ޖަލުތަކުގެ ސެކިއުރިޓީ ވަރުގަދަކުރަން މާފުށީ ޖަލުގައި ބެގޭޖް ސްކޭނާ މެޝިން ބޭނުންކުރަން ފަށައިފިއެވެ.
މިއީ މާފުށީ ޖަލުގައި އެފަދަ މެޝިނެއް ބޭނުންކުރަން ފެށި ފުރަތަމަ ފަހަރެވެ.
މާފުށީ ޖަލުގައި އެ ބެގެޖް ސްކްރީނިން މެޝިންގެ ޚިދުމަތް އިފްތިތާހުކުރަން މިއަދު ވަނީ ޚާއްސަ ރަސްމިއްޔާތެއް ވެސް ބާއްވައިފައެވެ. އެ ޚިދުމަތް އިފްތިތާހުކޮށްދެއްވީ ހޯމް މިނިސްޓަރު އަލީ އިހުސާނެވެ.
ކަރެކްޝަންސްއިން ބުނި ގޮތުގައި އެ ބެގެޖް ސްކްރީން މެޝިނަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑްއިން ހަދިޔާކުރި މެޝިނެކެވެ. އަދި އެ މެޝިން މެދުވެރިކޮށް ގައިދީން ޖަލަށް އަލަށް އަންނަ އިރު ގެންނަ ތަކެއްޗާއި، އާއިލާއިން ފޮނުވާ ތަކެތި އަދި އެކަހެރި ބައްދަލުވުންތަކަށް ޖަލަށް ޒިޔާރަތްކުރައްވާ ފަރާތްތަކުގެ ތަކެތި ސްކްރީން ކުރެވިގެން ދާނެ ކަމަށް ކަރެކްޝަންސްއިން ބުންޏެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި މިނިސްޓަރު އިހުސާން ވިދާޅުވީ ދިވެހިރާއްޖޭގެ ޖަލުތަކުގެ ސެކިއުރިޓީ ބެލެހެއްޓުމުގެ ކަންކަން ތަރުތީބު ކުރަމުން އަންނަ އިރު އެންމެ މުހިއްމު އެއްކަމަކީ ޖަލަށް ވެއްދޭ ތަކެތި ސަތޭކަ އިންސައްތަ ސްކޭން ކުރެވިގެން ވެއްދޭކަން ކަށަވަރު ކުރުން ކަމަށެވެ. އަދި ދިވެހިރާއްޖޭގެ ޖަލުތަކަކީ ޖަލުގައި ކުރަންޖެހޭ ކަންކަން ކުރުމަށް ޚާއްސަކުރެވިފައިވާ ތަންތަނަށް ހެދުމަށާއި އަދި އެތަނުގެ ގައިދުވެފައިވާ ތިބޭ މީހުންގެ ފަރާތުން އާންމު ރައްޔިތުންނަށް އުނދަގޫ ނުވާ ގޮތަށް ޖަލުގެ ސަލާމަތީ ކަންކަން ތަރުތީބުކުރުމަކީ އަދުގެ ސަރުކާރުން ޚާއްސަ އިސްކަމެއްދޭ ކަމެއް ކަމަށް ވެސް އިހުސާން ވިދާޅުވިއެވެ.
"ރައީސުލްޖުމްހޫރިއްޔާ މިއަހަރުގެ ރިޔާސީ ބަޔާނުގައި ސްޕެސިފިކްކޮށް ވިދާޅުވެފައިވާނެ. މި ޖަލުގައި ސްކޭން މެޝިންތައް ބަހައްޓާނެ ވާހަކަ މިއަހަރު ނިމުމުގެ ކުރިން. އެހެންވީމަ ރައީސް ވިދާޅުވި ވިދާޅުވުން އަޅުގަނޑުމެން ތަންފީޒުކޮށްފައި މިއަދު މިއޮތީ،" އިހުސާން ވިދާޅުވިއެވެ.
އިހުސާން ވިދާޅުވި ގޮތުގައި ހައިރާންވާންޖެހޭ ކަމަކީ މި ޖަލު މިގޮތަށް ހިނގާތާ ރާއްޖޭގެ ބައި ގަރުނެއްވަރު ވެފައިވާ ކަމެވެ. ކަން އެހެން އޮތްއިރު މިފަދަ ފެސިލިޓީއެއް ޖަލުގައި ގާއިމްނުވެ ހުރުމަކީ ވަރަށް ބޮޑު އިހުމާލެއް ކަމަށް އޭނާ ވިދާޅުވިއެވެ.