ކުދި ޖާގަތަކުގައި ދިރިއުޅެން ޖެހިފައިވާ، މާލެއަށް ނިސްބަތްވާ މީހުން ދެނެގަނެ، އެ މީހުންނަށް ބޯހިޔާވަހިކަން ފޯރުކޮށްދޭން މަސައްކަތްތައް ކުރަމުން އަންނަ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ރައީސް ޑރ. މުޙައްމަދު މުއިއްޒު މާލޭގެ ގެތަކަށް ޒިޔާރަތްކުރައްވާއިރު، މާލެއަށް ނިސްބަތްވާ ބައެއް މީހުންނަށް، ތަފާތު ސަބަބުތަކާ ހެދި ގެ ނުހެދި ހުރުމާއި ގެ ބައިބައި ކުރަން ޖެހިފައިވާކަން ފާހަގަވާ ކަމަށެވެ.
އެ އާއިލާތަކަކީ މާލޭގައި ޒަމާނުއްސުރެ އޮތް ބިމުގެ ދަތިކަމާ ހެދި އިތުރު ހައްލެއް ނުލިބިފައިވާ އާއިލާތައް ކަމަށާއި، އެ މީހުންނަށް ސަރުކާރުން ކުރިއަށް ގެންދާ ޕްރޮގްރާމްތަކުގެ ތެރެއިން ވެސް ބޯހިޔާވަހިކަމުގެ ފުރުސަތު ނުލިބޭ ކަމަށް މިނިސްޓަރު ވިދާޅުވިއެވެ.
"އެކަކަށް ވަދެވޭ ވަރުގެ ހަނި ގޯޅިތައް ވެސް އެބަހުރި، އެކަކަށް އަރިއަކަށް ހުރެގެން ވަންނަން ޖެހޭ ފަދަ ގޯޅިތައް ވެސް އަޅުގަނޑުމެންނަށް ފެނިފައި އެބަހުރި، އެއްވެސް ކަހަލަ ވެންޓިލޭޝަނެއް ނެތް، އިންސާނުންނަށް އެކަށީގެންނުވާ ފަދަ، ދިރުނޫޅެވޭ ތަންތަން ވެސް އެބަހުރި،" އޭނާ ވިދާޅުވިއެވެ.
މުއްތަލިބު ވިދާޅުވީ، ސަރުކާރުގެ ވިސްނުމަކީ އެގޮތަށް ހުރި ތަންތަން ދެނެގަނެ، އެ އާއިލާތަކުގެ ހާލަތު ރަނގަޅުކުރެވޭނެ ގޮތަކަށް ކަންތައްތައް ކުރިއަށްގެންދިޔުން ކަމަށެވެ.
މިނިސްޓަރު މުއްތަލިބު: ކުދި ޖާގަތަކުގައި ދިރިއުޅޭ މާލޭ މީހުން ދެނެގަނެ، ބޯހިޔާވަހިކަން ފޯރުކޮށްދޭން މަސައްކަތް ކުރާ ކަމަށް ވިދާޅުވި -- ފޮޓޯ/ ރައީސް އޮފީސް
"މާނައަކީ ވަކި އުސޫލެއް ހަދައިގެން އެޕްލައި ކުރުމުގެ ބަދަލުގައި އެފަދަ ތަންތަން ފާހަގަކޮށް، އެފަދަ ގޮތަކަށް ނިކަމެތިކޮށް ތިބި އާއިލާތައް ޑޮކިއުމެންޓް ކުރެވިގެން، އެ އާއިލާތަށް ތިބި ހާލަތުން ނެރުން،" މިނިސްޓަރު ވިދާޅުވިއެވެ.
އޭނާ ވިދާޅުވީ، ކުދި ތަންތަނުގައި ދިރިއުޅެން ޖެހުމުން އިޖުތިމައީ މައްސަލަތައް ވެސް ޖެހޭ ކަމަށާއި އެ މައްސަލަތައް ހައްލު ވާނީ ނިކަމެތިކޮށް އުޅޭ އާއިލާތައް ދެނެގަނެ، ސީދާ އެ އާއިލާތަކަށް އެހީވުމުން ކަމަަށެވެ.
އެހެންވެ، އެ ކަމަށްޓަކައި ސިޔާސަތުތަކަށް ގެންނަން ޖެހޭ ބަދަލުތައް ގެނައުމުގެ މަސައްކަތް ސަރުކާރުން ކުރާ ކަމަށް މުއްތަލިބު ވިދާޅުވިއެވެ.
މާލޭން ގޯތި ލިބިފައިވާ މީހުން، ދުވަސްވީ، ކުދިކުދި ޖާގަތަކުގައި ގިނަ އަދަދެއްގެ މީހުން ތޮއްޖެހިގެން ދިރިއުޅުމުގެ ކަންބޮޑުވުން އަބަދު ވެސް އޮވެއެވެ. އަދި، ސަރުކާރުގެ ބައެއް ސްކީމްތަކުން ފުލެޓާއި ގޯތި ދިނުމުގައި، މާލޭން ބިން ލިބިފައިވާ މީހުން އިސްތިސްނާ ވާތީ އެ ކަންބޮޑުވުން ވެސް ގިނަ ބަޔަކު ފާޅުކުރެއެވެ.