ރާއްޖޭގައި ބައިނަލްއަގުވާމީ ފުޓްބޯޅަ ފެސިލިޓީއެއް ގާއިމްކުރުމަށް ސަރުކާރުން އިއުލާން ކުރި ޕްރޮޖެކްޓަށް، ފުޓްބޯލް އެސޯސިއޭޝަން އޮފް މޯލްޑިވްސްއަށް ހުޅުމާލޭން ދިން ބިން އެކި ފަރާތްތަކަށް ކުއްޔަން ދީގެން ލިބެން ޖެހޭ ފައިސާގެ ތެރެއިން ގާތްގަނޑަކަށް 30 މިލިއަން ރުފިޔާ ގެއްލިފައިވާކަން ފާހަގަކޮށް، އެ ފައިސާއާ ހަވާލުވި ފަރާތްތަކުގެ ތެރޭގައި މިނިސްޓްރީ އޮފް ޔޫތު އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރު އަދި އެފްއޭއެމްގެ ކުރީގެ ޖެނެރަލް ސެކެޓްރީ ހުސެއިން ޖަވާޒް ހިމެނޭ ކަމަށް އޮޑިޓް އޮފީހުން ބުނެފިއެވެ.
ހުޅުމާލޭގައި ފުޓްބޯލް ޓްރެއިނިން ފެސިލިޓީއެއް ގާއިމްކުރަން ދިން ބިން، އެކި ފަރާތްތަކަށް ދީގެން ލިބުނު ފައިސާއިން ބޮޑު ބައެއް ގެއްލިފައިވާކަން، އަދި އެ ފައިސާއާ ހަވާލުވީ ފަރާތްތަކުގެ ތެރޭގައި ޖަވާޒު ހިމެނޭކަމަށް އޮޑިޓު އޮފީހުން ބުނީ، އެ ބިން ކުއްޔަށް ދޫކުރުމުގެ މުއާމަލާތްތަކާ ގުޅޭ ގޮތުން ހެދި ޚާއްސަ އޮޑިޓެއްގައެވެ.
މި ޚާއްސަ އޮޑިޓުގައި ބުނެފައިވާ ގޮތުގައި އެ ބިން ކުއްޔަށް ދީގެން، ގާތްގަނޑަކަށް 52 މިލިއަން ރުފިޔާ އެފްއޭއެމަށް ލިބިފައިވާނެ ކަމަށް ބެލެވެއެވެ. އޭގެތެރެއިން، ގާތްގަނޑަކަށް 30 މިލިއަން ރުފިޔާ ގެއްލިފައިވާކަން އޮޑިޓްގައި ފާހަގަކޮށްފައިވެއެވެ.
އޮޑިޓްގައި ފާހަގަކޮށްފައިވާ ގޮތުގައި އެ ފައިސާއާ ހަވާލުވެފައިވަނީ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް، ފައިނޭންސް ހެޑް މުހައްމަދު އަގީލް އަދި ޖެނެރަލް ސެކެއްޓްރީ ހުސެއިން ޖަވާޒެވެ.
މީގެ ތެރެއިން ބައްސާމްވަނީ އެފްއޭއެމްގެ ފައިސާއަށް ހިޔާނަތްތެރިވީ މައްސަލައިގައި 32 އަހަރަށް ޖަލަށްލާފައެވެ. އަގީލްގެ މައްޗަށް ވެސް ދައުވާކޮށްފައިވާއިރު، ފިލައިގެން ރާއްޖޭން ބޭރުގައި އުޅެނިކޮށް އޭނާވަނީ ހައްޔަރުކޮށްފައެވެ.
މި ތިން މީހުންގެ ތެރެއިން މިނިވަންކޮށް މި ވަގުތު ހުރީ ޖަވާޒު އެކަންޏެވެ. ޖަވާޒަކީ މި ސަރުކާރުގެ ޑެޕިއުޓީ މިނިސްޓަރެކެވެ. އެފްއޭއެމުން އިސްތިއުފާ ދިންތާ ދުވަސްކޮޅެއްގެ ތެރޭގައި ޖަވާޒުއަށްވަނީ ޑެޕިއުޓީ މިނިސްޓަރުކަން ދީފައެވެ.
ހާއްސަ އޮޑިޓްގެ އެނެކްސް ތިނެއްގައި ފާހަގަކޮށްފައިވާ ގޮތުގައި އަމިއްލަ ކުންފުންޏަކުން ތިން ފަހަރެއްގެ މަތިން ނަގުދު ފައިސާއިން ދިން 1.2 މިލިއަން ރުފިޔާއާ ޖަވާޒުވަނީ ހަވާލުވެފައެވެ.
އޮޑިޓާ ޖެނެރަލް ސޮއިކުރައްވައި ނެރުއްވާފައިވާ ހާއްސަ އޮޑިޓްގައިވަނީ، އެފްއޭއެމުން ގެއްލުނު ފައިސާ ހޯދުމަށް އަދި އެކަމުގައި ޒިންމާވާ ފަރާތްތަކާމެދު ފިޔަވަޅު އެޅުމަށް ފުލުސް އޮފީހަށް އެންގުމަށް ލަފާ ދެއްވާފައެވެ.