ނާސާގެ އާޓެމިސް 2 ގެ އެސްޓްރޮނޯޓުން އެނބުރި ދުނިޔެއަށް އައުމަށް ތައްޔާރުވުމުގެ އެންމެ ފަހުގެ މަރުހަލާ ފަށައިފިއެވެ.
މި ތާރީޚީ ދަތުރުގައި ހިމެނޭ އެސްޓްރޮނޯޓުން އެނބުރި ދުނިޔެއަށް އައުމަށް ތައްޔާރުވަމުންދާއިރު، އެމީހުން މިހާރު ހޭދަކުރަމުންދަނީ ފަޒާގައި ހޭދަކުރާ ފަހު 24 ގަޑިއިރެވެ.
"އިންޓެގްރިޓީ" ގެ ނަމުން ނަންދެވިފައިވާ އޮރަޔަން އުޅަނދު މިހާރު ދަނީ ބާރު ސްޕީޑެއްގައި ދުނިޔެއާ ދިމާލަށް ދަތުރުކުރަމުންނެވެ.
ވޭތުވެދިޔަ 50 އަހަރު ދުވަހުގެ ތެރޭގައި އިންސާނުންނާއެކު ހަނދުގެ ސަރަޙައްދަށް ކުރި ފުރަތަމަ މިޝަން ކަމަށްވާ މި ދަތުރުގެ ސަބަބުން، ފުން ފަޒާ (ޑީޕް ސެޕޭސް)ގެ މިޝަންތަކާ ބެހޭ އައު މަޢުލޫމާތުތަކެއް ލިބި، ކުރިމަގުގައި މާސް އަށް ކުރާ ދަތުރުތަކަށް މަގުފަހިވެގެންދާނެއެވެ.
މިޝަންގެ ނުވަވަނަ ދުވަހު އެސްޓްރޮނޯޓުން ކުރާނެ އެންމެ މުހިންމު މަސައްކަތަކީ އުޅަނދުގެ ތެރޭގައި މިހާތަނަށް ބޭނުންކުރި ސާމާނުތައް ރައްކާތެރިކަމާއެކު ބަންދުކޮށް، ކަނޑައެޅިފައިވާ ތަންތަނުގައި ހަރުކުރުމެވެ.
މީގެ އިތުރުން، ދުނިޔޭގެ ޖައްވަށް ވަންނައިރު ބޭނުންކުރާނެ ގޮނޑިތައް ތައްޔާރުކުރުމާއި، މޫސުމީ ރިޕޯޓްތައް ބަލައި، އެނބުރި އައުމުގެ ޓައިމްލައިން މުރާޖަޢާކުރުން މީގެ ތެރޭގައި ހިމެނެއެވެ.
ދުނިޔޭގެ ޖައްވަށް ވަނުމުގެ ކުރިން އުޅަނދުގެ މިސްރާބު ރަނގަޅު ކުރުމަށްޓަކައި "ޓްރެޖެކްޓަރީ ކޮރެކްޝަން ބާން" ގެ މަސައްކަތް އެސްޓްރޮނޯޓުން މިހާރު ވަނީ ފުރިހަމަކޮށްފައެވެ. މިއީ އުޅަނދުގެ އިންޖީނު ބޭނުންކޮށްގެން ދުނިޔެއަށް ވަންނާނެ ސީދާ އޭންގަލް ކަށަވަރުކުރުމަށް ކުރާ ކަމެކެވެ.
ރަނގަޅު އޭންގަލުން ޖައްވަށް ނުވަދެވިއްޖެނަމަ، އުޅަނދު މާގިނަ ވަގުތު ޖައްވުގައި ހޭދަވެ، ހޫނުގަދަވުމުގެ ސަބަބުން އުޅަނދު އަނދައިގެން ދިއުމުގެ ފުރުޞަތު އޮވެއެވެ.
ނާސާއިން ހާމަކޮށްފައިވާ ގޮތުގައި، އޮރަޔަން އުޅަނދު ޕެސިފިކް ކަނޑަށް ތިރިކުރާނެ ކަމަށް ބެލެވެނީ އީ.ޑީ.ޓީ ގަޑިން ހުކުރު ދުވަހުގެ ރޭ 8:07 (ރާއްޖެ ގަޑިން ހޮނިހިރު ދުވަހުގެ ހެނދުނު 5:07) ގައެވެ.
އުޅަނދު ކަނޑަށް ތިރިކުރާތާ ގާތްގަނޑަކަށް ދެ ގަޑިއިރު ތެރޭގައި އެސްޓްރޮނޯޓުން ސަލާމަތްކޮށް، ހެލިކޮޕްޓަރުގައި އެމީހުން އެއްގަމަށް އުފުލުމުގެ މަސައްކަތް ކުރިއަށްދާނެއެވެ.
ނާސާގެ އާޓެމިސް ޕްރޮގްރާމަކީ 1972 ވަނަ އަހަރުގެ އެޕޯލޯ މިޝަންތަކަށްފަހު، އަލުން އިންސާނުން ހަނދަށް ފޮނުވުމަށް ފަށާފައިވާ ބިޔަ މަޝްރޫޢެކެވެ. އާޓެމިސް 2 އަކީ މި ޕްރޮގްރާމްގެ ދަށުން އިންސާނުންނާއެކު ކުރާ ފުރަތަމަ ދަތުރެވެ.
މި މިޝަންގައި އެމެރިކާގެ ތިން އެސްޓްރޮނޯޓުންނާއި ކެނެޑާގެ އެސްޓްރޮނޯޓަކު ބައިވެރިވާއިރު، އެމީހުންގެ މަޤްޞަދަކީ ހަނދުގެ ވަށައިގެން ބުރުޖަހައި، އޮރަޔަން އުޅަނދުގެ ސިސްޓަމްތައް އިންސާނުންނަށް ރައްކާތެރިތޯ ކަށަވަރުކުރުމެވެ.
މިއީ 2022 ވަނަ އަހަރު އިންސާނުންނާ ނުލައި ކުރި އާޓެމިސް 1 މިޝަންގެ ކާމިޔާބީއަށްފަހު ކުރިއަށްގެންދާ ދަތުރެކެވެ. މި މިޝަން ކާމިޔާބުވުމުން، ދެން އޮންނަ އާޓެމިސް 3 މިޝަންގައި އިންސާނުން ހަނދުގެ ފަސްގަނޑަށް ފައިބާނެއެވެ.
މިއީ މުސްތަޤްބަލުގައި އިންސާނުން މާސް އަށް ފޮނުވުމަށް ކުރާ ތައްޔާރީތަކުގެ ބިންގަލެވެ.