ގައުމުތައް ހުރަސްކޮށް ހިންގާ ބޮޑެތި ކުށްތަކާއި ސައިބާކްރައިމް ހުއްޓުވުމަށް ބައިނަލްއަގުވާމީ ފަރާތްތަކާ ގުޅިގެން ރާއްޖެއިން އިތުރު އެއްބާރުލުން ހޯދަމުންދާ ކަމަށް ޕްރޮސިކިއުޓާ ޖެނެރަލް އައްބާސް ޝަރީފް ވިދާޅުވެއްޖެއެވެ.
އައްބާސް މިހެން ވިދާޅުވީ އެކުވެރި އަރަބި އިމާރާތް (ޔޫއޭއީ) ގެ އަބޫދާބީގައި މިހާރު ކުރިއަށްދާ ކުށްކުރުން ހުއްޓުވުމާއި ޖިނާއީ އަދުލުގެ ނިޒާމާ ގުޅޭ އދ.ގެ 15 ވަނަ ކޮންގްރެސްގެ ހަވާސާގައި، ޔޫއޭއީގެ ރަސްމީ ނިއުސް އޭޖެންސީ، އިމިރޭޓްސް ނިއުސް އޭޖެންސީ (ވާމް) އަށް ދެއްވި އިންޓަވިއުއެއްގައެވެ.
ވާމް އިން ރިޕޯޓުކޮށްފައިވާ ގޮތުގައި، މި ކޮންގްރެސްގައި ރާއްޖެއިން ބައިވެރިވުމުގެ މައިގަނޑު އެއް މަގުސަދަކީ ޔޫއޭއީއާއި ކޮންގްރެސްގައި ބައިވެރިވާ އެހެން ގައުމުތަކާ ދެމެދު އޮންނަ ގުޅުން ބަދަހިކުރުން ކަމަށް އައްބާސް ފާހަގަކުރެއްވިއެވެ. އަދި ޚާއްސަ ގޮތެއްގައި އިންޓަނެޓް މެދުވެރިކޮށް ހިންގާ ކުށްތައް ނުވަތަ ސައިބާކްރައިމް ފަދަ ގައުމުތައް ހުރަސްކޮށް ހިންގާ ކުށްތައް ހުއްޓުވުމުގައި ގުޅިގެން މަސައްކަތްކުރުމުގެ މުހިންމުކަން އޭނާ ފާހަގަކުރެއްވިއެވެ.
މީގެ އިތުރުން، ރާއްޖެއިން ފަށާފައިވާ އާޓިފިޝަލް އިންޓެލިޖެންސް (އޭއައި) އިނިޝިއޭޓިވް އިތުރަށް ތަރައްގީކޮށް ކުރިއެރުވުމަށް ބައިނަލްއަގުވާމީ ބައިވެރިންގެ އެހީތެރިކަން ހޯދުމަށް މަސައްކަތްކުރައްވަމުން ގެންދަވާ ކަމަށް ވެސް ޕްރޮސިކިއުޓާ ޖެނެރަލް ވިދާޅުވި ކަމަށް އެ ނޫހުގައި ބުނެފައިވެއެވެ. ޓެކްނޮލޮޖީގެ ގޮތުން ކުރިއަރަމުން އަންނަ މި ދުވަސްވަރު، ކުށްތައް ތަހުގީގުކުރުމުގައާއި ދައުވާކުރުމުގައި އޭއައިގެ ބޭނުން ހިފުމަކީ ދުނިޔޭގެ ގިނަ ގައުމުތަކުން މިހާރު ކުރަމުން އަންނަ ކަމެކެވެ.
އަބޫދާބީގައި ކުރިއަށްދާ މި ކޮންގްރެސްގެ ތެރެއިން ދުނިޔޭގެ އެކި ގައުމުތަކުގެ ޕްރޮސިކިއުޓާ ޖެނެރަލުންނާއި ޖިނާއީ އަދުލުގެ ނިޒާމުގައި މަސައްކަތްކުރައްވާ އިސް ބޭފުޅުންނާ ބައްދަލުކުރައްވައި މަޝްވަރާކުރައްވާފައިވާ ކަމަށް އައްބާސް ވިދާޅުވިއެވެ. އަދި މިހާތަނަށް ބޭއްވި ބައްދަލުވުންތަކުގެ ސަބަބުން ކުރިމަގުގައި ގުޅިގެން މަސައްކަތްކުރުމަށާއި އެހީތެރިކަން ބަދަލުކުރުމަށް އައު ފުރުސަތުތަކެއް ފަހިވެފައިވާ ކަމަށް އޭނާ ވިދާޅުވި ކަމަށް ވާމް އިން ރިޕޯޓުކޮށްފައިވެއެވެ.
ސައިބާކްރައިމްއާއި މަކަރާއި ހީލަތުން ފައިސާ ހޯދުމުގެ މައްސަލަތައް ރާއްޖޭގައި އިތުރުވަމުންދާ ދަނޑިވަޅެއްގައި، މިފަދަ ކުށްތައް ހުއްޓުވުމަށް ގާނޫނީ އޮނިގަނޑު ހަރުދަނާކުރުމަށާއި ބައިނަލްއަގުވާމީ އެހީތެރިކަން ހޯދުމަށް ދިވެހި ސަރުކާރުންނާއި ކަމާބެހޭ އިދާރާތަކުން އަންނަނީ މަސައްކަތް ކުރަމުންނެވެ.