އދ. މަހިބަދޫ ކައުންސިލްގެ އާ ދައުރަށް ނައިބު ރައީސަކު އިންތިހާބު ކުރުމަށްޓަކައި ހަ ފަހަރު މަތިން ވޯޓުލައިގެން ވެސް ނަތީޖާ އެއްވަރުވުމުގެ ސަބަބުން، ކައުންސިލްގެ ރަސްމީ މަސައްކަތްތައް ކުރިއަށް ނުގެންދެވި ހުއްޓިއްޖެއެވެ.
ކައުންސިލްތަކުގެ އާ ދައުރަށް އިންތިހާބުވި ކައުންސިލަރުން އިއްޔެ ހުވާކޮށްފައިވާއިރު، ގާނޫނީ ގޮތުން ފުރަތަމަ ޖަލްސާގައި ނައިބު ރައީސަކު ހޮވަން ޖެހެއެވެ.
މަހިބަދޫ ކައުންސިލް މެމްބަރު ބުންޔާމީން ހަސަން "ސަން" އަށް ވިދާޅުވި ގޮތުގައި، ނައިބު ރައީސަކު ހޮވުމަށް މިހާތަނަށް ހަ ފަހަރު ވޯޓު ނެގިފައިވެއެވެ. ނަމަވެސް ކޮންމެ ފަހަރަކު ވެސް ނަތީޖާ ނުކުންނަނީ އެއްވަރުވެގެން ކަމަށް އޭނާ ފާހަގަކުރެއްވިއެވެ.
ވޯޓުލުމުގެ މަރުހަލާގައި އެއްވެސް ފަރާތަކަށް މެޖޯރިޓީ ނުލިބުމުގެ ސަބަބުން ނައިބު ރައީސަކު ހޮވޭގޮތް ވަނީ ނުވެފައެވެ. އަދި ތަކުރާރުކޮށް ވޯޓުލާއިރު ވެސް ދެ ފަރާތަށް އެއްވަރަކަށް ވޯޓު ލިބި، ވޯޓު ބާޠިލުވަމުންދާކަން ފާހަގަކޮށްފައިވެއެވެ.
"މިހާރު މިވާގޮތަކީ އެމްޑީޕީ ދެބޭފުޅުންނާއި ޕީއެންސީ ދެބޭފުޅުންނާއި މި އޮންނަނީ ކުރިމަތިލާފަ. އެހެންވީމަ މި ކައުންސިލުން ނައިބު ރައީސްއަށް ހޮވަން ހުޅުވާލި ފުރުޞަތުގައި އަޅުގަނޑު ވެސް ކުރިމަތިލީ އެމްޑީޕީއިންވެސް އަދި ޕީއެންސީން ވެސް ކުރިމަތިލީ. ދެން ފުރަތަމަ ބުރުގަ އަޅުގަނޑަށް ލިބުނީ އެއް ވޯޓު ދެން ތިބި ދެ މީހުންކުރެ ކޮންމެ މީހަކަށް ދެ ވޯޓު. އެހެންވީމަ ނުހޮވޭނެ ނޫންތޯ. މެޖޯރިޓީ ނުލިބެންޏާ ދެއްތޯ،" މަހިބަދޫ ކައުންސިލްގެ މެމްބަރު ބުންޔާމީން ހަސަން "ސަން" އަށް މައުލޫމާތު ދެއްވަމުން ވިދާޅުވިއެވެ.
މީގެ އިތުރުން ބުންޔާމީން ވިދާޅުވީ މިއަދު މެންދުރު 1:00 ގައި ވެސް ނައިބު ރައީސަކު ހޮވުމަށް ވޯޓުލުމައް ތައްޔާރުވަމުން އަންނަ ކަމަށެވެ.
މި މަގާމަށް ވާދަކުރައްވަނީ އެމްޑީޕީގެ ފަރާތުން ޒައީމާ މުހައްމަދު އާއި ޕީއެންސީގެ ފަރާތުން މުހައްމަދު މައުމޫނެވެ. ފުރަތަމަ ނެގި ވޯޓުގައި ޒައީމާއަށް ދެ ވޯޓު ލިބިވަޑައިގެންނެވިއިރު، މައުމޫނަށް ވެސް ލިބިވަޑައިގަތީ ދެ ވޯޓެވެ. އަދި އަމިއްލަ ގޮތުން ކުރިމަތިލެއްވި ބުންޔާމީން ހަސަނަށް ލިބިވަޑައިގަތީ އެއް ވޯޓެވެ.
އޭގެ ފަހުން ކުރިއަށް ގެންދިޔަ ފަސް ވޯޓުގައި ވެސް ޒައީމާ އާއި މައުމޫނަށް ލިބިވަޑައިގަތީ ކޮންމެ ބޭފުޅަކަށް ދެ ވޯޓެވެ. ނަތީޖާ އެއްވަރުވެ، ވަކި ކޮޅަކަށް ނުނިމި ދަނީ ބާތިލުވާ އެއް ވޯޓުގެ ސަބަބުންނެވެ. މިގޮތަށް ނަތީޖާ އެއްވަރުވަމުން ދާތީ، ކައުންސިލްގެ ގާނޫނީ ޒިންމާތައް އަދާކުރުމަށް ވަނީ ހުރަސްތަކެއް ކުރިމަތިވެފައެވެ.