ބްރެޒިލްގައި ޓިކްޓޮކްގެ ޑޭޓާ ސެންޓަރެއް ބިނާކުރުމުގެ މަސައްކަތް ކުރިއަށްއޮތް ހަ މަސްދުވަހުގެ ތެރޭގައި ފެށޭނެ ކަމަށް، އެ ޤައުމުގެ މިނިސްޓަރަކު ހުކުރު ދުވަހު ވިދާޅުވެއްޖެއެވެ.
މި މަޝްރޫޢުގެ ދަށުން 50 ބިލިއަން ރެއިސް (ގާތްގަނޑަކަށް 9.11 ބިލިއަން ޑޮލަރު) އިންވެސްޓް ކުރެވޭނެ ކަމަށް ލަފާކުރާކަމަށް އޭނާ ވިދާޅުވިއެވެ.
ބްރެޒިލްގެ މައިންސް އެންޑް އެނާޖީ މިނިސްޓަރު އެލެކްސަންޑްރޭ ސިލްވޭރާ ނެރުއްވި ބަޔާނެއްގައި ވިދާޅުވެފައިވަނީ، މިހާރުން ފެށިގެން ހަ މަސްދުވަހުގެ ތެރޭގައި، ޓިކްޓޮކްގެ ޑޭޓާ ސެންޓަރު ބިނާކުރުމުގެ މަސައްކަތް ފަށާނެކަމަށެވެ. މި މަޝްރޫޢު ބިނާކުރުމަށް ރާވާފައިވަނީ ބްރެޒިލްގެ އުތުރު-އިރުމަތީގައި އޮންނަ ސެއާރާ ސްޓޭޓްގައި ކަމަށްވެސް އެބަޔާނުގައި ބުނެފައިވެއެވެ.
މި މަޝްރޫޢުގެ ޕްލޭންތައް މިދިޔަ އޭޕްރީލް މަހު ރޮއިޓާސްއިން ވަނީ ހާމަކޮށްފައެވެ. އެފަހަރު މަޢުލޫމާތު ދީފައިވާ ތިން ފަރާތަކުން ބުނެފައިވަނީ، ޓިކްޓޮކްގެ ޗައިނާގެ މައި ކުންފުނި ބައިޓްޑާންސްއިން މިކަމާ ވިސްނަމުންދާ ކަމަށެވެ.
މަޢުލޫމާތު ލިބިފައިވާ ގޮތުގައި، މި ފެސިލިޓީ ހަދަން ރާވާފައިވަނީ ސެއާރާގެ ޕެސެމް ބަނދަރު ކޮމްޕްލެކްސްގައެވެ. މިއީ ބައިޓްޑާންސް އާއި ވައިބާގު ތަރައްޤީކުރާ ކުންފުނި ކާސާ ދޮސް ވެންޓޮސް ގުޅިގެން ކުރާ މަސައްކަތެކެވެ.
މިނިސްޓަރު ސިލްވޭރާ ވިދާޅުވީ، އިއާދަކުރަނިވި ހަކަތަ ފޯރުކޮށްދިނުމުގެ ގާބިލިއްޔަތު ބްރެޒިލްގައި ހުރުމާއެކު، ޑޭޓާ ސެންޓަރުތަކުގެ އިންވެސްޓްމަންޓްތައް ލިބުމުގެ ފުރުސަތު ބޮޑު ކަމަށެވެ. އަދި މިދިޔަ މަހު ރައީސް ލުއިޒް އިނާސިއޯ ލޫލާ ދާ ސިލްވާއާ ސޮއިކުރެއްވި ރިޔާސީ އަމުރަކަށްވެސް އޭނާ އަލިއަޅުވާލައްވާ ވިދާޅުވީ އެ އަމުރުގެ މަޤްޞަދަކީ، މިފަދަ މަޝްރޫޢުތައް ޤައުމަށް ގެނައުމަށްޓަކައި ފެޑެރަލް ޓެކްސް ދަށްކުރުން ކަމުގައެވެ.
މިދިޔަ މޭ މަހު، 'ކާސާ ދޮސް ވެންޓޮސް'އިން ވަނީ ޕެސެމް ބަނދަރު ކޮމްޕްލެކްސްގައި 300 މެގަވޮޓްގެ ޑޭޓާ ސެންޓަރު މަޝްރޫޢެއް ކުރިއަށް ގެންދިއުމަށް މުހިންމު ދެ ހުއްދަ ސަރުކާރުން ހޯދިކަން އިއުލާނުކޮށްފައެވެ.
މިފަދަ ބޮޑެތި ޑޭޓާ ސެންޓަރުތައް ބިނާކުރުމަކީ ދުނިޔޭގެ ފެންވަރުގައި މިހާރު ހަލުވިކަމާއެކު ކުރިއަރަމުން އަންނަ ކަމެކެވެ.
ޚާއްޞަގޮތެއްގައި ޑޭޓާ ރައްކާތެރިކަމާއި، އެ ޤައުމެއްގެ ސަރަޙައްދުގެ ތެރޭގައި މަޢުލޫމާތު ރައްކާކުރުމުގެ މުހިންމުކަން ދުނިޔޭގެ ޤައުމުތަކުން ފާހަގަކުރަމުންދާ ދަނޑިވަޅެއްގައި، ޓިކްޓޮކްގެ ޗައިނާގެ މައި ކުންފުނި ބައިޓްޑާންސްއަށް ދުނިޔޭގެ އެކި ކަންކޮޅުތަކުން ޑޭޓާ ސަލާމަތީ މައްސަލަތަކާ ކުރިމަތިވެފައިވާ ދަނޑިވަޅެއްގައި މިފަދަ މަޝްރޫޢުތައް މުހިންމުވެއެވެ.
ބްރެޒިލްއަކީ އިއާދަކުރަނިވި ހަކަތަ ބޭނުންކުރުމަށް މަސައްކަތްކުރާ ބޮޑު އިޤްތިޞާދެއްކަމުން، އަދި އެޤައުމުގެ ސަރުކާރުން މިފަދަ އިންވެސްޓްމަންޓްތަކަށް ހިތްވަރުދިނުމަށް ޓެކްސް އިނާޔަތްތައް ދިނުމަކީ ޓިކްޓޮކް ފަދަ ބޮޑެތި ކުންފުނިތަކަށް މި ސަރަޙައްދުގައި ޑޭޓާ ސެންޓަރު ބިނާކުރުމަށް ލިބޭ ބޮޑު ހިތްވަރެކެވެ.
މިއީ ސެއާރާ ސްޓޭޓްގެ އިޤްތިޞާދަށްވެސް ވަރަށް ބޮޑު ކުރިއެރުމެއް ގެނެސްދޭނެ މަޝްރޫޢެއް ކަމަށް ރިޕޯޓްތައް ބުނެއެވެ.