އެޕަލްގެ އެންމެ ފަހުގެ ފްލެގްޝިޕް މޮޑެލްތައް ކަމަށްވާ އައިފޯން 18 ޕްރޯ އަދި އައިފޯން 18 ޕްރޯ މެކްސް ވިއްކަން ފެށުމާއެކު، ދުނިޔޭގެ އެކި ކަންކޮޅުތަކުގައި ހުންނަ އެޕަލް ސްޓޯރުތަކުގެ ބޭރުގައި ގިނަ އަދަދެއްގެ މީހުން ކިޔޫގައި ޖެހިއްޖެއެވެ.
މި ދެ ފްލެގްޝިޕް މޮޑެލް ބައިނަލްއަޤުވާމީ މާކެޓުގައި ރަސްމީކޮށް ވިއްކަން ފެށީ ހުކުރު ދުވަހުގެ (މިއަދު) ހެނދުނުގެ ވަގުތުތަކުގައެވެ.
ކުރީބައިގައި އޯޑަރުކޮށްފައިވާ ފަރާތްތަކާއި، ސީދާ ސްޓޯރަށް ގޮސް ފޯނު ގަންނަން ތިބި މީހުންނާއެކު ދުނިޔޭގެ މައިގަނޑު ސިޓީތަކުގައި ހުންނަ އެޕަލް ސްޓޯރުތައް ހުޅުވުމުގެ މާކުރިން ވެސް ބޮޑެތި މީހުންގެ ކިޔޫތައް ވަނީ ފެނިގެންގޮސްފައެވެ. ޚާއްޞަކޮށް ނިއު ޔޯކް، ލަންޑަން، ޓޯކިޔޯ އަދި އިންޑިއާގެ ބޮޑެތި ސިޓީތައް ކަމަށްވާ ދިއްލީ، މުމްބާއީ، އަދި ބެންގަލޫރު ފަދަ ތަންތަނުގައި އެޕަލް ސަޕޯޓަރުން ވަނީ ރޭގަނޑުގެ ވަގުތުތަކުން ފެށިގެން ނުވަތަ ފަތިހުއްސުރެ ކިޔޫގައި މަޑުކޮށްފައެވެ.
އެޕަލްގެ ސްޓޯރުތައް ހުޅުވުމުގެ ކުރިން މުވައްޒަފުން ވަނީ ޚާއްޞަ ކައުންޓްޑައުންތަކެއް ކުރިއަށް ގެންގޮސްފައެވެ. ބައެއް ކަސްޓަމަރުން ވަނީ އާ މޮޑެލް އެންމެ ފުރަތަމަ ހޯދުމުގެ ބޭނުމުގައި އެއް ޤައުމު އަނެއް ޤައުމަށް ނުވަތަ އެއް ސްޓޭޓުން އަނެއް ސްޓޭޓަށް ދަތުރުކޮށްފައެވެ.
https://x.com/ANI/status/2100706934395637839
މީގެ ތެރެއިން ބައެއް ކަސްޓަމަރުން ބުނިގޮތުގައި، ކޮންމެ އަހަރަކު ނުކުންނަ އައިފޯން ލޯންޗުވުމަކީ ފެސްޓިވަލެއް ފަދަ އުފާވެރި ކަމަކަށްވާތީ، ކޮންމެ އަހަރަކުވެސް މި އުފާވެރިކަމުގައި ބައިވެރިވެ އާ ފޯނަށް އަޕްގްރޭޑްކުރެއެވެ.
މި ޑިވައިސްތަކަށް ބައިނަލްއަޤުވާމީ މާކެޓުގައި ބޮޑު ތަރުހީބެއް ލިބެމުންދާއިރު، އައިފޯން 18 ޕްރޯއަށް ޕްރީ-އޯޑަރު ކުރުމުގެ ފުރުސަތު ހުޅުވާލާފައިވަނީ ސެޕްޓެމްބަރު 12 ވަނަ ދުވަހުއެވެ. އަދި ދުނިޔޭގެ އެކި ކަންކޮޅުތަކުގައި މި އާ ޑިވައިސްތައް ވިއްކަން ފަށާފައިވަނީ ސެޕްޓެމްބަރު 18، 2026ގައެވެ.