ކުރީގެ ރައީސް އަބްދުﷲ ޔާމީންގެ ވެރިކަމުގައި މޯލްޑިވްސް ގޭސް ޕްރައިވެޓް ލިމިޓެޑު (މޯލްޑިވް ގޭސް)ގެ މެނޭޖީން ޑިރެކްޓަރަކަށް ހުންނެވި، ހ. ހެންވޭރުފެހި، ޢަބްދުﷲ މައުމޫންގެ މައްޗަށް ރިޝްވަތު ހިފުމުގެ ދައުވާ ސާބިތުވެ 12 އަހަރަށް ޖަލަށް ލާން މިއަދު ހުކުމްކޮށްފިއެވެ.
މައުމޫނާއި އޭނާގެ އާއިލީ ބައެއް މީހުންނަށް މޯލްޑިވް ގޭހުގެ ސަޕްލަޔަރެއް ކަމަށްވާ ތްރީޑީއެޗް އިންޓަނޭޝަނަލްއިން ފައިސާ ފޮނުވާ ކަމަށް ވަނީ ތުހުމަތުކޮށްފައެވެ. އެ މައްސަލައިގައި ރިޝްވަތު ގަބޫލުކުރުމުގެ ޖުމުލަ ހަތް ދައުވާއެއް އުފުލައިފައިވާކަން ޕްރޮސެކިއުޓާ ޖެނެރަލް (ޕީޖީ) އޮފީހުން ހާމަކުރީ މިދިޔަ އަހަރުގެ އޭޕްރީލް މަހެވެ.
އޭގެ ތެރެއިން ކޮންމެ ދައުވާއެއްގެ އަސާސީ އަދަބަކީ ތިން އަހަރާއި ދެ މަހާއި 12 ދުވަހުގެ ޖަލު ހުކުމެކެވެ.
އެ މައްސަލައިގައި މިއަދު ކްރިމިނަލް ކޯޓުން ކުރި ހުކުމުގައި ވަނީ، ހަތް ދައުވާގެ ތެރެއިން ދެ ދައުވާ އޭނާގެ މައްޗަށް ސާބިތުވާ ކަމަށެވެ. އެހެންވެ، އޭނާއަށް ކުރީ 12 އަހަރާއި ނުވަ މަހާއި 18 ދުވަހުގެ ޖަލު ހުކުމެކެވެ.
މައުމޫންގެ މައްޗަށް ކޮށްފައިވާ ބާކީ ފަސް ދައުވާގެ ހުކުމް ކުރާނީ އެހެން ދުވަހެއްގައި ކަމަށް ކްރިމިނަލް ކޯޓުން ބުނެފައިވެއެވެ.
މައުމޫންގެ މައްޗަށް ރިޝްވަތުގެ ފުރަތަމަ ދައުވާ އުފުލާފައިވަނީ ޑިސެމްބަރު 10، 2013 އިން ފެށިގެން ނޮބެމްބަރު 16، 2018 އާ ހަމައަށް މޯލްޑިވް ގޭހުގެ މެނޭޖިން ޑިރެކްޓަރުގެ މަގާމުގައި ހުރެ އެ ކުންފުންޏަށް ލިކުއިޑް ޕެޓްރޯލިއަމް ގަތުމަށް 2016 ވަނަ އަހަރުގެ އޭޕްރީލް މަހުން ފެށިގެން ތްރީޑީއެޗް އިންޓަނޭޝަނަލްއަށް ހަވާލުކުރުމަށް ފަހު، ރިޝްވަތު ނެގިކަމުގެ ތުހުމަތުގައެވެ.
ޕީޖީ އޮފީހުން މީގެ ކުރިން ބުނީ، މޯލްޑިވްސް ގޭހުގެ ނަމުގައި އިސްލާމިކް ބޭންކްގައި ހުޅުވާފައިހުރި އެކުންޓަށް އޭޕްރީލް 4، 2016 ގައި ތްރީޑީއެޗް އިންޓަނޭޝަލްއަށް ލިކުއިޑް ޕެޓްރޯލިއަމް ޝިޕްމަންޓެއްގެ އަގަށްވާ 634،700 އެމެރިކާ ޑޮލަރު ޖަމާކޮށްފައިވާއިރު، މައުމޫންގެ ނަމުގައި ބޭންކް އޮފް ސިލޯންގައި ހުޅުވާފައިހުރި އެކައުންޓަކަށް 29،941.50 އެމެރިކާ ޑޮލަރު ޖަމާކޮށްފައިވާ ކަމަށެވެ.
ދެވަނަ ދައުވާ އުފުލާފައިވަނީ ޖޫން 7، 2016 ގައި ހިނގި މުއާމަލާތަކާ ގުޅިގެންނެވެ.
މޯލްޑިވް ގޭސްގެ ކުރީގެ އެމްޑީ އަބްދުﷲ މައުމޫން: އޭނާ 12 އަހަރަށް ޖަލަށް ލާން ވަނީ ހުކުމްކޮށްފައި -- ސަން ފޮޓޯ/މުހައްމަދު އަފްރާހު
އެ ފަހަރު ވެސް ޝިޕްމަންޓަށް ފަހު ބޭންކް އޮފް ސިލޯންގައި ހުރި މައުމޫންގެ އެކައުންޓަކަށް 49،921.50 ޑޮލަރު ވަނީ ޖަމާކޮށްފައެވެ. އޭގެ އިތުރުން، އޭނާއާ ގުޅުން އޮންނަ ކުންފުންޏެއް ކަމަށްވާ މޮން އާކް ޕްރައިވެޓް ލިމިޓެޑްގެ ބޭންކް އޮފް މޯލްޑިވްސް (ބީއެމްއެލް) އެކައުންޓަކަށް 12،201.50 ޑޮލަރު ވަނީ ޖަމާކޮށްފައެވެ.
ތިންވަނަ ދައުވާކުރި މުއާމަލާތް ހިނގާފައިވަނީ އޮގަސްޓު 1، 2016 ގައެވެ. އެ ފަހަރު ވެސް މޮން އާކް ކުންފުނީގެ ބީއެމްއެލްގެ އެކައުންޓަށް 49،949.50 ޑޮލަރު ޖަމާކޮށްފައިވާ ކަމަށް ޕީޖީ އޮފީހުން ވަނީ ބުނެފައެވެ.
ހަތަރުވަނަ ދައުވާ އުފުލާފައިވަނީ އޭޕްރީލް 9، 2017 ގައި ހިނގި މުއާމަލާތަކާ ގުޅިގެންނެވެ. އެ ފަހަރު ވެސް ސަޕްލަޔަރަށް ފައިސާ ޖަމާކުރުމަށް ފަހު، މައުމޫނާ ގުޅުން އޮންނަ އެހެން ކުންފުންޏެއް ކަމަށްވާ އައި ޑިވެލޮޕާޒް ޕްރައިވެޓް ލިމިޓެޑްގެ އިސްލާމިކް ބޭންކް އެކައުންޓަކަށް 24،930 ޑޮލަރު ޖަމާކޮށްފައިވާ ކަމަށް ޕީޖީން ބުނެއެވެ.
ފަސްވަނަ ދައުވާ އުފުލާފައިވަނީ މޭ 15، 2017 ގައި ހިނގި މުއާމަލާތަކާ ގުޅިގެންނެވެ. އެ ފަހަރު ވެސް ސަޕްލަޔަރަށް ފައިސާ ދެއްކުމަށް ފަހު، މައުމޫންގެ ނަމުގައި އިސްލާމިކް ބޭންކުގައި ހުޅުވާފައިހުރި އެކައުންޓަކަށް 46،555 ޑޮލަރު ވަނީ ޖަމާކޮށްފައިވާ ކަމަށް ޕީޖީ އޮފީހުން ވަނީ ތުހުމަތުކޮށްފައެވެ.
ހަވަނަ ދައުވާއެއް އުފުލީ އޮގަސްޓު 23، 2017 ގައެވެ. އެ ފަހަރު ވެސް ސަޕްލަޔަރަށް ފައިސާ ޖަމާކުރުމަށް ފަހު، އޭނާގެ ނަމުގައި އިސްލާމިކް ބޭންކުގައި ހުޅުވާފައިހުރި އެކައުންޓަށް 49،955 ޑޮލަރު ޖަމާކުރި ކަމަށް ދައުވާގައި ބުނެފައިވެއެވެ.
އެންމެ ފަހު ހަތްވަނަ ދައުވާއެއް އުފުލި މުއާމަލާތް ހިނގާފައިވަނީ އޮކްޓޫބަރު 8، 2017ގައެވެ. އެ ފަހަރު ވެސް ސަޕްލަޔަރަށް ފައިސާ ޖަމާކުރުމަށް ފަހު، މައުމޫންގެ އެއްބަފާ ބޭބެ އަހުމަދު ހަމީދުގެ ނަމުގައި ބީއެމްއެލްގައި ހުޅުވާފައިހުރި އެކައުންޓަކަށް 34،950 ޑޮލަރު ޖަމާކުރި ކަމަށް ޕީޖީ އޮފީހުން ތުހުމަތުކުރެއެވެ.
މި ހަތް މުއާމަލާތާ ގުޅިގެން ރިޝްވަތުގެ ގޮތުގައި އަބްދުﷲ މައުމޫނާއި އޭނާއާ ގުޅުންހުރި މީހުންނާއި ކުންފުނިތަކުގެ އެކައުންޓަށް ޖުމުލަ 298،403.5 ޑޮލަރު ޖަމާކޮށްފައިވާ ކަމަށް ޕީޖީ އޮފީހުން ދައުވާގައި ބުނެފައިވެއެވެ.