އިސްރާއީލު ސިފައިން ޣައްޒާގައި ހައްޔަރުކުރި ފަލަސްޠީނު މީހެއްގެ ފަރާތުން އިޢުތިރާފު ހޯދުމަށްޓަކައި، އޭނާގެ ކުރިމަތީގައި އޭނާގެ އެއް އަހަރުގެ ތުއްތު ދަރިފުޅަށް ބޮޑެތި އަނިޔާތަކެއް ދީފިއެވެ.
ފަލަސްޠީނުގެ ނޫސްވެރިޔާ އުސާމާ އަލްކަހްލޫތާ ޙަވާލާދީ ފަލަސްޠީނު ޓީވީން ރިޕޯޓުކޮށްފައިވާ ގޮތުގައި، މި ހާދިސާ ހިނގާފައިވަނީ މެދުތެރޭ ޣައްޒާގެ އަލްމަޣާޒީ ރެފިއުޖީ ކޭމްޕް ކައިރީގައެވެ. އާމްދަނީ ހޯދުމަށް ގެންގުޅުނު އަސް މަރުވުމުގެ ސަބަބުން ނަފްސާނީ ގޮތުން ފުން އަސަރުތަކެއް ކޮށްފައިވާ އުސާމާ އަބޫ ނައްސާރު ނަމަކަށް ކިޔާ މީހަކު، އޭނާގެ 18 މަހުގެ ދަރިފުޅު ކަރީމް ގޮވައިގެން ސާމާނު ގަންނަން ނުކުމެ އުޅެނިކޮށް، އިސްރާއީލު ސިފައިން ވަނީ އޭނާ ހުއްޓުވައިފައެވެ. އަދި ދަރިފުޅު ބިންމަތީގައި ބޭއްވުމަށްފަހު ކައިރީގައި ހުރި ޗެކްޕޮއިންޓަށް އައުމަށް އެންގުމަށްފަހު، އޭނާގެ އަންނައުނު ބާލުވައި ސުވާލުކުރަން ފެށިއެވެ.
މަންޒަރު ދުށް މީހުންނާ ޙަވާލާދީ ރިޕޯޓުތައް ބުނާގޮތުން، ބައްޕަގެ ކުރިމަތީގައި އިސްރާއީލު ސިފައިން ވަނީ ތުއްތު ކަރީމަށް އަނިޔާކޮށްފައެވެ. އޭގެ ތެރޭގައި ސިނގިރޭޓުން ފައި ފިއްސުމާއި، ފަޔަށް މޮހޮރެއް ޖެހުން ހިމެނެއެވެ. ފަލަސްޠީނު ޓީވީން ވަނީ ކަރީމަށް ލިބިފައިވާ އަނިޔާތައް ފެންނަ ވީޑިއޯއެއް ވެސް ޢާންމުކޮށްފައެވެ. މެޑިކަލް ރިޕޯޓުން ކަށަވަރުކޮށްދޭ ގޮތުގައި، ކަރީމްގެ ފައިގައި ސިނގިރޭޓުން ފިއްސާފައިވާ ނިޝާންތަކާއި މޮހޮރު ޖެހުމުގެ ސަބަބުން ލިބިފައިވާ ޒަޚަމްތައް ހުއްޓެވެ.
ގާތްގަނޑަކަށް 10 ގަޑިއިރު ފަހުން، އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއާރުސީ) މެދުވެރިކޮށް ކަރީމް ވަނީ އޭނާގެ ޢާއިލާއާ ޙަވާލުކޮށްފައެވެ. ނަމަވެސް އޭނާގެ ބައްޕަ އަދިވެސް ހުރީ އިސްރާއީލުގެ ބެލުމުގެ ދަށުގައެވެ. ބައްޕަ މިނިވަންކޮށްދިނުމަށާއި އޭނާއަށް ބޭނުންވާ ފަރުވާ ހޯދައިދިނުމަށް އެހީތެރިވެދިނުމަށް އެދި ޢާއިލާއިން ވަނީ ބައިނަލްއަޤުވާމީ ޖަމާޢަތްތަކަށް ގޮވާލައިފައެވެ.
އޮކްޓޯބަރު 2025 ގައި ޤާއިމުކުރި ހަމަލާބަދަލުކުރުން ހުއްޓައިލުމުގެ އެއްބަސްވުމާ އިސްރާއީލުން އެތައް ފަހަރަކު ޚިލާފުވެފައިވާއިރު، އޭގެ ފަހުން ވެސް 680 އަށްވުރެ ގިނަ ފަލަސްޠީނު މީހުން ވަނީ ޝަހީދުކޮށްލައިފައެވެ. އަދި އޮކްޓޯބަރު 2023 އިން ފެށިގެން އިސްރާއީލުން ހިންގަމުންދާ ޤަތުލުޢާންމުގައި ޝަހީދުވި މީހުންގެ އަދަދު 72,000 އަށްވުރެ މައްޗަށް އަރާފައިވާއިރު، 171,000 އަށްވުރެ ގިނަ މީހުން ވަނީ ޒަޚަމްވެފައެވެ.