ޖިނާއީ މައްސަލައެއްގައި ހެކިބަސް ދިން މީހަކާ މެދު، ބަދަލު ހިފުމުގެ ގޮތުން މާރާމާރީ ހިންގި މީހަކު ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މިއީ، 2024 ވަނަ އަހަރު މާލޭ، ސަލްމާން މިސްކިތް ކައިރީ ސަރަހައްދުގައި އަށް މީހުންގެ ގްރޫޕަކުން މީހަކަށް ހަމަލާދިން މައްސަލައެވެ.
މި މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި މި މައްސަލައިގައި ދައުލަތުން ދައުވާ ކުރި މީހާއަކީ، ޖިނާއީ މައްސަލައެއްގައި ހެކިބަސް ދިން މީހަކާ މެދު ބަދަލު ހިފުމުގެ ގޮތުން މާރާމާރީ ހިންގި މީހަކެވެ. ހެކިބަސް ދިން ޖިނާއީ މައްސަލައަކީ ކޮން މައްސަލައެއް ކަމެއް އެނގިފައެއް ނުވެއެވެ.
މި މައްސަލައިގައި ދައުލަތުން ދައުވާކޮށްފައިވަނީ ކުށުގެ ރެކޯޑް ގިނަ ޒުވާން ފިރިހެނެއްގެ މައްޗަށެވެ. ރެކޯޑްތަކުން ދައްކާ ގޮތުގައި ދެކުނުގެ ރަށަކަށް ނިސްބަތްވާ އެ މީހާއަށް 18 އަހަރުވުމުގެ ކުރިންވެސް ވަނީ މާރާމާރީ ފަދަ މައްސަލަތަކުގައި ހައްޔަރުކޮށްފައެވެ.
އެ މައްސަލައިގައި އޭނާގެ މައްޗަށް ކުރީ، ގައިގައި އަތްލުމުގެ ކުށުގެ ދައުވާއެވެ.
އޮކްޓޫބަރު، 2024ގައި ހުށަހަޅައިފައިވާ މި މައްސަލައިގައި ކްރިމިނަލް ކޯޓުން މި ހަފުތާގައި ހުކުމް ކުރީ، އެ މީހާ އެއް މަހާއި 15 ދުވަހަށް ޖަލަށް ލުމަށެވެ. އެހެންނަމަވެސް މި މާރާމާރީއާ ގުޅިގެން ކުރިން 75 ދުވަހު އޭނާ ބަންދުކޮށްފައި ހުރުމުން އެ މުއްދަތު ހުކުމުން އުނިކުރުމުން އިތުރަށް ދެން އެ މައްސަލައިގައި ތަންފީޒު ކުރަން ޖެހޭ ހުކުމެއް ނެތެވެ.