ކައުންސިލްތަކުގެ ހުރަސްއެޅުމާއެކު ރާއްޖޭގެ 57 ރަށެއްގައި މަޝްރޫތަކުގެ މަސައްކަތް ހުއްޓާލުމުން، އެ ރަށްތަކުގެ މައުލޫމާތު ހޯދުމަށް އާރްޓީއައި ހުށަހެޅުމުން އަދިވެސް އެ މައުލޫމާތު ނުލިބޭ ކަމަށާއި އެ މައުލޫމާތު ހާމަކުރަން ރައީސް ޑރ. މުހައްމަދު މުއިއްޒަށް ކެރިވަޑައިނުގަންނަވާނެ ކަމަށް އެމްޑީޕީއިން މިއަދު ބުނެފިއެވެ.
އެމްޑީޕީއިން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީއިން ވަނީ ލޯކަލް ކައުންސިލްތަކަކީ އެއްވެސް ތަނެއް ނޫން ކަމަށް ދޭހަވާ މޭރުމަކުން ސަރުކާރުން ވާހަކަދައްކަމުން އަންނަކަން ފާހަގަވެފައިވާ ކަމަށް ބުނެފައެވެ.
މިއަދު ބޭއްވި ނޫސްވެރީންގެ ބައްދަލުވުމުގައި އެ ޕާޓީގެ ކައުންސިލް އިންތިޚާބުގެ ކެމްޕެއިން ތަރުޖަމާނު އަދި ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދު ވިދާޅުވީ، ކައުންސިލުން ހުރަސްއަޅައިގެން ކަމަށް ބުނެ މަޝްރޫއުތައް ހުއްޓާލި ކަމަށް ރައީސް ވިދާޅުވި 57 ރަށުގެ މައުލޫމާތު ހޯދުމަށް އާރްޓީއައި ހުށަހެޅުމުން އެ މައުލޫމާތު އަދިވެސް ލިބިފައި ނުވާކަމަށެވެ.
އަޅުގަނޑު ރައީސަށް ޗެލެންޖުކޮށްފައި މި ދަންނަވަނީ، އެންމެ ރަށެއްގެ މައުލޫމާތު ވެސް ހާމަކުރާކަށް ނުކެރޭނެއޭ. އެއީ ސީދާ ކައުންސިލްތަކަށް ފުރައްސާރަކުރުމަށް ޓަކައި، ކައުންސިލްތަކަށް ޖެއްސުން ކުރުމަށް ޓަކައި ރައީސުލްޖުމްހޫރިއްޔާ ދައްކަވާ ވާހަކަ. ކައުންސިލް އިންތިޚާބުގެ އެމްޑީޕީގެ ކެމްޕެއިން މެނޭޖަރު އަބްދުﷲ ވަހީދު
ވަހީދު ވިދާޅުވި ގޮތުގައި ރައީސް އެފަދަ ވާހަކަ ދައްކަވަނީ މި ސަރުކާރުގެ ނާގާބިލްކަން ފޮރުވަން ވެގެންނެވެ.
އެހެންކަމުން އެ ކައުންސިލްތަކުގެ މައުލޫމާތު ހާމަކުރުން ސަރުކާރުން އަވަސް ކުރާނެ ކަމަށް އުންމީދު ކުރައްވާކަމަށް އޭނާ ވަނީ ވިދާޅުވެފައެވެ.
އޭނާ ވަނީ މީގެ ކުރީގެ އެއްވެސް އިންތިޚާބަކުން ނުފެންނަ ވަރަށް މި އިންތިޚާބަށް ސަރުކާރުގެ ނުފޫޒު ފޯރުވަމުންދާ ކަމަށް ވިދާޅުވެފައެވެ. އަދި ސަރުކާރުގެ މުއައްޒަފުން ބޭނުންކޮށްގެން މި އިންތިޚާބަށް ނުފޫޒު ފޯރުވުމަށް ކޮށްފައިވާ ކަންކަމުގެ ހެކި ލިބަފައިވާ ކަަމަށް އޭނާ ވިދާޅުވިއެވެ. އެގޮތުން ވަހީދު ވަނީ އެމްޑީޕީގެ ކެންޕެއިން ޕޯސްޓަރުތަކާއި ބިލްބޯޑުތައް އެކި ރައްރަށުގައި ހުންނައިރު، ޕޯސްޓަރުތަކާއި ބިލްބޯޑުތަކަށް ސަރުކާރުން ގެއްލުން ދީފައިވާކަން ފާހަގަކޮށްފައެވެ.
އެމްޕީއެލްގެ މުއައްޒަފުންނާނި ވަސީލަތް ބޭނުންކޮށްގެން ރައީސް އޮފީހުގެ މިނިސްޓަރު އަލީ އާރިފްގެ ކޮއްކޮ އަހުމަދު އާރިފް އާދަމް އެމްޕީއެލްގެ ފްލީޓް އޮޕަރޭޝަން މެނޭޖަރެއްގެ ގޮތުގައި. އެ ބޭފުޅާ އަންގަވައިގެން ކުރާ މަސައްކަތެއްގެ ގޮތުގައި ހުޅުމާލޭގައި ޕީއެންސީގެ ޕޯސްޓަރު ނެގުމުގެ މަސައްކަތް ކުރަމުންދޭ، ކައުންސިލް އިންތިހާބުގެ ކެމްޕެއިން މެނޭޖަރު އަބްދުﷲ ވަހީދު
ސަރުކާރުން މީގެކުރިން ވަނީ ބައެއް ރަށްރަށުގައި މަޝްރޫއުތައް ނުފެށި ލަސްވަނީ އެ ރަށްރަށުގެ ކައުންސިލްތަކުން އެއްބާރުލުން ނުލިބޭތީ ކަމަށް ބުނެފައެވެ.