ހުޅުމާލޭގެ ބެލެނިވެރި ކުންފުނިކަމަށްވާ، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޑިރެކްޓަރުންގެ ބޯޑުން ޔޫސުފް ވަޙީދު ވަކިކޮށްފިއެވެ.
ސަރުކާރު ހިއްސާވާ ކުންފުނިތަކާ ބެހޭ ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)އިން ބުނީ، ވަޙީދު، އެޗްޑީސީގެ ޑިރެކްޓަރުންގެ ބޯޑުން ވަކިކުރީ މިއަދު ކަމަށެވެ.
އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ)ގެ ޗީފް އިންޓާނަލް އޮޑިޓަރުގެ މަގާމު ފުރުއްވަމުން ގެންދަވާ ވަޙީދު އެޗްޑީސީގެ ޑިރެކްޓަރުންގެ ބޯޑަށް އައްޔަންކުރީ 2024 ވަނަ އަހަރުގެ ސެޕްޓެންބަރު މަހެވެ.
ވަޙީދަކީ ޗާޓާޑް މެނޭޖްމަންޓް އެކައުންޓަންޓެއްގެ އިތުރުން ޗާޓާޑް ގްލޯބަލް މެނޭޖްމަންޓް އެކައުންޓަންޓެކެވެ.
އޮސްޓްރޭލިއާގެ ޔުނިވާސިޓީ އޮފް ސައުތު އޮސްޓްރޭލިއާއިން ޕްރޮފެޝަނަލް އެކައުންޓިންގެ ދާއިރާއިން މާސްޓާސް، އަދި ފައިނޭންސްއިން ޑިގްރީއެއް ހާސިލްކުރައްވައިފައިވާ ވަޙީދަކީ ޗާޓާޑް އެކައުންޓަންޓްސް މޯލްޑިވްސް (ސީއޭ މޯލްޑިވްސް)ގެ ވެސް މެންބަރެކެވެ.
ބިޒްނަސް މެނޭޖްމަންޓް ދާއިރާއިން ބެޗެލާސް ވެސް ހާސިލްކުރެއްވި ވަޙީދު ޚާއްސަވަނީ މާލީ ދާއިރާއަށެވެ. އޭނާއަކީ މާލީ، އެކައުންޓިން އަދި އޮޑިޓްކުރުމުގެ ދާއިރާގައި 15 އަހަރުގެ ތަޖުރިބާ ލިބިފައިވާ ބޭފުޅެކެވެ.