ޔޫކްރޭނަށް ދޭ ހަމަލާތަކުން ސަލާމަތްވުމަށް އެ ގައުމަށް ދޭ އަސްކަރީ އެހީތެރިކަން އިތުރުކުރުމަށް ޖީ7 ގެ ގައުމުތަކުގެ ވެރިން ނިންމަވައިފިއެވެ.
ޖީ7އިން ފޯރުކޮށްދޭ އަސްކަރީ އެހީތެރިކަމުގެ ތެރޭގައި ވައިގެ ދިފާއީ ނިޒާމުތަކާއި ދުރު ރާސްތާގެ ހަތިޔާރުތައް ހިމެނެއެވެ.
ފްރާންސުގައި ބޭއްވި ޖީ7 ގައުުމުތަކުގެ ވެރިންގެ ސަމިޓު ނިންމާލަމުން ގައުމުތަކުން ގުޅިގެން ނެރުނު ބަޔާނުގައި ބުނެފައިވާ ގޮތުގައި، އަންނަ ފިނިމޫސުމުގައި އެ ގައުމަށް ބޭނުންވާ އެހީތެރިކަން ފޯރުކޮށްދިނުމަށް އެ ގައުމުތަކުން ވަނީ އެއްބަސްވެފައެވެ. އަދި ރަޝިއާގެ ތެލާއި ގޭހުގެ ސިނާއަތަށް އަމާޒުކޮށް އިތުރު ދަތިކުރުމުގެ ފިޔަވަޅުތައް އެޅުމަށްވެސް ވަނީ ނިންމާފައެވެ.
މި ސަމިޓުގައި ދެން އެންމެ ބޮޑު ސަމާލުކަމެއް ލިބިގެންދިޔައީ މެދުއިރުމަތީގެ މަސްރަހަށެވެ. އެގޮތުން، އެމެރިކާގެ ރައީސް ޑޮނަލްޑް ޓްރަމްޕް މެދުވެރިވެވަޑައިގެން އެމެރިކާ އާއި އީރާނާ ދެމެދު ގާއިމުކުރި ތާރީޚީ އެއްބަސްވުމަށް ޖީ7 ގެ ލީޑަރުން ވަނީ މަރުހަބާ ވިދާޅުވެފައެވެ.
އެއީ އީރާނުން ނިއުކްލިއާ ހަތިޔާރު އުފެއްދުން ހުއްޓުވުމަށާއި، ދުނިޔޭގެ ވިޔަފާރީގެ މުހިންމު މަގެއް ކަމަށްވާ ހޮރުމުޒް ކަނޑުއޮޅި އަލުން ހުޅުވާލުމަށް ލިބުނު ފުރުސަތެއް ކަމަށް ލީޑަރުން ފާހަގަކުރެއްވިއެވެ.
މީގެ އިތުރުން، މެދުއިރުމަތީގެ ހަމަޖެހުމަށްޓަކައި ލުބުނާނުގައި ހިޒްބުﷲގެ ހަތިޔާރުތައް ނައްތާލައި، ވަގުތުން ހަމަލާތައް މެދުކަނޑާލުމަށް ލީޑަރުން ގޮވާލެއްވިއެވެ. އަދި ޣައްޒާއަށް އިންސާނީ އެހީ ފޯރުކޮށްދިނުން އަވަސްކުރުމަށާއި، ހުޅަނގު އައްސޭރީގައި ހިނގަމުންދާ ހަމަނުޖެހުންތައް ހުއްޓާލުމަށްވެސް ވަނީ ގޮވާލައްވާފައެވެ. ކަނޑުމަގުގެ ސަލާމަތްތެރިކަން ކަށަވަރުކުރުމަށްޓަކައި ފަރަންސޭސިވިލާތާއި އިނގިރޭސިވިލާތް އިސްވެ އޮވެ ފަށާފައިވާ ބައިނަލްއަގުވާމީ މަސައްކަތަށްވެސް ޖީ7 އިން ވަނީ ތާއީދުކޮށްފައެވެ.
އޭޝިއާ ޕެސިފިކް ސަރަހައްދަށް ބަލާއިރު، ދެކުނު ޗައިނާ ކަނޑާއި ޓައިވާން ކަނޑުއޮޅީގެ ހާލަތު ގަދަބާރުން ބަދަލުކުރުމަށް ކުރާ މަސައްކަތްތަކާ ދެކޮޅުކަން ހާމަކޮށް، އުތުރު ކޮރެއާގެ ނިއުކްލިއާ ޕްރޮގްރާމާމެދު ލީޑަރުން ވަނީ ކަންބޮޑުވުން ފާޅުކުރައްވާފައެވެ.
ޖީ7އަކީ ދުނިޔޭގެ އެންމެ ބޮޑު އިގުތިސާދުތައް އޮންނަ، އެންމެ ބޮޑަށް ކުރިއަރާފައިވާ ހަތް ގައުމު އެކުލެވޭ ސިޔާސީ އަދި އިގުތިސާދީ ޖަމާއަތެކެވެ. މި ގައުމުތަކުން މައިގަނޑު ގޮތެއްގައި މަޝްވަރާކުރަނީ ދުނިޔެއަށް ކުރިމަތިވާ އިގުތިސާދީ ގޮންޖެހުންތަކާއި، ސަލާމަތީ ކަންކަމާއި ތިމާވެށީގެ މައްސަލަތަކާ ގުޅޭ ގޮތުންނެވެ.