އިންސްޓާ 360 ގެ އައު 360 ޑިގްރީ އެކްޝަން ކެމެރާ "އިންސްޓާ360 އެކްސް6" ރަސްމީކޮށް ލޯންޗްކުރުމުގެ ކުރިން، އެ ކެމެރާގެ ރީޓެއިލް ބޮކްސްގެ ފޮޓޯތަކެއް އިންޓަނެޓްގައި ލީކްވެއްޖެއެވެ.
މިއާއެކު ކެމެރާގެ ބެޓެރީއާއި، ހިމެނޭ އެކްސެސަރީތަކުގެ އިތުރުން މާކެޓަށް ނެރޭނެ އަގުތަކާ ބެހޭ މުހިންމު ތަފްސީލުތަކެއް ވަނީ ހާމަވެފައެވެ.
ލީކާ އީގޯ ބޮގްދަނޯވް ހިއްސާކޮށްފައިވާ ބޮކްސްގެ ފޮޓޯތަކުން ދައްކާ ގޮތުގައި، އެކްސް6 އިން އެއް ޗާޖުން 8ކޭ 360-ޑިގްރީ ވީޑިއޯ 30އެފްޕީއެސް ގައި 140 މިނެޓް ވަންދެން މެދުނުކެނޑި ރެކޯޑްކުރެވޭނެއެވެ.
މީގެ އިތުރުން އަނދިރި މާހައުލުތަކުގައި ފެންވަރު ރަނގަޅު ވީޑިއޯ ނެގުމަށް ޚާއްޞަ "ޕިއޯވީޑިއޯ" މޯޑާއި، އައު "ރިޕްލޭސަބަލް ލެންސަސް 2.0" ސިސްޓަމް މި ކެމެރާގައި ހިމެނޭނެކަން ބޮކްސްގައިވާ މައުލޫމާތުން އެނގެއެވެ.
މީގެ އިތުރުން ރެޑިޓް ޔޫޒާ ފަނީސުޝީ1738 ވަނީ ކެމެރާގެ ހޭންޑްސް-އޮން ފޮޓޯތަކެއް ވެސް އާންމުކޮށްފައެވެ. އެ ފޮޓޯތަކުން ފެންނަ ގޮތުގައި އެކްސް6 ގެ ބޮޑުމިނަކީ ކުރީގެ އެކްސް5 އާ އަޅާބަލާއިރު ކުރުކޮށް ފުޅާކޮށް ހުރި ޑިޒައިނެކެވެ. އަދި މިއީ ގޯޕްރޯ މެކްސް 360 އަށްވުރެ ކުޑަކޮށް އުސްކޮށް ހުރި ކެމެރާއެކެވެ. ބޮކްސްގެ ފަހަތުން ފެންނަ މައުލޫމާތަށް ބަލާއިރު، މީގެ އެއް ވާޝަނެއްގައި 2,600އެމްއޭއެޗްގެ "އެކްސްޓްރާ އެކްސްޓްރީމް" ބެޓެރީއެއް އެކްސެސަރީއެއްގެ ގޮތުގައި ހިމެނޭނެއެވެ.
ފޮޓޯތަކުން ދައްކާގޮތުގައި، އެކްސް6 އިން އެއް ޗާޖުން 8ކޭ 360-ޑިގްރީ ވީޑިއޯ 30އެފްޕީއެސް ގައި 140 މިނެޓް ވަންދެން މެދުނުކެނޑި ރެކޯޑްކުރެވޭނެ ---
ކުރިން ލީކްވެފައިވާ ރިޕޯޓްތަކުން ވެސް ވަނީ 8ކޭ ވީޑިއޯ ރެކޯޑިން، ޕިއޯވީޑިއޯ މޯޑު އަދި އައު ޖެނަރޭޝަންގެ ބަދަލުކުރެވޭ ލެންސް ޑިޒައިން މި ކެމެރާގައި ހިމެނޭނެކަން ކަށަވަރުކޮށްދީފައެވެ.
މި ލީކްތަކުން އެނގޭ ގޮތުގައި އިންސްޓާ360 އެކްސް6 ގްލޯބަލްކޮށް ލޯންޗްކުރުމަށް ހަމަޖެހިފައިވަނީ ޖުލައި 30 ގައެވެ. އަގުތަކަށް ބަލާއިރު، އެކްސެސަރީ ބަންޑަލް ޔޫރަޕްގައި 789 ޔޫރޯ އަށް ވިއްކާއިރު، އެކްސެސަރީތަކާ ނުލައި ހަމައެކަނި ކެމެރާ ލިބެން ހުންނާނީ 589 ޔޫރޯ އަށެވެ.
އިންސްޓާ360 އަކީ 360 ޑިގްރީ އެކްޝަން ކެމެރާ މާކެޓުގައި އެންމެ ފުޅާދާއިރާއެއްގައި މަޤްބޫލުކަން ހޯދާފައިވާ އެއް ބްރޭންޑެވެ. އެ ކުންފުނީގެ އެކްސް ސީރީޒަކީ ކޮންޓެންޓް ކްރިއޭޓަރުންނާއި އެޑްވެންޗާ ކުޅިވަރުތަކަށް ލޯބިކުރާ ފަރާތްތަކުގެ މެދުގައި ވަރަށް މަގުބޫލު ކެމެރާތަކެކެވެ.
މީގެ ކުރިން ނެރުނު އެކްސް4 ކެމެރާއާއެކު އިންސްޓާ360 އިން ވަނީ ފުރަތަމަ ފަހަރަށް 8ކޭ ރިޒޮލިއުޝަންގެ 360 ޑިގްރީ ވީޑިއޯ ރެކޯޑިންގ ތަޢާރަފުކޮށްފައެވެ. ނަމަވެސް، އެ މޮޑެލްތަކުގައި 8ކޭ ވީޑިއޯ ރެކޯޑްކުރާއިރު ބެޓެރީ އަވަހަށް ހުސްވުމާއި ކެމެރާ ހޫނުވުން ފަދަ ގޮންޖެހުންތަކެއް ހުރުމުން، އައު އެކްސް6 މޮޑެލްގައި ބެޓެރީ ލައިފް އިތުރުކޮށް، ކެމެރާގެ ޕާފޯމަންސް އަދި ލެންސް ސިސްޓަމް އިތުރަށް ފުރިހަމަކުރަން ކުންފުނިން ވަނީ ޚާއްޞަ އިސްކަމެއް ދީފައެވެ.