ދިވެހި ޒުވާނުންގެ ކުރިމަގު އުޖާލާކުރުމުގެ އައު މަގުތަކެއް ތަނަވަސްކޮށްދިނުމަށް މި ސަރުކާރުން ފެށި "ދިވެހި ވަތަނީ ހިދުމަތަށް" މިއަދަށް އެއް އަހަރު ފުރިއްޖެއެވެ.
މިކަން ފާހަގަކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ޕޯސްޓެއްގައި ވަނީ ދިވެހި ވަތަނީ ހިދުމަތަށް އެއް އަހަރު ފުރުމުގެ މުނާސަބަތުގައި ﷲ ތަޢާލާއަށް ޙަމްދުކުރައްވާ، މި ހިދުމަތުގެ ދަސްވެނީންނަށާއި އެކުދީންގެ އާއިލާތަކަށް ތަހުނިޔާ ދަންނަވާފައެވެ. އަދި މި ހަރަކާތް ކާމިޔާބުކަމާއެކު ކުރިއަށްގެންދިއުމުގައި ޝާމިލުވާ އެންމެހައި ފަރާތްކަށް، ރައީސް ވަނީ ޝުކުރުއަދާކުރައްވާފައެވެ.
ރައީސްގެ ޕޯސްޓުގައި ވަނީ މި ޕްރޮގްރާމުގެ ދަށުން އަހަރަކު 1000 ޒުވާނުން ތަމްރީނުކުރުމަށް ކަނޑައަޅާފައިވާ ލަނޑުދަނޑި ހާސިލުވެފައިވާކަން ފާހަގަކުރައްވާފައެވެ. އެގޮތުން، ދިވެހި ވަތަނީ ހިދުމަތުގެ ފުރަތަމަ އަހަރު ނޭޝަނަލް ސާވިސް އިނީޝަލް ޓްރޭނިންގެ ތެރެއިން 1028 ދިވެހި ޒުވާނުން ތަމްރީނު ކުރެވުނުއިރު، ނޭޝަނަލް ސާވިސް ސްކިލް ޓްރޭނިން ޕްރޮގްރާމުން 136 ޒުވާނުން ތަމްރީނު ކުރެވިފައިވާކަން ރައީސް ފާހަގަކުރެއްވިއެވެ.
ރައީސް ވިދާޅުވީ، ދިވެހި ވަތަނީ ހިދުމަތުގެ ކުރިމަގު ފެންނަނީ ވަރަށް އުޖާލާކޮށް ކަމަށެވެ. މިއާއެކު އެމަނިކުފާނު ވަނީ ކުރިއަށްއޮތް ތަނުގައި ނޭޝަނަލް ސާވިސްގެ ތެރެއަށް ފަންނީ އިތުރު ދާއިރާތައް ތައާރަފްކޮށް، ނޭޝަނަލް ސާވިސްގެ އިންޓާންޝިޕް ޕްރޮގްރާމްތައް ވެސް ތައާރަފްކުރެވޭނެކަމަށް ވިދާޅުވެފައެވެ.
މީގެ އިތުރުން ނޭޝަނަލް ސާވިސްގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުސަތުތައް ފަހިކޮށްދިނުމަށް ކުރާ މަސައްކަތުގައި ނޭޝަނަލް ކެރިއާ ސާވިސްގެ ދައުރު ފުޅާކުރުމަކީ ވެސް ސަރުކާރުގެ އަމާޒެއް ކަމަށް ރައީސުލްޖުމްހޫރިއްޔާގެ ޕޯސްޓުގައި ވިދާޅުވެފައި ވެއެވެ.