ގާތްގަނޑަކަށް ހަތް ކިލޯގެ މަސްތުވާތަކެތި އެތެރެކުރި އިންޑިޔާ ދެ ފިރިހެނުން ހައްޔަރުކޮށްފިއެވެ.
މި ދެ މީހުން ހައްޔަރުކޮށް، ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން އެ ދެ މީހުންވެސް، އަންނަ ހޯމަ ދުވަހާއި ހަމައަށް ބަންދުކޮށްފައި ބޭތިއްބުމަށްވަނީ ކޯޓުން އަމުރުކޮށްފައެވެ.
ހައްޔަރުކޮށްފައިވާ އިންޑިޔާ ދެ މީހުންނަކީ، އުމުރުން 21 އަހަރުގެ މީހަކާއި އުމުރުން 19 އަހަރުގެ މީހެކެވެ.
މި މީހުންގެ ބަންދު އަމުރުން އެނގޭ ގޮތުގައި އެ މީހުންގެ ލަގެޖުންވަނީ ހަޝިޝް އޮއިލް ފުޅިތަކެއް ފެނިފައެވެ. އޭގެ ވަގުތީ ބަރުދަނުގައި 6.7 ކިލޯ ހުރިކަން ބަންދު އަމުރުގައ ގާޒީވަނީ ފާހަގަ ކުރައްވާފައެވެ.
ދެ މީހުންވެސްވަނީ ވަކީލުން އައްޔަން ކުރަން ބޭނުން ކަމަށް ބަންދު މަޖިލީހުގައި ބުނެފައެވެ.
ގާތްގަނޑަކަށް ހަތް ކިލޯގެ މަސްތުވާތަކެއްޗާއެކު އިންޑިޔާ ދެ ފިރިހެނުން ހައްޔަރުކޮށްފައިވާއިރު، މެލޭޝިޔާ އަންހެނަކާއި ދިވެހި ދެ ފިރިހެނުން، ދެ ކިލޯގެ މަސްތުވާތަކެއްޗާއެކު މި ހަފްތާގައި ހައްޔަރުކޮށްފައިވެއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ރަންޖިނި ޖީވަނަންތަން، މެލޭޝިއާ، (38އ) އާއި ގދ. ވާދޫ / ފުރުސަތު، ލޫޠު އިބްރާހީމް (29އ) އާއި ގއ. ދާންދޫ / ސަންލައިޓްވިލާ، އަޙްމަދު ރިޝްމާހް (21އ) އެވެ.
މި ތިންމީހުންގެ ތެރެއިން ރަންޖިނި ޖީވަނަންތަން ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. ލޫޠު އިބްރާހީމްއާއި އަޙްމަދު ރިޝްމާހް ހައްޔަރުކޮށްފައިވަނީ މާލެއިންނެވެ.
މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ރަންޖިނި ޖީވަނަންތަންއާއި ލޫޠު އިބްރާހީމް 15 ދުވަހަށް އަދި އަޙްމަދު ރިޝްމާހް ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.