ދިވެހިރާއްޖޭގެ އުތުރުގެ ޞިއްޙީ ނިޒާމު ހަރުދަނާކުރުމުގެ މަސައްކަތުގެ ދަށުން، ކުޅުދުއްފުށީ ރީޖަނަލް ހޮސްޕިޓަލުގެ ޚިދުމަތްތައް ފުޅާކޮށް، މުހިންމު އައު ވަސީލަތްތަކެއް އިފްތިތާޙުކޮށްފިއެވެ. ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ހުޅުއްވައިދެއްވި މި ވަސީލަތްތަކުގެ ތެރޭގައި ޒަމާނީ ފެންވަރުގެ އައު އިމަޖެންސީ ރޫމަކާއި، ޑައިލިސިސް ހެދޭނެ ފުޅާ އިންތިޒާމުތަކެއް ހިމެނެއެވެ. މީގެ އިތުރުން، ޞިއްޙީ ވަޒީރު ޢަބްދުﷲ ނާޘިމް އިބްރާހީމް ވަނީ ހޮސްޕިޓަލުގެ ބިންގައި އައު އައިސޮލޭޝަން ފެސިލިޓީއެއް އެޅުމަށް ބިންގާ އަޅުއްވައިދެއްވާފައެވެ. މި މަޝްރޫޢުތަކަކީ ކުޅުދުއްފުށީ ރީޖަނަލް ހޮސްޕިޓަލު ޓާޝަރީ ފެންވަރަށް ތަރައްޤީކުރުމަށް ސަރުކާރުން ކުރަމުންދާ މަސައްކަތުގެ މުހިންމު ބައެކެވެ.
- ކުޅުދުއްފުށީ ރީޖަނަލް ހޮސްޕިޓަލުގެ އައު އީއާރާއި ޑައިލިސިސް އެކްސްޓެންޝަން އިމާރާތް ރަސްމީކޮށް ހުޅުވުން
- އައު ޑައިލިސިސް ޔުނިޓުން އެއްފަހަރާ 9 މީހުންނަށް ޚިދުމަތް ދެވޭނެ އިންތިޒާމު ހަމަޖެއްސުން
- އައު އިމަޖެންސީ ރޫމުގައި 6 އެނދާއެކު ޚިދުމަތް ދިނުން ފުޅާކުރުން
- އައިސޮލޭޝަން ފެސިލިޓީ، 800 މީހުންގެ އޮޑިޓޯރިއަމް އަދި ކަރަންޓީނު ބައި ހިމެނޭ އައު އިމާރާތުގެ ބިންގާ އެޅުން
- ހޮސްޕިޓަލު ޓާޝަރީ ފެންވަރަށް ތަރައްޤީކުރުމުގެ މަސައްކަތް ހަލުވިކަމާއެކު ކުރިއަށް ދިއުން
ކުޅުދުއްފުށީ ރީޖަނަލް ހޮސްޕިޓަލުގެ ޑައިލިސިސް އެކްސްޓެންޝަން އިމާރާތާއި އައު އިމަޖެންސީ ރޫމް (އީއާރު) ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު މިއަދު ހުޅުއްވައިދެއްވައިފިއެވެ.
މި ރަސްމިއްޔާތަށް ރައީސުލްޖުމްހޫރިއްޔާގެ އަނބިކަނބަލުން ވަޑައިގަތުމުން އެކަމަނާއަށް މަރުޙަބާ ދެންނެވީ އެ ހޮސްޕިޓަލުގެ ޗީފް އެގްޒެކެޓިވް އޮފިސާ ނާޠިމާ ޢަލީއެވެ. މިއަދު ޚިދުމަތް ފުޅާކުރެވުނު ޑައިލިސިސް އެކްސްޓެންޝަން އިމާރާތުގައި އެއްފަހަރާ ނުވަ މީހުންނަށް ޑައިލިސިސް ހެދޭނެ އިންތިޒާމު ވަނީ ހަމަޖައްސާފައެވެ. އަދި އައު އީއާރުގައި ހަ އެނދާއެކު ޚިދުމަތް ވަނީ ފުޅާކޮށްފައެވެ.
މީގެ އިތުރުން، އެ ހޮސްޕިޓަލުގައި އަލަށް އިމާރާތްކުރާ އައިސޮލޭޝަން ފެސިލިޓީގެ ބިންގާ ވެސް މިއަދު ވަނީ އަޅުއްވާފައެވެ. މި އިމާރާތުގެ ބިންގާ އަޅުއްވައިދެއްވީ ޞިއްޙީ ވަޒީރު ޢަބްދުﷲ ނާޘިމް އިބްރާހީމެވެ. މި ފެސިލިޓީގައި ޕްރައިވެޓް ރޫމްތަކާއި، 800 މީހުންގެ ޖާގައިގެ އޮޑިޓޯރިއަމެއްގެ އިތުރުން ކޮންވަޓިބަލް ކަރަންޓީނު ފެސިލިޓީއެއް ހުންނާނެކަމަށް ސަރުކާރުން މަޢުލޫމާތުދެއެވެ.
އަތޮޅުތެރޭގެ ޞިއްޙީ ޚިދުމަތް ފުޅާކޮށް ތަރައްޤީކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، ކުޅުދުއްފުށީ ރީޖަނަލް ހޮސްޕިޓަލަކީ ޓާޝަރީ ފެންވަރަށް ތަރައްޤީކުރަމުން އަންނަ މަރުކަޒެކެވެ.
