުން މަޝްވަރާކުރާނެއެވެ.
މި ކޮންފަރެންސްގައި އިލްމުވެރިންނާއި، އިގްތިސާދީ މާހިރުންނާއި، ޒަކާތުގެ ކަންކަން ބަލަހައްޓާ ފަރާތްތަކާއި، ސިޔާސަތު ކަނޑައަޅާ ފަރާތްތަކުގެ އިތުރުން މާލީ އިދާރާތަކާއި މަދަނީ ޖަމިއްޔާތަކުގެ މަންދޫބުން ބައިވެރިވާނެއެވެ. އިންޒެކް 2026 ގައި ބައިވެރިވުމަށް ޝައުގުވެރިވާ ފަރާތްތަކަށް ރަސްމީ ރަޖިސްޓްރޭޝަން ފޯމު މެދުވެރިކޮށް މިހާރު ރަޖިސްޓަރީ ކުރެވޭނެއެވެ.