ސަރުކާރުގެ ޚަރަދުގައި އެންމެ ގިނައިން ދަރިވަރުން ކިޔަވާ ގައުމުތަކުގެ ސްޓައިޕެންޑް އަވަހަށް މުރާޖާ ކުރެވޭތޯ ބަލާނެ ކަމަށާއި, ދަރިވަރުންނަށް ފައިސާ ދޫކުރުމުގެ މަސައްކަތް ކުރިއަށް ވުރެ ރަނގަޅުވެފައިވާ ކަމަށް ގަބޫލުކުރައްވާ ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެއެވެ.
ދައުލަތުގެ އެހީގައި ބޭރުގައި ކިޔަވާ ދަރިވަރުންނަށް ސްޓައިޕެންޑު ނުލިބި ލަސްވާ މައްސަލަ ދޭތެރެއަކުން ފެންމަތިވެއެވެ. އެ މައްސަލައަށް ހައްލެއް ގެނައުމަށް މިދިޔަ މަހު ތިނެއްގައި "ކުރި" ނަމުގައި ޕޯޓަލެއް ވެސް ވަނީ ހަދާފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، ބައެއް ފަހަރަށް ދަރިވަރުންނަށް ފައިސާ ފޮނުވާއިރު ލަސްތަކެއް ދިމާވާ ކަމަށެވެ. ގިނަ ފަހަރަށް އެހެން ވަނީ، ޔުނިވާސިޓީތަކުން އިންވޮއިސް ލިބޭއިރު، ފައިސާ ފޮނުވާ މުއްދަތު ހަމަވާން ހަފުތާއަކަށް ވެފައި އޮންނާތީ ކަމަށް ހައިދަރު ވިދާޅުވިއެވެ.
ދަރިވަރުންތަކެއް: ދަރިވަރުންނަށް ފައިސާ ދިނުމުގައި ކުރިއަށް ވުރެ ރަނގަޅު ކަމަށް މިނިސްޓަރު ވިދާޅުވި -- ސަން ފޮޓޯ: ފަޔާޒު މޫސާ
އޭނާ ފާހަގަކުރެއްވި ގޮތުގައި، ދަރިވަރުންނަށް ފައިސާ ދޫކުރަނީ ތިން އިދާރާއަކުން ބަލާފައެވެ. ނަމަވެސް، މިހާރު އެ މައްސަލަ ދިމާވާ މިންވަރު ކުރިއަށް ވުރެ މަދު ކަމަށް މިނިސްޓަރު ގަބޫލުކުރައްވައެވެ.
އާންމު ގޮތެއްގައި އަޅުގަނޑު ދެކެނީ މިހާރު ކުރިއަށް ވުރެ ބޮޑުތަން މިހާރު ރަނގަޅުވެއްޖެހެން ޕޭމަންޓުތައް ދަރިވަރުންނަށް ދިނުމުގައި. ބައެއް ފަހަރަށް ދަރިވަރުންނަށް ޕޭމަންޓު ދޭންވާ މުއްދަތުގެ ދެ ހަފުތާ ކުރިން ވެސް އަޅުގަނޑުމެންނަށް ޕޭމަންޓުތައް ދެވިފައި އެބަހުރިހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު
އޭގެއިތުރަށް، ދަރިވަރުންނަށް ފައިސާ ފޮނުވަން ޖެހޭ މުއްދަތުގެ ދެ ހަފުތާ ކުރިން، 75 އިންސައްތަ ދަރިވަރުންނަށް މި އަހަރު ފައިސާ ދެމުން އަންނަކަން މިނިސްޓަރު ފާހަގަކުރެއްވިއެވެ.
މިދިޔަ ޖަނަވަރީ މަހު މިނިސްޓަރު ވަނީ، ސަރުކާރުން ދޫކުރާ ލޯނު ސްކީމުގެ ދަށުން ކިޔަވާ ދަރިވަރުންނަށް އެއް ގޮތަކަށް ސްޓައިޕެންޑުގެ ގޮތުގައި ފައިސާ ދޭތާ ހަތް ވަރަކަށް އަހަރުވެއްޖެ ކަމަށާއި އެ ސްޓައިޕެންޑުތައް މުރާޖާކުރުމުގެ މަސައްކަތް ފަށާފައިވާ ކަމަށް ވިދާޅުވެފައެވެ.
އެ ކަމުގެ އިތުރު ތަފުސީލުތަކެއް މިއަދު ހައިދަރު ވަނީ ދެއްވާފައެވެ. މިގޮތުން، ދިރިއުޅުމުގެ ޚަރަދުތައް ކޮންމެ ގައުމެއްގައި މަތިވަމުން އަންނާތީ ސްޓައިޕެންޑުތައް މުރާޖާކުރާއިރު އެ ކަމަށް ބަލާނެކަން މިނިސްޓަރު ހާމަކުރެއްވިއެވެ.
ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު -- ފޮޓޯ/ ހަޔާ އެޑިއުކޭޝަން މިނިސްޓްރީ
އެނގިވަޑައިގަންނަވާނެ ކޮންމެ ގައުމެއްގައި ވެސް އޮންނާނެ ސްޓޫޑެންޓު ވިސާ ދޫކުރުމުގައި ބަލާ މިންގަނޑުތަކެއް. [ބަލާނެ] މިހާވަރަށް ކުއްޖާ އަތުގައި ފައިސާ ހުންނަން ޖެހޭނެޔޭ ވިސާ ދޫކުރުމުގެ ކުރިން. އެހެންވީމަ އެ ކަންތައްތަކަށް އަޅުގަނޑުމެން ބަލާނަން އެއް ކަމަކަށްހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު
އެއާއެކު، އެންމެ ގިނައިން ދަރިވަރުން ކިޔަވާ ގައުމުތަކުގެ ސްޓައިޕެންޑު މުރާޖާކުރުން އަވަހަށް ނިންމޭތޯ ބަލާނެ ކަމަށާއި އިތުރަށް ހުރި ގައުމުތަކުގައި އެ އުސޫލުން ކަންކަން ނިންމާނެ ކަމަށް އޭނާ ވިދާޅުވިއެވެ.
ފާހަގަކުރެވޭ ގޮތުގައި، ދަރިވަރުންގެ ލޯނަށް މިދިޔަ ފެބްރުވަރީ މަހުގެ 27ވަނަ ދުވަހުގެ ނިޔަލަށް 79.1 މިލިއަން ރުފިޔާ ޚަރަދުކޮށްފައިވާ ކަމަށް ފިނޭންސް މިނިސްޓްރީގެ ހިސާބުތަކުން ވަނީ ދައްކާފައެވެ. އެއީ ދަރިވަރުންގެ ލޯނަށް ޚަރަދުކުރުމަށް މިއަހަރުގެ ބަޖެޓުން ކަނޑައަޅާފައިވާ އަދަދު ކަމަށްވާ 776.6 މިލިއަން ރުފިޔާގެ 10.2 އިންސައްތައެވެ.
އެކަމަކު، މިނިސްޓަރު މިއަދު ވިދާޅުވީ، ފެބްރުއަރީގެ ނިޔަލަށް 2001 ދަރިވަރުންގެ ލޯނަށް ޚަރަދުވީ، 20 މިލިއަނަށް ވުރެ ގިނަ ރުފިޔާ ކަމަށެވެ.
މިދިޔަ އަހަރު ސްޓޫޑެންޓް ލޯނަށް ޚަރަދުކުރަން ސަރުކާރުން ބަޖެޓުގައި ކަނޑައެޅީ 768 މިލިއަން ރުފިޔާއެވެ. ނަމަވެސް މިދިޔަ ޑިސެންބަރު މަހުގެ ނިޔަލަށް ޚަރަދުކޮށްފައިވަނީ އޭގެ ތެރެއިން 603 މިލިއަން ރުފިޔާއެވެ.