ބަންދުކޮށްފައި ހުންނަ ކާބޯތަކެތީގެ ޕެކެޓުތަކުގެ ބޭރުގައި، ސިއްހަތަށް ގެއްލުންހުރި މާއްދާތައް ހިމެނޭކަން އަންގައިދޭ ކުލަގަދަ އިންޒާރުގެ ލޭބަލްތަކެއް ޖަހަން, އިންޑިއާގެ ފުޑް ސޭފްޓީ އެންޑް ސްޓޭންޑަޑްސް އޮތޯރިޓީ (އެފްއެސްއެސްއޭއައި) އިން ކުރަމުންދިޔަ މަސައްކަތް ހުއްޓާލައިފިއެވެ.
ބައިނަލްއަގުވާމީ ބޮޑެތި ކުންފުނިތަކުގެ ޕްރެޝަރާ ގުޅިގެން މި ނިންމުން ނިންމާފައިވާއިރު، އިންޑިއާގެ ސުޕްރީމް ކޯޓުން ދަނީ މި މައްސަލަ ބަލަމުންނެވެ.
މި މަހު އެފްއެސްއެސްއޭއައި އިން ބުނި ގޮތުގައި، ކުލަގަދަ ލޭބަލްތަކުގެ ބަދަލުގައި ކުންފުނިތަކަށް ހުށަހަޅާފައިވަނީ ހަކުރާއި، ސަރުބީ އަދި ލޮނު އެކުލެވޭ މިންވަރު އަންގައިދޭ ކަޅާއި ހުދުގެ ތާވަލެއް ޕެކެޓުގައި ހިމެނުމަށެވެ. އެ އިދާރާއިން ބުނީ ހުޅަނގުގެ ގައުމުތަކުގެ ކާނާއާ ޚިލާފަށް އިންޑިއާގެ ކާނާގައި ރަހަތައް ގަދަވާނެ ކަމަށާއި، އެހެންކަމުން ބައިނަލްއަގުވާމީ މިންގަނޑުތަކާ އެއްގޮތްކުރަން ދަތިވާނެ ކަމަށެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި، މި ނިންމުން ނިންމާފައިވަނީ މާޗު މަހު ކުންފުނިތަކުގެ އިސްވެރިންނާއެކު ބޭއްވި ބައްދަލުވުމަކަށް ފަހުގައެވެ. މި ބައްދަލުވުމުގައި ކޮކާ-ކޯލާ އިންޑިއާގެ އިސްވެރިއެއް ކަމަށްވާ މިލީ ބަޓާޗާރިޔާ ވިދާޅުވި ގޮތުގައި، ލޭބަލެއް ފެނުމުން މީހުންގެ ކެއުމުގެ އާދަތަކަށް ބަދަލު އަންނާނެ ކަމަށް ގަބޫލުކުރުމަކީ މާ އާދައިގެ ވިސްނުމެކެވެ. އަދި އިންޑިއާގެ ފުޑް އެންޑް ބެވަރޭޖް އެސޯސިއޭޝަން (އައިއެފްބީއޭ) ގެ ދީޕަކް ޖޮލީ ފާހަގަކުރި ގޮތުގައި، ކުލައިގެ ލޭބަލްތައް ބޭނުންކުރަން ފަށައިފިނަމަ ގިނަ ޕެކެޓުތައް ހުންނާނީ ރަތް ކުލައިން ފުރިފައެވެ.
އައިއެފްބީއޭ އިން ބުނީ ގުދުރަތީ ހަކުރު އެކުލެވޭ ކުރުނބާ ފެން ފަދަ ތަކެތީގައި ވެސް "ހަކުރު ގިނަ" ކަމުގެ ލޭބަލް ޖަހަން ޖެހިދާނެތީ އިތުރު ސާފުކުރުންތަކެއް ބޭނުންވާ ކަމަށެވެ.
ބައިނަލްއަގުވާމީ ބޮޑެތި ކުންފުނިތަކުން ވިލާތުގެ ގައުމުތަކާއި އިންޑިއާގައި ވިއްކާ ތަކެތީގެ ފެންވަރު ތަފާތުކަން ވަނީ ފާހަގަކުރެވިފައެވެ. މިގޮތުން، ލަންޑަނުގައި ވިއްކާ ފެންޓާ ދަޅެއްގައި 63 ކެލޮރީ ހުންނައިރު، އިންޑިއާގައި ވިއްކާ ފެންޓާ ދަޅުގައި އޭގެ ތިންގުނަ އިތުރަށް ހަކުރު ހުރެއެވެ. އަދި އޭގައި ހިމެނޭ ކުލަތަކުގެ ސަބަބުން ވިލާތުގައި ނަމަ ބޮޑު އިންޒާރުގެ ލޭބަލެއް ޖަހަން ޖެހުނު ނަމަވެސް، އިންޑިއާގައި އެކަން ލިޔެފައި އޮންނަނީ ވަރަށް ކުޑަކޮށެވެ. މީގެ އިތުރުން، އޮސްޓްރޭލިއާގައި ވިއްކާ ނެސްލޭ ކިޓްކެޓްގައި 22 އިންސައްތަ ކޮކޯ ހިމެނޭއިރު، އިންޑިއާގައި ވިއްކާ ކިޓްކެޓްގައި ހުންނަނީ 4.5 އިންސައްތައެވެ. އިންޑިއާގައި ވިއްކާ މެގީ ނޫޑްލްސްގައި ޕާމް އޮއިލް ބޭނުންކުރާއިރު، އިނގިރޭސިވިލާތުގައި ވިއްކާ މެގީގައި ބޭނުންކުރަނީ އަގުބޮޑު ސަންފްލާވާ އޮއިލްއެވެ.
ކޮކާ-ކޯލާ އަދި ނެސްލޭ ފަދަ ކުންފުނިތަކުން ވިލާތުގެ ގައުމުތަކުގައި އަމިއްލައަށް އިސްނަގައިގެން އިންޒާރުގެ ލޭބަލްތައް ބޭނުންކުރެއެވެ.
މޮންޑެލީޒްގެ ކުރީގެ އިސްވެރިއެއް ކަމަށްވާ ޕާރުލް ޝަރްމާ ވިދާޅުވި ގޮތުގައި، ގައުމުތަކުގެ މެދުގައި އުފެއްދުންތަކުގެ ރެސިޕީ ތަފާތުވާ އެންމެ ބޮޑު އެއް ސަބަބަކީ އަގު ކަނޑައެޅުމާއި މީހުންނަށް ގަނެވޭނެ ފެންވަރުގައި އަގުތައް ބެހެއްޓުމެވެ.
އިންޑިއާގެ ކާބޯތަކެތީގެ މާކެޓަކީ 100 ބިލިއަން ޑޮލަރަށް ވުރެ ބޮޑު މާކެޓެކެވެ. ސިނާއަތުގެ އަންދާޒާތަކުން ދައްކާ ގޮތުގައި، މީގެ ތެރެއިން 80 އިންސައްތަ އުފެއްދުންތަކަކީ ސަރުބީ، ހަކުރު އަދި ލޮނު ގިނައިން އެކުލެވޭ ތަކެއްޗެވެ. ލޭންސެޓް ޖާނަލްގައި ޝާއިއުކޮށްފައިވާ ދިރާސާއަކުން ދައްކާ ގޮތުގައި، 2050 ވަނަ އަހަރާ ހަމައަށް އިންޑިއާގެ 450 މިލިއަން މީހުންނަކީ ފަލަބަލި ނުވަތަ ބަރުދަން އިތުރު މީހުންނަށް ވުމުގެ ފުރުސަތު އެބައޮތެވެ.
މި މައްސަލަތަކާ ގުޅިގެން ސިއްހީ ދާއިރާގެ އެކްޓިވިސްޓުން ވަނީ އިންޑިއާގެ ސުޕްރީމް ކޯޓަށް މައްސަލައެއް ހުށަހަޅާފައެވެ. ސުޕްރީމް ކޯޓުން ވަނީ އެފްއެސްއެސްއޭއައިގެ ނިންމުމަށް ފާޑުކިޔައި، އިންޑިއާގެ ރައްޔިތުންގެ ސިއްހަތާމެދު އެ ގައުމުން އަޅާލާކަން މުޅި ދުނިޔެއަށް އެނގެން ޖެހޭނެ ކަމަށް ބުނެފައެވެ. އަދި އިސްރާއީލުގައި ބޭނުންކުރާ ފަދަ ރަތް އަދި ފެހި ކުލައިގެ ލޭބަލް ނިޒާމެއް ދިރާސާކުރުމަށް ކޯޓުން ވަނީ ލަފާދީފައެވެ.
އޮސްޓްރޭލިއާގެ ޖޯޖް އިންސްޓިޓިއުޓް ފޯ ގްލޯބަލް ހެލްތުގެ ފުޑް ޕޮލިސީގެ އިސްވެރިޔާ ސިމޯން ޕެޓިގްރޫ ވިދާޅުވި ގޮތުގައި، ކުންފުނިތަކުން މަސައްކަތްކުރަނީ ވީހާވެސް ގިނަ ދުވަހަކު މި މައުލޫމާތުތައް އާންމުންނަށް ސިއްރުކޮށްގެން ފައިދާ ހޯދުމަށެވެ.
ސޯޝަލް މީޑިއާގައި ވެސް މި މައްސަލައާ ގުޅޭގޮތުން ގިނަ ބަޔަކު ދަނީ އަޑުއުފުލަމުންނެވެ. މީގެ ތެރޭގައި ފަސް މިލިއަނަށް ވުރެ ގިނަ ފޮލޯވަރުން ތިބޭ "ފުޑް ފާމާ" ނުވަތަ ރެވަންތު ހިމަތްސިންގކާ ހިމެނެއެވެ. އޭނާ 2023 ވަނަ އަހަރު ޕެޕްސީކޯގެ ސްޓިންގް އެނާޖީ ޑްރިންކްގައި ހަކުރު ހުންނަ މިންވަރާ ގުޅޭގޮތުން ހެދި ވީޑިއޯއަކާ ގުޅިގެން، ޕެޕްސީކޯއިން ވަނީ ކޯޓު މެދުވެރިކޮށް އެ ވީޑިއޯ ނަގާފައެވެ.
ހިމަތްސިންގކާ ފާހަގަކުރި ގޮތުގައި އިންޑިއާގެ ގިނަ ރައްޔިތުންނަށް އިހުސާސްކުރެވެނީ އެމީހުންނަށް އޮޅުވާލައިގެން ދަށް ފެންވަރުގެ ތަކެތި ވިއްކާ ކަމަށެވެ. ނަމަވެސް، ޖުލައި މަހު އިންޑިއާގެ އިދާރާތަކުން ވަނީ 90 ދުވަހުގެ ތެރޭގައި "އެނާޖީ ޑްރިންކް" ގެ ނަން ބޭނުންކުރުން ހުއްޓާލުމަށް ޕެޕްސީކޯއާއި އެހެން ކުންފުނިތަކަށް އަންގާފައެވެ.
އާންމުންގެ ހޭލުންތެރިކަން އިތުރުވަމުން އަންނަކަމުގެ ނިޝާންތައް މާކެޓުން ވެސް ދަނީ ފެންނަމުންނެވެ. ފާމަރެކް ކުންފުނީގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރުގެ ކުރީކޮޅުން ފެށިގެން ބަރުދަން ލުއިކުރާ ބޭހުގެ ވިޔަފާރި ވަނީ 400 އިންސައްތަ އިތުރުވެފައެވެ. އަދި 50 އަހަރު ވަންދެން ހަކުރު އެކުލެވޭ ސެރެލެކް ވިއްކުމަށްފަހު، ނެސްލޭއިން ވަނީ 2024 ވަނަ އަހަރު ހަކުރު ނުހިމެނޭ ސެރެލެކް އިންޑިއާގެ މާކެޓަށް ނެރެން ފަށާފައެވެ.