ދުނިޔޭގެ އެންމެ މަޝްހޫރު މެސެޖިން އެޕްލިކޭޝަން ކަމަށްވާ ވަޓްސްއެޕްގެ އެންޑްރޮއިޑް ބީޓާ ވާޝަންގައި، ޔޫޒާނޭމް ރިޒާވްކުރުމުގެ ފީޗާއެއް ޓެސްޓުކުރަމުންދާ ކަމަށް ރިޕޯޓުތައް ބުނެފިއެވެ.
މިކަމުގެ މައުލޫމާތު އެންމެ ފުރަތަމަ ހާމަކޮށްފައިވަނީ ވަޓްސްއެޕްގެ އާ ފީޗާތައް ދެނެގަތުމަށް މަޝްހޫރު ވާބީޓާއިންފޯ އިންނެވެ. މި ފީޗާ ފެނިފައިވަނީ ވަޓްސްއެޕް ބީޓާ ފޯ އެންޑްރޮއިޑް ވާޝަން 2.25.28.12 ގައެވެ. ޔޫޒާނޭމް ރިޒާވްކުރުމުގެ މި ފީޗާއަކީ ވަޓްސްއެޕްގައި ޔޫޒާނޭމް ތައާރަފުކުރުމުގެ ދިގު ދަތުރެއްގެ ފުރަތަމަ ފިޔަވަޅެއް ކަމަށް ބެލެވެއެވެ.
މި ފީޗާގެ ސަބަބުން، ޔޫޒާނޭމްގެ ފުރިހަމަ ހިދުމަތް އާންމުކުރުމުގެ ކުރިން، ބޭނުންވާ ޔޫޒާނޭމްތައް ރިޒާވްކުރުމުގެ ފުރުސަތު ޔޫޒަރުންނަށް ލިބޭނެއެވެ.
ވާބީޓާއިންފޯއިން ބުނާ ގޮތުގައި، މި ފީޗާގެ މައިގަނޑު އެއް މަގުސަދަކީ، ޔޫޒަރުންނަށް އަންނަ ނޭދެވޭ މެސެޖުތައް މަދުކުރުމެވެ. ޔޫޒާނޭމް ތައާރަފުވުމާ އެކު، ޔޫޒަރުންނާ ގުޅޭނީ އެ މީހުންގެ ޔޫޒާނޭމްއާ އެކު ޚާއްސަ ކީއެއް އޮންނަ ފަރާތްތަކަށް އެކަންޏެވެ. މިއީ ޕްރައިވެސީ އިތުރުކުރުމަށް އެޅޭ މުހިންމު ފިޔަވަޅެކެވެ.
ވަޓްސްއެޕް ސެޓިންގްސްގެ ޕްރޮފައިލް ސެކްޝަން އިން މި ފީޗާ ފެންނާނެ ----
އަލަށް ތައާރަފުކުރާ މި ފީޗާގައި ޔޫޒާނޭމްއަކީ ވެބްސައިޓްތަކުގެ އެޑްރެސްތަކުގައި ބޭނުންކުރާ ފަދަ 'www' އިން ފެށޭ ނަމަކަށް ވެގެން ނުވާނެއެވެ. މިކަމުގެ ބޭނުމަކީ ވަޓްސްއެޕް ޔޫޒާނޭމްތަކާއި ރަސްމީ ވެބްސައިޓް އެޑްރެސްތައް އޮޅުންނާރާނެގޮތް ހެދުމެވެ. އަދި، ޔޫޒާނޭމްގައި މަދުވެގެން އެއް އަކުރު ( 'a' ނުވަތަ 'b' ފަދަ އަކުރެއް) ހިމެނުން މަޖުބޫރެވެ. މީގެ އިތުރުން، ޔޫޒާނޭމް އެކުލެވިގެންވަނީ އަކުރުތަކާއި ނަންބަރުތަކުގެ މައްޗަށް އެކަންޏެެއް ނޫނެވެ. ސުމަކުން ފެށިގެން ނުވައެއްގެ ނިޔަލަށް ހުރި ނަންބަރުތަކާއި، ފުލް ސްޓޮޕް (.), އަދި އަންޑަސްކޯ (_) ފަދަ ކެރެކްޓާ އަކުރުތައް ވެސް ޔޫޒާނޭމްގައި ބޭނުންކުރުމުގެ ފުރުސަތު ލިބިގެންވެއެވެ. މި ގަވާއިދުތަކުގެ ސަބަބުން ކޮންމެ ޔޫޒަރަކަށް ވެސް ޚާއްސަ އަދި ފަސޭހައިން ދެނެގަނެވޭނެ ޔޫޒާނޭމެއް ހެދުމުގެ އިހްތިޔާރު ލިބިގެންދާނެއެވެ.
މި ފީޗާ މިހާރުވެސް ބީޓާ ޓެސްޓަރުންނަށް ލިބިފައިވާއިރު، ކުރިއަށް އޮތް ހަފުތާތަކުގެ ތެރޭގައި އިތުރު ބަޔަކަށް ޓެސްޓުކުރުމަށްޓަކައި ދޫކޮށްލެވިދާނެ ކަމަށް ވާބީޓާއިންފޯއިން ލަފާކުރެއެވެ.
ޔޫޒަރުންނަށް އެ މީހުން ބޭނުންވާ ޔޫޒާނޭމްތައް އަވަހަށް ރިޒާވްކުރުމުގެ ފުރުސަތު ލިބުމަކީ، ފީޗާ އާންމުވުމުގެ ކުރިން އެހެން މީހަކު އެ ނަން ނެގުމުގެ ފުރުސަތު ކުޑަކޮށް، ހަމަހަމަ ގޮތެއްގައި ފީޗާ ބޭނުންކުރެވޭނެ ގޮތެއް ހެދުމަށް އެޅޭ ފިޔަވަޅެކެވެ.