މެދުއިރުމަތީގައި ކުރަމުންދާ ހަނގުރާމައިގެ ސަބަބުން ތެލުގެ ސަޕްލައިއަށް ބުރޫއަރާފައިވާތީ، ކުއްލި ހާލަތުގައި ބޭނުންކުރުމަށް ރައްކާކޮށްފައިވާ ތެލުގެ ރިޒާވުން އޭޝިއާގެ ގައުމުތަކަށް ވަގުތުން ތެޔޮ ފޯރުކޮށްދޭން ފަށާނެ ކަމަށް އިންޓަނޭޝަނަލް އެނާޖީ އޭޖެންސީ (އައިއީއޭ)އިން މިއަދު ބުނެފިއެވެ.
އައިއީއޭއިން ނެރުނު ބަޔާނެއްގައި ބުނެފައިވަނީ، މެންބަރު ގައުމުތަކުގެ އެއްބާރުލުމާ އެކު ދޫކުރާ މި ތެޔޮ، ޔޫރަޕާއި އެމެރިކާ ބައްރަށް ލިބެން ފަށާނީ މި މާރިޗު މަހުގެ ނިޔަލަށް ކަމަށެވެ. ނަމަވެސް، އޭޝިއާގެ ގައުމުތަކަކީ މެދުއިރުމަތީގެ ތެލަށް އެންމެ ބޮޑަށް ބަރޯސާވާ ގައުމުތަކަށްވުމާ އެކު، އެ ސަރަހައްދަށް ވަގުތުން ތެޔޮ ފޯރުކޮށްދިނުމަކީ މުހިންމު ކަމެއް ކަމަށް އެ އޭޖެންސީން ފާހަގަކުރިއެވެ.
އައިއީއޭއިން ސިފަކުރާ ގޮތުގައި މިއީ ތާރީޚުގައި ވެސް ތެލުގެ ބާޒާރަށް ކުރިމަތިވި އެންމެ ބޮޑު ހުއްޓުމެވެ. މިކަން މެދުވެރިވީ މެދުއިރުމަތީގެ ހަނގުރާމައިގެ ސަބަބުން، ދުނިޔޭގެ ތެލުގެ ވިޔަފާރީގެ މައި ދޮރާށި ކަމަށްވާ ހުރުމޫޒު ކަނޑުއޮޅި ބަންދުވުމާ ގުޅިގެންނެވެ.
މީގެ އިތުރުން، ނިމިދިޔަ ހަފުތާ ބަންދުގައި އެމެރިކާއިން އީރާނުގެ މައި ތެޔޮ އެކްސްޕޯޓުކުރާ މަރުކަޒު ކައިރީގައިވާ އަސްކަރީ އަމާޒުތަކަށް ހަމަލާދިނުމާ ގުޅިގެން، ހުކުރު ދުވަހު ބާޒާރު ބަންދުވިއިރު ތެޔޮ ފީފާއެއްގެ އަގު ވަނީ 100 ޑޮލަރަށް ވުރެ މައްޗަށް އަރާފައެވެ.
"މާރިޗު 16 ވަނަ ދުވަހުން ފެށިގެން މީގެ ކުރިން ދުވަހަކު ވެސް ބާޒާރަށް ނުނެރޭ މިންވަރަށް އިތުރު ތެޔޮ ނެރެވޭނެ،" އައިއީއޭގެ އެގްޒެކެޓިވް ޑިރެކްޓަރު ފާތިހް ބިރޯލް "އެކްސް"ގައި ކުރެއްވި ޕޯސްޓެއްގައި ވިދާޅުވިއެވެ.
"ނަމަވެސް، ތެލުގެ ސަޕްލައި އާންމު ހާލަތަކަށް ގެނައުމަށްޓަކައި ހުރުމޫޒު ކަނޑުއޮޅި ހުޅުވުމަކީ ކޮންމެހެން މުހިންމު ކަމެއް،"
އައިއީއޭއިން ހާމަކޮށްފައިވާ ގޮތުގައި، މިހާރު ދޫކުރަން ނިންމާފައިވާ ތެލުގެ 72 އިންސައްތައަކީ ސާފުނުކުރާ ތެލެވެ.
މެދުއިރުމަތީގެ މަސްރަހު އިތުރަށް ގޯސްވަމުންދާތީ، ކުރިއަށް އޮތް ހަފުތާއަކީ ތެލުގެ ބާޒާރަށް އިންތިހާއަށް އުނދަގޫ އަދި ހަލަބޮލި ދުވަސްތަކަކަށް ވާނެކަމަށް ވިޔަފާރިވެރިން ލަފާކުރެއެވެ.
އޭޝިއާގެ ގައުމުތައް ކަމަށްވާ ރާއްޖޭގެ އިތުރުން އިންޑިއާ އާއި ސްރީލަންކާއާއި އެހެން ބައެއް ގިނަ ގައުމުތަކުން ވެސް ވަނީ ތެލުގެ އަގު ބޮޑު ކޮށްފައެވެ. އަދި، ލަންކާގައި ވަނީ ތެޔޮ ވިއްކާ މިންވަރު ލިމިޓް ކޮށްފައެވެ.
ތެލުގެ އިތުރުން ކައްކާ ގޭސް ލިބުން ވެސް ގައުމުތަކުގައި ވަނީ ދަތިވެފައެވެ. އޭގެ ތެރޭގައި ރާއްޖެއާއި އިންޑިއާ އަދި ލަންކާ ވެސް ހިމެނެއެވެ.