ޗައިނާގެ ޒިންޖިއާންގް ސަރަހައްދުގައި ބޭއްވި ޝޯއެއްގެ ތެރެއިން، ކްލައުން ވިގެއް އަޅުވައިފާ ހުރި ހިއުމަނޮއިޑް ރޮބޮޓެއް ކުޑަކުއްޖެއްގެ ބަނޑުގައި ކޮޅުފައިން ޖަހާ ވީޑިއޯއެއް މީޑިއާގައި އާންމުވެ, ގިނަ ބަޔެއްގެ ސަމާލުކަން ލިބިއްޖެއެވެ.
މި ހާދިސާ ހިނގާފައިވަނީ ޒިންޖިއާންގްގެ ފަތުރުވެރިން ޒިޔާރަތްކުރާ މަންޒިލެއްގައި ކުރިއަށްދިޔަ ހަރަކާތެއްގެ ތެރެއިންނެވެ. ވީޑިއޯއިން ފެންނަ ގޮތުގައި "ޔުނިޓްރީ ޖީ1" މޮޑެލްގެ މި ރޮބޮޓް ވަނީ، ރޮބޮޓްގެ ހަރަކާތްތައް ބަލަން ހުރި ކުޑަކުއްޖެއްގެ ބަނޑަށް އަމާޒުކޮށް "ރައުންޑްހައުސް ކިކް" އެއް ދީފައެވެ. މި ހަމަލާއާއެކު އެ ކުއްޖާ ބިމަށް ވެއްޓި، ބިރުން ރޮއެ ހަޅޭއްލަވަން ފެށިއެވެ.
ޗައިނާގެ ނޫހެއް ކަމަށްވާ "ޝަންހާއީ ޑެއިލީ" އިން ރިޕޯޓްކޮށްފައިވާ ގޮތުގައި، މި ހާދިސާގައި ކުއްޖާއަށް ސީރިއަސް އަނިޔާތަކެއް ލިބިފައެއް ނުވެއެވެ. ނަމަވެސް، ހާދިސާ ހިނގި ވަގުތު އެ ތަނުގައި ތިބި މުވައްޒަފުން އެހީތެރިވުމަށް އަމަލުކުރި ގޮތާއި، އެހީތެރިވީލެއް ލަސްވުމުން އެ ކުއްޖާގެ މަންމަ ވަނީ ވަރަށް ބޮޑަށް ޝަކުވާކޮށްފައެވެ.
މި ވީޑިއޯ ސޯޝަލް މީޑިއާގައި އާންމުވުމާއެކު ގިނަ ބައެއްގެ މެދުގައި ބޮޑެތި ބަހުސްތަކެއް ވަނީ އުފެދިފައެވެ. ބައެއް މީހުން ސުވާލު އުފައްދަމުންދަނީ އަމިއްލައަށް މަސައްކަތްކުރާ (އޮޓޯނޮމަސް) ރޮބޮޓަކު އިންސާނަކަށް ދޭ މިފަދަ ގެއްލުންތަކުގެ ޒިންމާ ނަގާނީ ކޮން ފަރާތަކުންތޯއެވެ. އަދި އަނެއް ބަޔަކު ސަމާސާ ރާގަކަށް ބުނެފައިވަނީ މިއީ "ޓާމިނޭޓަރު" ފިލްމުތަކުން ފެންނަ ފަދައިން ރޮބޮޓްތައް އިންސާނުންނާ ދެކޮޅަށް ތެދުވަން ފެށުމުގެ ނިޝާނެއް ކަމަށެވެ.
މި ހާދިސާއަކީ ފަހަކަށް އައިސް ޗައިނާގެ އެކި ސަރަހައްދުތަކުގައި ރޮބޮޓްތަކުގެ ކޮންޓްރޯލް ގެއްލިގެން ހިނގާފައިވާ މިފަދަ ފުރަތަމަ ހާދިސާއެއް ނޫނެވެ. މީގެ ކުރިން ޒިންޖިއާންގްގެ ސްކޫލެއްގެ ކުޅިވަރު މުބާރާތެއްގެ ތެރެއިންވެސް، ރޮބޮޓެއްގެ ކޮންޓްރޯލް ގެއްލި، އަމިއްލައަށް އަރި އަޅާލައި، އެ ސަރަހައްދުގައި ތިބި ދަރިވަރުންނާ ދިމާލަށް ކަންގް-ފޫ ހަމަލާތަކެއް އަމާޒުކުރަން ފެށި ހާދިސާއެއް ވަނީ ހިނގާފައެވެ.
މިފަދަ ކަންކަން ކުރިމަތިވަމުން މިދަނީ، ޗައިނާގެ އާބާދީ މުސްކުޅިވަމުންދާ މައްސަލައަށް ހައްލެއް ހޯދުމަށާއި މަސައްކަތްތެރިން މަދުވުމުގެ ދަތިކަން ފޫބެއްދުމަށްޓަކައި، އެ ގައުމުން ރޮބޮޓިކްސް އަދި އޮޓޮމޭޝަންގެ ދާއިރާއަށް ބޮޑެތި އިންވެސްޓްމަންޓްތަކެއް ކޮށް، ހިއުމަނޮއިޑް ރޮބޮޓްތައް އުފެއްދުން ވަރަށް ބޮޑަށް އިތުރުކުރަމުންދާ ދަނޑިވަޅެއްގައެވެ.
ރޮބޮޓިކްސް ޓެކްނޮލޮޖީ ކުރިއަރަމުންދިޔަ ނަމަވެސް، މި ހާދިސާތަކާ ގުޅިގެން، އާންމުންގެ ތެރެއަށް މިފަދަ ތަކެތި ނެރުމުގައި ހުރި ރައްކާތެރިކަމުގެ މިންގަނޑުތަކާ މެދު މިހާރު ދަނީ ބޮޑެތި ސުވާލުތަކެއް އުފެދެމުންނެވެ.